လါယူၤလံ ၃၁သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,ဒူပျၥ်ယၥ်ကီၢ်ရ့ၣ်ကီးတရံး-ကြုၢ်တုကျဲဒီတဘိအပူၤပယီၤသုးက့ၤဒိၣ်စိန့ၢ်က့ၤဝဲဝံၤအလီၢ်ခံမၢဆူၣ်ဝဲကမျၢၢ်တဖၣ်ကက့ၤအိၣ်ဆိးကဒါက့ၤဝဲလၢအတၢ်အိၣ်တၢ်ဆိးလီၢ်ကျဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ.
တလါအံၤလါယူၤလံအပူၤပယီၤသုးတဖၣ်အံၤဒိၣ်စိက့ၤဝဲကီးတရံး-ကြုၢ်တုကျဲတဖၣ်ဝံၤအလီၢ်ခံ,မၢဆူၣ်ဝဲလီၢ်ကဝီၤကမျၢၢ်လၢအလဲၤအိၣ်ကဒုအသးဖဲ(ကျဲ)တိၤခိၣ်ဃၢၤတၢ်လီၢ်တၢ်ကျဲတဖၣ်လၢကက့ၤအိၣ်ဆိးက့ၤဝဲလၢကြုၢ်တုဝ့ၢ်ပူၤဒီး,မၤပျံၤမၤဖုးဝဲလၢကမၤဟးဂီၤကွံၥ်ဝဲကမျၢၢ်အတၢ်လီၢ်တၢ်ကျဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
“ကြုၢ်တုန့ၣ်ပှၤတနီၤလဲၤစံၢ်အိၣ်လၢ,(ကျဲ)တိၤအဆၢလၥ်ယိမဟၤ,ကၠါကလ့တၢ်လီၢ်တၢ်ကျဲတဖၣ်အပူၤန့ၣ်လီၤ.အသုစံၢ်အိၣ်အဆၢကတီၢ်အိးထီၣ်ကျးမၤအီၣ်မၤအီဝဲဒီးပယီၤတခီန့ၣ်,မၢဝဲအပှၤလဲၤမၤဟးဂီၤကွံၥ်ဝဲပှၤကျးသ့ၣ်တဖၣ်ဒီးတဲဝဲလၢမၢပှၤက့ၤအိၣ်က့ၤလၢကြုၢ်တုဝ့ၢ်ပူၤ,ပှၤမ့တက့ၤအိၣ်ဘၣ်န့ၣ်တဲဝဲလၢကဟံကွံၥ်ဝဲအတၢ်လီၢ်တၢ်ကျဲ,တၢ်စုလီၢ်ခီၣ်ခိၣ်ဒီးကမၤဟးဂီၤကွံၥ်ဝဲတၢ်ဖိတၢ်လံၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,သုးကီၣ်ကးမၢဝဲကမျၢၢ်လီၢ်ကဝီၤဖိလၢစံၢ်ထီၣ်တဖၣ်က့ၤအိၣ်ဆိးက့ၤလၢကြုၢ်တုဝ့ၢ်ပူၤဘၣ်ဆၣ်ကမျၢၢ်လီၢ်ကဝီၤဖိတဖၣ်က့ၤအိၣ်ဝဲတဘူၣ်သနါက့,မ့မ့ၢ်လၢသုးကီၣ်ကးဝဲၤကျိၤဝဲၤဒ့ဘၣ်ထွဲပှၤမၤတၢ်ဖိတဖၣ်ဒီးပှၤလၢအဘူးဒီးသုးကီၣ်ကးတဖၣ်တခီက့ၤအိၣ်ဆိးက့ၤဝဲဒၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
ကမျၢၢ်တဖၣ်ကက့ၤအိၣ်ဆိးက့ၤလၢဝ့ၢ်ပူၤအဂီၢ်သုးကီၣ်ကးဘိးဘၣ်ရၤလီၤဆီၣ်တခူဝဲလၢစိၤရှၢၣ်မံးဒံးယၢၣ်အပူၤတဆီအိၣ်ဝဲအသိး,ပၥ်ဖျါဝဲလၢဟ့ၣ်လီၤဝဲတၢ်အီၣ်တၢ်အီတၢ်ဆီၣ်ထွဲမၤစၢၤဆူကမျၢၢ်တဖၣ်အိၣ်ဝဲအဂ့ၢ်,သ့ၣ်ညါဘၣ်ဒ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲအသိးစ့ၢ်ကီးန့ၣ်လီၤ.
တကတီၢ်ဃီ,သုးကီၣ်ကးအံၤစးထီၣ်ဒိၣ်စိက့ၤဝဲကြုၢ်တုကျဲအလီၢ်ခံမၤအါထီၣ်ဝဲဂံၢ်ဘါဆီလီၤဝဲသးဟံဃၥ်ဝဲတၢ်ဘံၣ်တၢ်ဘၢလၢကျဲတဖၣ်အပူၤအိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒ်န့ၣ်အသိး,သုးကီၣ်ကးအံၤလၢကဒိၣ်စိန့ၢ်က့ၤဝဲကြုၢ်တုကျဲအဂီၢ်စးထီၣ်ဖဲလါယူၤလံအပူၤအသုးလၢအိၣ်ဆိးဖဲကြုၢ်တုဟီၣ်ကဝီၤဒ်အမ့ၢ်(ခမရ၅၄၅)ဒီး(ခမရ၅၄၆)ဃုၥ်ဒီးဘိၤဘံၣ်ကရူၢ်ကရၢတဖၣ်ပၥ်ဖှိၣ်သးမၤဝဲတၢ်ထီၣ်ဒုးဒီးဖဲလါယူၤလံ(၂၅)အနံၤအပူၤဒိၣ်စိန့ၢ်က့ၤဝဲအဂ့ၢ်,ပၥ်ဖျါတ့ၢ်ဝဲလၢသုးကီၣ်ကးအတၢ်ကစီၣ်သန့(မၠၤမၣ်အလ့)အပူၤန့ၣ်လီၤ.
