လါယူၤ ၁၆ သီ, ၂၀၂၅ နံၣ်, ခ့ၣ်အဲးစံၣ်
အံလူၢ်ကရူၢ်ဒီးတကွံပူၤကရူၢ်လၢအိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤအံၤ တနံၤဃီအတီၢ်ပူၤ ခီဖျိပယီၤသုးကျိဖးဒိၣ်အဃိ ကမျၢၢ်ပိၥ်မုၣ်ဘၣ်ဒိ(၂)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူ ဘၣ်ဒါ အအိၣ် န့ၣ် လီၤ.
ဖဲလါယူၤ ၁၄ သီ ဂီၤခီ ၁၀း၁၀ မံးနံးအဆၢကတီၢ် တၢ်ဒုးကဲထီၣ်တအိၣ်ပယီၤသုးခီၣ်ချ့သုးရ့ၣ်(ခမရ-၃)ခးလီၤ(၁၂၀ မမ)ကျိဖးဒိၣ် (၃)ဖျၢၣ်ဆူ တကွံပူၤကရူၢ် စံကိ(ဇီးကုန်း)သဝီပူၤအဃိ ဒီၤအ့ဆါ(၅၃)နံၣ်အံၤကျိဖးဒိၣ်အက့အခီဘၣ်၀ဲအခီၣ်ကံၣ်ဒုၣ်ဒီးလၢန့ၣ်အမဲၥ် ညါဟံၣ်ဘၣ်ဒိဘၣ်ထံး၀ဲ(၂)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီတၢ်ကဲထီၣ်သး၀ံၤတနံၤဃီဖဲဟါခီ ၅း၀၃ မံးနံးအဆၢကတီၢ်န့ၣ်စ့ၢ်ကီး ပယီၤသုးတဒူၣ်ဃီ၀ဲအံၤခးလီၤကဒီး၀ဲ(၁၂၀ မမ) ကျိဖးဒိၣ်(၂)ဖျၢၣ်လီၤတဲၥ်ပိၢ်ဖးထီၣ်လၢအံလူၢ်ကရူၢ် အံလူၢ်ဒိၣ်သ၀ီပူၤတဖျၢၣ်ဒီးသ၀ီချၢတဖျၢၣ်အဃိ မၣ်၀ၤ၀ၤအူ(၃၀)နံၣ်အံၤ ကျိဖးဒိၣ်အက့အဃိဘၣ်စ့ၢ်ကီး၀ဲအခီၣ်ကံၣ်ဒုၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါယူၤ ၁၁ သီ ဟါခီ ၅း၀၀ နၣ်ရံၣ်ဘျဲၣ်အခါန့ၣ်စ့ၢ်ကီး လၢအံလူၢ်ဒိၣ်သ၀ီအပူၤ ပယီၤသုးတဒူၣ်ဃီ၀ဲအံၤ ပညိၣ်ခးလီၤကျိဖးဒိၣ်(၃) ဖျၢၣ်အဃိ စီၤငွ့ၤလၤ(၃၄)နံၣ်အံၤသံ၀ဲတဘျီဃီဒီး ဘၣ်ဒိ(၄)ဂၤအမဲၥ်ညါသိလ့ၣ်စ့ၢ်ကီးဟးဂီၤ တခိၣ် ကဲထီၣ် ဒံး၀ဲန့ၣ်လီၤ.
ကၠဲးထိၣ်ကီၢ်ဆၣ် ဒူသ၀ီတဖၣ်အပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ပယီၤသုးအံၤခးလီၤ၀ဲကျိဖးဒိၣ်အိၣ်၀ဲတလီၢ်လီၢ်ဒီး ဒ်န့ၣ်အသိး ခီဖျိလၢကျိဖးဒိၣ်အံၤအဃိ လီၢ်က၀ီၤကမျၢၢ်သံဘၣ်ဒိဘၣ်ထံး,ဟံၣ်ဃီတၢ်သူၣ်ထီၣ်,တၢ်ထူၣ်တၢ်ဘိဟးဂီၤကဲထီၣ်အိၣ်ထီဘိ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်တကီၢ်ခါခဲအံၤလၢကထီၣ်မၤန့ၢ်က့ၤဘံလ့ကီၢ်ဆၣ်ပူၤ မဲးပြ့ခံသုးကလၢၤလၢဟီၣ်က၀ီၤကညီဒီကလုၥ်တၢ်ထူၣ်ဖျဲးသုး မုၢ်ဒိၣ်(KNLA)သုးပၥ်ဖှိၣ်ထီၣ်န့ၢ်ဖဲလါဖ့ၤဘြူၤအါရံၤခါအံၤအဂီၢ် စးထီၣ်ဖဲအပူၤကွံၥ်လါမ့ၤအခါန့ၣ် ပယီၤသုးမၤအါထီၣ်အသုး ဂံၢ်ဘါ အါအါဂီၢ်ဂီၢ်အဂ့ၢ်န့ၣ် သုးက့ပှၤဘၣ်မူဘၣ်ဒါစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်၀ဲန့ၣ်လီၤ.
