ပယီၤသုးခးလီၤကျိဖးဒိၣ်လၢကီးတရံး၀့ၢ်ချၢဒူသ၀ီတဖၣ်အပူၤကိးမုၢ်နံၤဒဲး

လါမ့ၤ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံးကီၢ်ဆၣ်အပူၤ ပယီၤသုးခးလီၤ၀ဲကျိဖးဒိၣ်ဆူခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ (သုးက့ ၆)ဟီၣ်က၀ီၤ ကီးတရံး၀့ၢ်ချၢဒူသ၀ီတဖၣ်အပူၤကိးမုၢ်နံၤဒဲးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ

ဖဲလါမ့ၤ ၂၇ သီ မုၢ်ထူၣ်အဆၢကတီၢ်န့ၣ် ခီဖျိပယီၤသုးခးလီၤကျိဖးဒိၣ်အဃိ ကီးတရံးကလံၤထံး(ကၠၤအ့ကိ)သ၀ီပူၤ ကမျၢၢ်အဟံၣ်တဖျၢၣ်ဒီးသိလ့ၣ်တခိၣ်ဟးဂီၤ၀ဲအသိး တကးဒံးဘၣ်လၢန့ၣ်အမဲာ်ညါ ကီးတရံးမုၢ်နုာ်(သလွဲထီၣ်)သ၀ီပူၤ ဟံၣ်ဟးဂီၤ၀ဲစ့ၢ်ကီးတဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအသိးသ့ၣ်ညါဘၣ်န့ၣ်လီၤႉ

ကီးတရံး၀့ၢ်ကလံၤထံးကမျၢၢ်တဂၤစံး၀ဲလၢ“အ၀ဲသ့ၣ်ခးလီၤကျိဖးဒိၣ်လၢသ၀ီပူၤကိးမုၢ်နံၤဒဲးလီၤႉမုၢ်ဆါခီမ့တခးလီၤ၀ဲဘၣ်န့ၣ်မုၢ်နၤခီန့ၣ်ခးလီၤ၀ဲလီၤႉတဘျီတခီၣ်န့ၣ်ဘၣ်၀ဲဒၣ်ၦၤဟံၣ်ၦၤဃီၦၤဆၣ်ဖိကီၢ်ဖိမီၤနီၤႉတဘျီတခီၣ်န့ၣ်ကျိဖးဒိၣ်လီၤတဲာ်ပိၢ်ဖးထီၣ်ဖးယံၤညါႉဘၣ်ဘျီဘျီန့ၣ်လီၤတဲာ်ဘူးဘူးဖိဖဲ၀့ၢ်ကပၤသ၀ီပူၤအံၤလီၤႉခီဖျိကျိဖးဒိၣ်အဃိအိၣ်မးသးတဘံၣ်တဘၢလၢၤဘၣ်ႉဘၣ်နံၤနံၤန့ၣ်ခးလီၤကျိဖးဒိၣ်အိၣ်လွံၢ်ဖျၢၣ်ယဲၢ်ဖျၢၣ်ႉဘၣ်နံၤနံၤန့ၣ်အိၣ်အဖျၢၣ်လၢအဆံညါ”အဂ့ၢ်န့ၣ် စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ကီးတရံးပယီၤသုးလၢအခးလီၤကျိဖးဒိၣ်သ့ၣ်တဖၣ်န့ၣ်မ့ၢ်၀ဲခီၣ်ချ့သုးရ့ၣ်(ခမရ–၉၇)ဒီး (စကခ–၁၂) စုတီၤဖီလာ်(ခမရ–၂၃၁)သုးရ့ၣ်သ့ၣ်တဖၣ်ဒီးပညိၣ်ခးလီၤကျိဖးဒိၣ်ဆူကမျၢၢ်ဒူသ၀ီတၢ်အိၣ်တၢ်ဆိးတၢ်ဖံးအီၣ်မၤအီၣ်လီၢ်ကျဲအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ခီဖျိပယီၤသုးခးလီၤကျိးဖဒိၣ်တလီၢ်လီၢ်လီၤတဲာ်ပိၢ်ဖးထီၣ်လၢကမျၢၢ်တၢ်ဖံးအီၣ်မၤအီၣ်လီၢ်ကျဲအဃိ ယီၣ်ကိာ်သ၀ီဒီး(ကၠီၤစှၤကိ)သ၀ီဃုာ်ဒီးသ၀ီလၢအိၣ်ဖဲတၢ်ခိၣ်တၢ်ဃၢၤဖဲန့ၣ်သ၀ီဖိတဖၣ်မၤအီၣ်ကျီးတဘူၣ်လၢၤဘၣ် ဘၣ်ဟးမၤအီၣ်က့ၤစံာ်ကျီးလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

လၢန့ၣ်အမဲာ်ညါဖဲအပူၤကွံာ်လါမ့ၤ ၁၃ သီဒီး ၁၄ သီအခါစ့ၢ်ကီး ပယီၤသုးနုာ်လီၤမၤဟးဂီၤကွံာ်၀ဲ ကီးတရံးကျဲနုာ်လီၤ ကမဲၤကိကျဲႇဖံ၀ါဖၠၣ်ကျဲႇကၠဲးဒိကျဲဒီးတီၤကၠၤအ့ကျဲသ့ၣ်တဖၣ်အံၤလၢဘူၣ်ဒိၣ်စၣ်သိလ့ၣ် ပၢၢ်တုၤလၢ သိလ့ၣ်ဟးထီၣ်က့ၤလီၤတသ့လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်ခ့ၣ်အဲၣ်ယူၣ်(သုးက့ ၆)ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲအသိးန့ၣ် အပူၤကွံာ်လါအ့ဖြ့ၣ်အခါ ပယီၤသုးခးလီၤကျိဖးဒိၣ်လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤခဲလၢာ်အိၣ်၀ဲ(၁၈၄)ဘျီဒီး ကဘီယူၤဟဲခးလီၤတၢ်အိၣ်၀ဲ(၃၁)ဘျီညါန့ၣ်လီၤႉခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲခးလီၤတၢ်အံၤအဃိ တၢ်ဘူၣ်တၢ်ဘါတၢ်သူၣ်ထီၣ်ႇကၠိႇကသံၣ်ဒၢးဒီးကမျၢၢ်အဟံၣ်ခဲလၢာ်(၃၈၇)ဖျၢၣ်ဟးဂီၤ၀ဲဒီးဟံၣ်ဟးဂီၤလီၤကဘျဲး၀ဲ(၁၂)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ