လါယူၤလံ ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်တၢ်ပၢ,လၢၢ်မုၢ်လါကီၢ်ဆၣ်ဟီၣ်ကဝီၤအပူၤဖဲလါယူၤလံ(၂၅)သီ, (၂၆)သီအနံၤန့ၣ်(သုးက့-၄)ကညီဒီကလုၥ်ဂၢၤသးကရၢ(KNDO)ဃုၥ်ဒီးတၢ်ပၢၢ်ဆၢသိၣ်မှံၤသုးပၥ်ဖှိၣ်တဖၣ်နုၥ်လီၤခးဝဲ (ပလးဝ့ၢ်)ပယီၤသုးဒီးပယီၤသုးသံ(၁၇)ဂၤ,ဘၣ်ဒိအဂၤ(၂၀)ဘျဲၣ်အဂ့ၢ်ခ့ၣ်အဲၣ်ယူၣ်ဘျံးဒဝဲၢ်ကီၢ်ရ့ၣ်ပၥ်ဖျါဝဲဖဲအသီ(၃၀)အနံၤန့ၣ်လီၤ.
ပယီၤသုးလၢအအိၣ်ဖဲ(ပလးဝ့ၢ်)ပူၤသ့ၣ်တဖၣ်အံၤခီဖျိကညီဒီကလုၥ်ဂၢၤသးကရၢ(KNDO)သုးရ့ၣ်(၇)ဒီးတၢ်ပၢၢ်ဆၢသိၣ်မှံၤသုးပၥ်ဖှိၣ်နုၥ်လီၤခးဝဲအဃိပယီၤသုးအပှၤသံ(၁၇)ဂၤ,ဘၣ်ဒိ(၂၆)ဂၤအမဲၥ်ညါတၢ်မၤန့ၢ်ဃုၥ်ဝဲပယီၤသုးတၢ်စုကဝဲၤသ့ၣ်တဖၣ်အဂ့ၢ်ဒ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဘျံးဒဝဲၢ်ကီၢ်ရၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲလၢ “ဖဲလါယူၤလံ(၂၆)သီအနံၤန့ၣ်(KNDO)သုးရ့ၣ်(၇)ဒီး(PDF) သုးပၥ်ဖှိၣ်တဖၣ်နုၥ်လီၤခးဝဲဒၣ်(ပလးဝ့ၢ်)လီၤ. ဖဲတၢ်နုၥ်လီၤခးဝဲန့ၣ်ဒုၣ်ဒါသံ(၁၇)ဂၤ, ပပှၤမၤန့ၢ်ဃုၥ်(RPG)တခိၣ်ဒီး အချံ, မၤန့ၢ်စ့ၢ်ကီးကျိဖုၣ်အိၣ်ဝဲလီၤ. သနါက့န့ၣ်ဒုၣ်ဒါတကပၤမၤဆၢက့ၤတၢ်လၢကဘီယူၤလီၤ. ” ဂ့ၢ်စံးဘၣ်ခ့ၣ်အဲး စံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဒ်လံၥ်တၢ်ပၥ်ဖျါအပူၤအသိးန့ၣ်ပယီၤသုးကီၣ်ကးတၢ်စုကဝဲၤလၢတၢ်မၤန့ၢ်ဝဲသ့ၣ်တဖၣ်န့ၣ်မ့ၢ်ဝဲ RPG7 (၁) ခိၣ်, RPG7အချံ (၆) ဖျၢၣ်, MA1ကျိ (၂) ခိၣ်, ကျိဆၣ်ဒၢ (၃) ဘ့ၣ်, ဒီး 9MMကျိဖုၣ် (၁) ခိၣ်သ့ၣ်တဖၣ်အဂ့ၢ်သ့ၣ် ညါဘၣ်န့ၣ်လီၤ.
ခီဖျိတၢ်နုၥ်လီၤခး(ပလးဝ့ၢ်)ပယီၤသုးကီၣ်ကးအဃိပယီၤသုးတကပၤသူက့ၤဝဲကဘီယူၤဟဲတ့ၢ်လီၤမ့ၣ်ပိၢ်ဖဲ(ပလးဝ့ၢ်)အပူၤ(၁၁)ဘျီ, ကွံၥ်လီၤဝဲမ့ၣ်ပိၢ်အဖျၢၣ်(၉၀)တၢ်ကဲထီၣ်သးအံၤဘၣ်သံဝဲကမျၢၢ်အဂၤ(၁၀)အကျါပၣ်ဃုၥ်သီခါ(၂)ပါ ဒီးဘၣ်ဒိအဂၤ(၁၀)အမဲၥ်ညါမၤဟးဂီၤကွံၥ်ဝဲကမျၢၢ်ဟံၣ်အဖျၢၣ်(၄၀)အဂ့ၢ်တၢ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
ဘျံးဒဝဲၢ်ကီၢ်ရ့ၣ်,ကစၢၢ်ဒိၣ်ကီၢ်ဆၣ်အပူၤဖဲလါယူၤလံ(၂၁)သီအနံၤန့ၣ်(KNLA)တၢ်ပၢၢ်ဆၢသုးပၥ်ဖှိၣ်ဒီးပယီၤသုးအပှၤ သ့ၣ်တဖၣ်အဘၢၣ်စၢၤတၢ်ခးလိၥ်သးကဲထီၣ်ဖဲ(ခံတူၤနံၤ)သဝီဃၢၤဒီးပယီၤသုးလၢအိၣ်ဝ့ၢ်တၢ်အဲၣ်သုးကလၢၤပူၤသ့ၣ်တဖၣ်ခးလီၤစၢၤဝဲကျိဖးဒိၣ်အဃိဘၣ်သံစ့ၢ်ကီးဝဲပှၤနီၣ်သိလ့ၣ်ဖိ(၁)ဂၤ,ပှၤလဲၤတၢ်ဖိ(၁)ဂၤဒီးဘၣ်ဒိပှၤလဲၤတၢ်ဖိ(၅)ဂၤဒံးန့ၣ်လီၤ.
