လါအီကူး ၇ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ပယီၤပူၤလၢသုးမီၤစိရိၤအတၢ်လုၢ်သ့ၣ်ခါပတၥ်မၤကမၣ်ပှၤဂ့ၢ်ဝီခွဲးယၥ်ဒ်အမ့ၢ်တၢ်သူကဘီယူၤဒီးကျိဖးဒိၣ်အံၤအဃိ လါယူၤလံတလါအတီၢ်ပူၤ ပိၥ်မုၣ်ဘၣ်သံဝဲ ၆၄ ဂၤ အဂ့ၢ်န့ၣ် ကီၢ်ပယီၤပိၥ်မုၣ်ကရၢ(BWU) ထုးထီၣ်ပၥ်ဖျါဝဲန့ၣ်လီၤ.
ပိၥ်မုၣ်ပိၥ်မၢၤလၢအသံသ့ၣ်တဖၣ်အံၤအါဒၣ်တက့ၢ်န့ၣ် ကဲထီၣ်သးလၢကဘီယူၤဒီးပယီၤသုးခးလီၤကျိဖးဒိၣ်အဃိလီၤအဂ့ၢ်န့ၣ် BWU နဲၣ်ရွဲၣ်သဃဲၤ-၁ မၣ်ဝ့ၤက စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
အဝဲစံးဝဲလၢ“ခီဖျိလၢပယီၤသုးကဘီယူၤတ့ၢ်လီၤမ့ၣ်ပိၢ်ဒီးခးလီၤကျိဖးဒိၣ်အဃိ လၢပျီပူၤန့ၣ်ဘၣ်သ့ၣ်သ့ၣ်ပှၤသံအနီၣ်ဂံၢ်ကအါန့ၢ် အဝဲအံၤဒံး. ဖဲသုးကီၣ်ကးမၤတၢ်ပတုၥ်တၢ်ခးအတီၢ်ပူၤအံၤအဝဲသ့ၣ်ခးလီၤကျိဖးဒိၣ်တလီၢ်လီၢ်လီၤ. စးထီၣ်ဖဲသုးဟံန့ၢ်တၢ်စိတၢ်ကမီၤ အလီၢ်ခံအံၤ မ့ဘၣ်ကွၢ်ဘၣ်ဃးတၢ်လုၢ်သ့ၣ်ခါပတၥ်ပှၤဂ့ၢ်ဝီခွဲးယၥ်အံၤဟဲအိၣ်အါထီၣ်”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်စးထီၣ်လၢသုးဟံန့ၢ်တၢ်စိတကမီၤအတီၢ်ပူၤန့ၣ် ပိၥ်မုၥ်ပိၥ်မၢၤသ့ၣ်တဖၣ်ဖဲတၢ်ဖီၣ်ဒီးသမံသမိးအဝဲသ့ၣ် အခါန့ၣ် ဘၣ်တၢ်မၤစူးမၤဆါမၤပယွဲအီၤတကးဒံးဘၣ်အမဲၥ်ညါဘၣ်တၢ်သူဝဲမုၣ်ခွါသွံၣ်ထံးတၢ်စုဆူၣ်ခီၣ်တကးလၢအဝဲသ့ၣ်ဖီခိၣ် အိၣ်ထီၣ်ဝဲ လၢကျဲအဘိဘိအဂ့ၢ်န့ၣ် BWU စံးအါထီၣ်ဝဲန့ၣ်လီၤ.
ဒ်(BWU)လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် ခီဖျိလၢကျိဖးဒိၣ်ဒီးကဘီယူၤအံၤအဃိ စကဲကီၢ်ခီဒိၣ်ပူၤန့ၣ် ပိၥ်မုၣ်သံ(၂၈)ဂၤ, မါတလ့ကီၢ်ခီဒိၣ် ၉ ဂၤ, မကွ့ကီၢ်ခီဒိၣ် ၃ ဂၤ, ဝ့ၢ်တကူၣ် ၁ ဂၤ ဒီးပကိကီၢ်ခီဒိၣ်ပူၤန့ၣ် ၁ ဂၤ ,ကခၠ့ၣ်ကီၢ်စဲၣ်ပူၤ ၂ ဂၤ, ကရ့ၣ်နံၣ် ၉ ဂၤ, ယိၤဒိၣ်ကီၢ်စဲၣ် ၄ ဂၤ, တလၢၤကီၢ်စဲၣ် ၂ ဂၤ, ကညီကီၢ်စဲၣ် ၁ ဂၤဒီး တနီသရံၣ်ကီၢ်ခီဒိၣ်ပူၤန့ၣ် သံဝဲ ၄ ဂၤန့ၣ်လီၤ.
လၢန့ၣ်အမဲၥ်ညါခီဖျိလၢသုးမီၤစိရိၤအတၢ်လုၢ်သ့ၣ်ခါပတၥ်မၤကမၣ်ပှၤဂ့ၢ်ဝီခွဲးယၥ်အံၤအဃိ ကီၢ်ပယီၤအပူၤပိၥ်မုၣ်ပိၥ်မၢၤလၢအသံတဖၣ် န့ၣ်အကျါပၣ်ဃုၥ်ဝဲပိၥ်မုၣ်(၁၈)နံၣ်ဆူဖီလၥ် ၁၄ ဂၤဒီး ဒ်န့ၣ်အသိးပိၥ်မုၣ်ဘၣ်ဒိဘၣ်ထံးအဂၤ(၈၀)အကျါ ၅ ဂၤန့ၣ် သုးကီၣ်ကးသူဝဲ မုၣ်ခွါသွံၣ်ထံးတၢ်စုဆူၣ်ခီၣ်တကးလၢအဝဲသ့ၣ်ဖီခိၣ်အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
