လါအီကူး ၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်,လၢရၤမတံကလံၤထံးဟီၣ်ကဝီၤအပူၤဖဲမဟါလါယူၤလံ(၃၁)သီအ နံၤန့ၣ်သုးကီၣ်ကးကဘီယူၤဟဲတ့ၢ်လီၤန့ၢ်ဝဲအပှၤ(ဂီၤလ့ၤ)ဒုးယၤသုးကလၢၤတၢ်ဘိၣ်ဒီးတၢ်ဘိၣ်အံၤလီၢ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်တကပၤမၤန့ၢ်ဝဲအဂ့ၢ်သ့ၣ်ညါဘၣ်လီၢ်ကဝီၤကညီဖီၣ်စုကဝဲၤကရူၢ်အပှၤဘၣ်မူဘၣ်ဒါအအိၣ်န့ၣ်လီၤ.
ဒ်ဂံၢ်ခီၣ်ထံးတၢ်ကစီၣ်ပၥ်ဖျါဝဲအသိးတၢ်အီၣ်တၢ်အီဒီးကျိချံပှၥ်သၣ်တၢ်ဘိၣ်(၂)ဘိၣ်လၢပယီၤသုးကီၣ်ကးကဘီယူၤဟဲတ့ၢ်လီၤန့ၢ်အပှၤ(ဂီၤလ့ၤ)ဒုးယၤသုးကလၢၤအဂီၢ်အံၤန့ၣ်တၢ်ပၢၢ်ဆၢသုးမၤန့ၢ်ဝဲအဂ့ၢ်သ့ၣ်ညါဘၣ်အသိးမ့ၢ်တၢ်မၤန့ၢ်ဝဲထဲလဲၣ်ခီန့ၣ်တၢ်ပၥ်ဂၢၢ်ပၥ်ကျၢၤတန့ၢ်ဒံးဘၣ်အဂ့ၢ်လီၢ်ကဝီၤကညီဖီၣ်စုကဝဲၤကရူၢ်အပှၤဘၣ်မူဘၣ်ဒါတဂၤစံးဝဲန့ၣ်လီၤ.
“ပနၢ်ဟူလၢတၢ်မၤန့ၢ်ဝဲတၢ်ဘိၣ်ဘၣ်ဆၣ်ပတသ့ၣ်ညါမ့ၢ်ပှဲၤခါလဲၣ်မီၤနီၤ. တၢ်ဘိၣ်န့ၣ်တၢ်မၤန့ၢ်ဝဲလီၤတံၢ်လီၤ. ပယီၤသုး အံၤတၢ်အီၣ်တၢ်အီဒီးကျိချံပှၥ်သၣ်သ့ၣ်တဖၣ်လီၤစှၤဝဲဖးဒိၣ်လံမီၤနီၤ. အဃိန့ၣ်အပှၤဟဲဆှၢန့ၢ်ဝဲဒၣ်လၢ ကဘီယူၤလီၤ. အပှၤဟဲဆှၢန့ၢ်ဝဲဘၣ်ဆၣ်တုၤလၢအသကိးအအိၣ်တနီၤဒီးတုၤလၢပပှၤသုးမုၢ်သံၣ်ဘိအအိၣ်တနီၤလီၤ.” အဂ့ၢ်စံးဝဲဒၣ် န့ၣ်လီၤ.
တၢ်ဘိၣ်လၢလီၢ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်မၤန့ၢ်ဝဲဒီးပၥ်ဖျါထီၣ်ဝဲလၢတၢ်ဂီၤတၢ်ဖှီၣ်ပူၤအသိးန့ၣ်တၢ်ဘိၣ်လၢတၢ်မၤန့ၢ်ဝဲအလိၥ်န့ၣ်တၢ်ကွဲးလီၤပၥ်ဝဲ(၅.၅၆)တၢ်ဘိၣ်တဘိၣ်ဒီး(၈၁ ER)တၢ်ဘိၣ်တဘိၣ်ခဲလၢၥ်(၂)ဘိၣ်အဂ့ၢ်သ့ၣ်ညါဘၣ် ဒ်တၢ်ဂီၤတၢ်ပၥ်ဖျါပူၤအသိးန့ၣ်လီၤ.
ဘၣ်ထွဲဒီးသုးကီၣ်ကးဟဲတ့ၢ်လီၤန့ၢ်ဝဲအပှၤ(ဂီၤလ့ၤ)ဒုးယၤသုးကလၢၤအဂီၢ်တၢ်ဘိၣ်အံၤန့ၣ်ခီဖျိသုးကလၢၤအပူၤတၢ်အီၣ်တၢ်ဒီးကျိချံမျိၥ်သၣ်ဟဲဃံးထီၣ်စ့ၤထီၣ်ဝဲအဃိအပှၤဘၣ်ဟဲတ့ၢ်လီၤန့ၢ်ဝဲတၢ်ဘိၣ်အိၣ်ဝဲအဘျီတဖၣ်အဘျီလံအသိးလၢအကျါတၢ်ဘိၣ်တနီၤန့ၣ်လီၢ်ကဝီၤတၢ်ပၢၢ်ဆၢသုးကရူၢ်မၤန့ၢ်ဝဲအဂ့ၢ်လီၢ်ကဝီၤပှၤဘၣ်မူဘၣ်ဒါတဂၤဃီဝဲန့ၣ်စံးအါထီၣ်ဝဲန့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါယူၤ(၂၆)သီအနံၤန့ၣ်သုးကီၣ်ကးကလံၤကျါကဘီယူၤဟဲတ့ၢ်လီၤန့ၢ်ဝဲအပှၤ(ဂီၤလ့ၤ)ဒုးယၤသုးကလၢၤ(ဒြိ)ဒီးတၢ်အီၣ်တၢ်အီၣ်တၢ်ဘိၣ်တနီၤန့ၣ်လီၢ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်တကပၤမၤန့ၢ်စ့ၢ်ကီးဒံးဝဲအဂ့ၢ်သ့ၣ်ညါဘၣ်လၢဂံၢ်ခီၣ်ထံးတၢ်ကစီၣ်အိၣ်န့ၣ်လီၤ.
(ဂီၤလ့ၤ)ဒုးယၤသုးကလၢၤအပူၤပယီၤသုးအပှၤနီၣ်ဂံၢ်ခဲလၢၥ်ကအိၣ်ဝဲလၢအဂၤ(၃၀၀)အသိးသုးကလၢၤအခိၣ်အဃၢၤတၢ်လီၢ်စ့ၢ်ကီးပယီၤသုး(ကၣ်က့)သုးတၢ်လီၢ်အိၣ်ဝဲ(၄)ခါဒီးတကီၢ်ခါခဲအံၤတၢ်ပၢၢ်ဆၢသုးပၥ်ဖှိၣ်တကပၤကဝီၤတံၥ်ဒီၣ်တဲၥ်ဃၥ်ဝဲတၢ်လဲၤတၢ်က့ၤအကျဲအဃိပယီၤသုးအံၤဟးထီၣ်ဟူးဂဲၤလၢသုးကလၢၤချၢတန့ၢ်ဘၣ်အဂ့ၢ်သ့ၣ်ညါဘၣ်န့ၣ်လီၤ.
