လါအီကူး ၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)ထံမိၢ်ပှၢ်ဟီၣ်ကဝီၤပူၤ ဖဲမဟါအနံၤန့ၣ် (KTLA)သုးခိၣ် အဲၣ်ခွံ အပှၤခိးခးဝဲ (KNLA)အပှၤအဃိ ဘၣ်ဒိဘၣ်ထံးဝဲ(၄)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ် န့ၣ်လီၤ.
ဖဲမဟါလါအီကူး ၆ သီ ဂီၤခီ ၁၀း၀၀ နၣ်ရံၣ်အဆၢကတီၢ်န့ၣ် (KNLA)တကပၤလၢကလဲၤလီၤဟံန့ၢ်တၢ်ဘံၣ်တၢ်ဘၢအဂီၢ် ဖဲအလဲၤတုၤဖဲဝ့ၢ်တၢ်အဲၣ်-ထံခံကျဲအဘၢၣ်စၢၤ ကဆီဝါသဝီ သီခါဖၠၣ်ဃၢၤအခါန့ၣ် ကီၢ်သူလ့ၤသုးမုၢ်ဒိၣ်(KTLA)လၢအဘၣ် တၢ်တီခိၣ်ရိၣ်မဲအီၤလၢသုးခိၣ်အဲၣ်ခွံအံၤအပှၤတဖၣ် ခိးခးဝဲအဃိတၢ်ဘၣ်ဒိဘၣ်ထံးဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် လံၥ်တၢ်ပၥ်ဖျါအပူၤစံးဝဲန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးဘျီဝဲအံၤန့ၣ် ဘျံးဒဝဲၢ်ကီၢ်ရ့ၣ် နဲၣ်ရွဲၣ်ပဒိၣ်စီၤအဲၣ်နၤ စံးဘၣ်ခ့ၣ်အဲးစံၣ်-ကညီတၢ်ကစီၣ်လၢ “အဝဲသ့ၣ် န့ၣ်ပၥ်ပှၤလၢဒုၣ်ဒါဖးယံၤလံမီၤ.ဝဲဒၣ်န့ၣ်ပဆိမိၣ်လၢကညီဖိကဒဲကဒဲလီၤ.သနါက့အဝဲမ့မၤတၢ်ဒ်အံၤဒုအတမ့ၢ်ပှၤကညီဖိလၢၤဘၣ်.မ့ၢ်ဒၣ်ဒုၣ်ဒါလီၤ.ဒုၣ်ဒါစံးတၢ်န့ၣ်တမ့ၢ်ပှၤကညီကလုၥ်အသးအိၣ်လၢအသးပူၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်စီၣ် န့ၣ်လီၤ.
ဒ်န့ၣ်အသိးဟီၣ်ကဝီၤလၢကဲထီၣ်သးခဲအံၤအပူၤကွံၥ်ဖဲလါယူၤလံ ၂၀ သီအနံၤန့ၣ်စ့ၢ်ကီး (KTLA)ခိးခးဝဲဟီၣ်ကဝီၤ(KNLA) သုးကရူၢ်ဖဲ ထံခံ-ဝ့ၢ်တၢ်အဲၣ်ကျဲကဲ ထီၣ်ဒံးဝဲဒၣ်န့ၣ်လီၤ.
လၢန့ၣ်အမဲၥ်ညါခံခီခံကပၤအဘၢၣ်စၢၤအပူၤကွံၥ် စးထီၣ်လၢတၢ်ဘၣ်ဂံၥ်ဂူၥ်ကဲထီၣ်ဒီအတီၢ်ပူၤအံၤန့ၣ် အိၣ်ထီၣ်ပၢၢ်တုၤလၢ တၢ်သံတၢ်ပှၢ်တၢ်ဘၣ်ဒိဘၣ်ထံး အတပတီၢ်ညါအသိး လၢတၢ်ဂ့ၢ်အဃိစ့ၢ်ကီး ခံခီခံကပၤလိၥ်ဘၢလိၥ်ကွီၢ်ကဒါလိၥ်သးအိၣ်ထီၣ် ဝဲတုၤလၢခဲအံၤန့ၣ်လီၤ.
တကးဒံးဘၣ်သုးခိၣ်အဲၣ်ခွံအံၤ မ့ၢ်ပှၤလၢအထီဒါဝဲခ့ၣ်အဲၣ်ယူၣ် အတၢ်ဖံးတၢ်မၤအဃိ (KNLA)တကပၤဒ်မူဒါအိၣ်အသိးကဘၣ် က့ၤခီၣ်ဆၢခးကဒါဝဲ အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤ စံးအါထီၣ်ဝဲဒ်အံၤန့ၣ်လီၤ.
“ပှၤဘၣ်လဲၤခးအဝဲသ့ၣ်ဝဲဘၣ်မနုၤအဃိလဲၣ်အဝဲၣ်သ့ၣ်ဟဲခိးခးပပှၤ,ဟဲကူၣ်အၢကူၣ်သီပှၤထီဘိလီၤမီၤ.အဃိလၢတၢ်ဘံၣ်တၢ်ဘၢအဂီၢ်န့ၣ်ပှၤကဘၣ်ဆှဲပျီကွံၥ်ဝဲန့ၣ်မ့ၢ်သုးအတၢ်မၤလီၤ.ပှၤဆှဲပျီဒၣ်လဲၥ်န့ၣ်မးအဝဲသ့ၣ်ဟဲမၤထီဘိလီၤ.အဝဲသ့ၣ်မ့စံးလီၤသးဒုးသုးမီၤစိရိၤန့ၣ်ဘၣ်မနုၤအဃိဘၣ်မၤတၢ်မၤအံၤလဲၣ်.အဲၣ်ခွံအတၢ်ပၥ်သးန့ၣ်လီၤဂၥ်ဒ်သိးသုးမီၤစိရိၤအတၢ်ပၥ်သးလီၤ.အထီဒါဝဲပခ့ၣ်အဲၣ်ယူၣ်ကရၢမိၢ်ပှၢ်.”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ဘျံးဒဝဲၢ်ကီၢ်ရ့ၣ်ပူၤ (KTLA)လၢအဘၣ်တၢ်တီခိၣ်ရိၣ်မဲအီၤလၢသုးခိၣ်စီၤနၢၤဒါအံၤ အပှၤအိၣ်ဆီလီၤသးဟူးဂဲၤဝဲ ၃ ဖုဒီး ဖဲန့ၣ်အကျါလီၤဆီဒၣ်တၢ်ဆၣ်ကဆီသုးတြိၤလၢအဘၣ်တၢ်တီခိၣ်ရိၣ်မဲအီၤလၢ သုးခိၣ်အဲၣ်ခွံအံၤဒီး ဟီၣ်ကဝီၤ(KNLA)အဘၢၣ်စၢၤတၢ်ဘၣ်ဂံၥ်ဂူၥ်ကဲထီၣ်တလီၢ်လီၢ်တၢ်ဘှါဆှဲအီၤတန့ၢ်ဝဲဘၣ်တုၤလၢခဲအံၤ န့ၣ်လီၤ.