လါယူၤ ၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် တးပီဒီးလ့က့ၣ်ပယီၤသုးကလၢၤအံၤလၢကဆီတလဲသုးအဂီၢ် ဖဲမဟါဟါခီ အဆၢကတီၢ်န့ၣ် သုးဂံၢ်ဘါအဂၤ(၈၀)ဃၣ်ဃၣ်ဟဲတုၤ၀ဲလၢလ့ၣ်က့ၣ်သုးကလၢၤပူၤလံအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ.
လၢကဟဲထီၣ်မၤပှဲၤသုးဂံၢ်ဘါဒီးကဆီတလဲသုးအဂီၢ် ဖဲအပူၤကွံၥ်လါမ့ၤသၢနွံတနွံအခါန့ၣ် ပယီၤသုးဂံၢ်ဘါအဂၤ(၁၅၀)ဃၣ်ဃၣ် အိၣ်ဟဲထီၣ်၀ဲလၢဖၣ်အၣ်ကီၢ်ဆၣ်(DKBA)သုးခိၣ်ဘိၤဘံၣ်အတၢ်လီၢ်၀ံၤဖဲ ၂၈ သီအနံၤန့ၣ်ဟဲတုၤ၀ဲလၢသထူၣ်ကီၢ်ဆၣ် ပနွဲၢ်ကျါသုးကလၢၤဒီး ဖဲမဟါလါယူၤ ၄ သီ ဟါခီ ၅း၀၀ နၣ်ရံၣ်အဆၢကတီၢ်န့ၣ် ဟဲတုၤ၀ဲဒၣ်လၢလ့က့ၣ်သုးကလၢၤဒ် အံၤန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် သုးက့ ၁ သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ“ပယီၤသုးအံၤဟဲထီၣ်တုၤလၢလ့က့ၣ်သုးကလၢၤ ဖဲမဟါဟါခီ ၅း၀၀ နၣ်ရံၣ်န့ၣ်လီၤ. အဟဲထီၣ်အခါန့ၣ်တတိနိၣ်ဒီးပပှၤဘၣ်,အ၀ဲသ့ၣ်န့ၣ်ဟဲထီၣ်လၢလ့က့ၣ်လ့ကစၢၢ်တကပၤ. ဟဲထီၣ်ကျဲန့ၣ်လၢပှၤတပၥ်သူၣ်ပၥ်သးကျဲဘၣ်.အ၀ဲသ့ၣ်အဂံၢ်ဘါကအိၣ်အဂၤ(၈၀)”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ပယီၤသုးလၢအဟဲတုၤဖဲလ့က့ၣ်သုးကလၢၤခဲအံၤတဖၣ်အကျါတနီၤန့ၣ်တၢ်ရဲၣ်တၢ်ကျဲၤအိၣ်လၢကလဲၤဆီ တလဲအသုး လၢတးပီသုးကလၢၤဒီး ဘၣ်ဆၣ်ခဲအံၤတလဲၤဘၣ်၀ဲဒံးဘၣ်အိၣ်ဒံးလၢလ့က့ၣ်သုးကလၢၤပူၤအဂ့ၢ်န့ၣ် သုးက့ခိၣ် စံးအါထီၣ် ၀ဲန့ၣ်လီၤ.
တကးဒံးဘၣ်ပယီၤသုးအပှၤလီၢ်လံၤလၢအိၣ်ဃၥ်သုးကလၢၤပူၤတဖၣ်အံၤစ့ၢ်ကီးပှၤဒိးန့ၢ်တၢ်ကစီၣ်လၢတၢ်ကဆှၢအ၀ဲသ့ၣ်ဆူ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်က၀ီၤပူၤလၢတၢ်ဒုးဆူၣ်ထီၣ်ခဲအံၤအသိး ပှၤသ့ၣ်တဖၣ်အံၤအသုး၀ဲၤလီၢ်ခိၣ်သ့ၣ် အိၣ်၀ဲလၢဘျံးဒ၀ဲၢ်ကီၢ်ရ့ၣ်(သုးက့ ၄)တကပၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤ.
ဟီၣ်က၀ီၤဖဲန့ၣ်အပူၤစးထီၣ်လၢတၢ်ဒိးန့ၢ်တၢ်ကစီၣ်လၢပယီၤသုးဟဲထီၣ်လံန့ၣ်(KNLA)အပှၤအိၣ်ခိး၀ဲလၢကျဲတၢ်ဘၢၣ်စၢၤအိၣ်၀ဲဘၣ်ဆၣ် ပယီၤသုးအံၤဟဲထီၣ်ကျဲလိၤလိၤတမ့ၢ်ဘၣ်မ့မ့ၢ်တခီဟဲ၀ဲလၢကစၢၢ်ကျဲပှၢ်မုၢ်သီထိပူၤအဃိ ဘၣ်ဟဲထီၣ်တုၤ၀ဲဒ် အံၤ လီၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးပယီၤသုးသ့ၣ်တဖၣ်အံၤတချုးအ၀ဲသ့ၣ်ဟဲထီၣ်တုၤလၢလ့က့ၣ်သုးကလၢၤဒံးဘၣ်အခါ ဖဲလါမ့ၤ ၃၀ သီ အနံၤ ဟဲထီၣ်တုၤလၢလါခိဒီးနိၣ်သလးအီသ၀ီဘၢၣ်စၢၤ ကစၢၢ်ကျါအခါန့ၣ်ဖီၣ်မၤသံ၀ဲသထူၣ်ကီၢ်ဆၣ် မီၣ်လ့ကရူၢ် ကးဒီးနံၤသ၀ီဖိ စီၤလါထု (၅၂)နံၣ် လၢအလဲၤဃုအီၣ်ကုၤတလးအီဒံၣ်အံၤဒီး တၢ်က့ၤထံၣ်က့ၤပှၤသ၀ီဖိတဂၤအံၤအစိၣ်ဖဲ လါယူၤ ၃ သီအနံၤ န့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ်(၂၀၂၁)သုးဟံန့ၢ်တၢ်စိတၢ်ကမီၤ၀ံၤလီၢ်ခံ သုးကလၢၤခံဖျၢၣ်အံၤတၢ်ဆီတလဲအသုးတအိၣ် နီတဘျီဒံးဘၣ်ဒီး ဒ်န့ၣ်အသိးလၢလွံၢ်နံၣ်ဘျဲၣ်အတီၢ်ပူၤပယီၤသုးဟဲထီၣ်ဆီတလဲအသုးဒ်အံၤမ့ၢ်တၢ်အဆိကတၢၢ်တဘျီလီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
