လါအီကူး ၂၉ သီ, ၂၀၂၅ နံၣ်, ခ့ၣ်အဲးစံၣ်
သုးမီၤစိရိၤအံၤလၢကဟဲထီၣ်ဒိၣ်စိက့ၤကီးတရံး-မၠၣ်ဝတံၣ်အ့ရှါကျဲမုၢ်အဂီၢ် ဟဲထီၣ်မၤအါထီၣ်အသုးဂံၢ်ဘါအါအါဂီၢ်ဂီၢ်ဆူ ကီးတရံးဝ့ၢ် သုးကလၢၤတၢ်လီၢ်သ့ၣ်တဖၣ်အဂ့ၢ်န့ၣ် လီၢ်ကဝီၤကမျၢၢ်လၢအထံၣ်တၢ်ကဲထီၣ်သးအံၤတဖၣ်စံးဘၣ်ခ့ၣ်အဲးစံၣ်-ကညီ တၢ်ကစီၣ် န့ၣ် လီၤ.
ဖဲမဟါလါအီကူး ၂၈ သီဂီၤခီအဆၢကတီၢ်န့ၣ် ပယီၤသုးသိလ့ၣ်အခိၣ်(၄၀)ဃၣ်ဃၣ်ဟဲထီၣ်ဝဲဆူ ကီးတရံး ခီၣ်သုးရ့ၣ်(ခလရ-၉၇) တၢ်လီၢ်ဒီး ဒ်န့ၣ်အသိးလၢဖၣ်အၣ်ဝ့ၢ်အံၤတဆီ ပယီၤသုးသိလ့ၣ်အခိၣ်(၁၀)ဃၣ်ဃၣ်ဟဲထီၣ်တုၤလၢကီးတရံးဝ့ၢ်ဃၢၤ (စကခ-၁၂) သုးကလၢၤ တၢ်လီၢ်အဂ့ၢ်န့ၣ် လီၢ်ကဝီၤကမျၢၢ်တဂၤ စံးဝဲဒ်အံၤန့ၣ်လီၤ.
“လၢဂီၤခီဂီၤဂီၤန့ၣ်ပယီၤသုးအသိလ့ၣ်တဖၣ်ဖၠးဃီၤဝဲကြုၢ်တု.လဲၤထီၣ်ဆူ(စကခ-၁၂)ဒီးကီးတရံး ခီၣ်သုးရ့ၣ်(ခလရ-၉၇)တကပၤန့ၣ် သိလ့ၣ်လဲၤထီၣ်ကအိၣ်လၢအခိၣ်(၅၀)ဘျဲၣ်ညါဒီးသုးနီၣ်ဂံၢ်ကအိၣ်လၢအဂၤ(၅၀၀)ဃၣ်ဃၣ်ညါ.ဒြိကရူၢ်,ကျိဖးဒိၣ်သုးတဖၣ်ပၣ်လီၤ.” အဂ့ၢ်န့ၣ် လီၢ်ကဝီၤကမျၢၢ်လၢအသ့ၣ်ညါတၢ်အိၣ်သးတဂၤ စံးဝဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါဖဲမဟါ ၉ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး ကီးတရံး ပယီၤသုး(ခလရ-၉၇)သုးရ့ၣ်ဒီးလဲၤဝၣ်အမျိၥ် သုးခးလီၤဝဲ ကျိဖးဒိၣ်တဖၣ်ဆူ ကီးတရံး-မၠၣ်ဝတံၣ် အ့ရှါကျဲမုၢ်သီဒီးတီနီၢ်ကျဲလီၢ်လံၤတကပၤအဂ့ၢ်န့ၣ် ကီးတရံးခိၣ်ဃၢၤကမျၢၢ်တဂၤ စံးဝဲန့ၣ်လီၤ.
“ဖဲဂီၤဃီ ၉ နၣ်ရံၣ်န့ၣ်ပနၢ်ဟူကျိဖးဒိၣ်ကလုၢ်သီလီၤ. ပယီၤသုးလၢအိၣ်လဲၤဝၣ်တကပၤနါက့ခးလီၤကျိဖးဒိၣ်စ့ၢ်. လၢယီၢ်ကိၥ် တကပၤ န့ၣ်တၢ်ဒုးကဲထီၣ်.ဘၣ်ဆၣ်မ့မ့ၢ်လၢအ့ရှါကျဲတကပၤခီဒုခီဖျိအိၣ်ယံၤဒီးဝ့ၢ်အဃိကျိသီန့ၣ်ပတနၢ်ဟူဘၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
သုးမီၤစိရိၤအံၤ ဖဲအပူၤကွံၥ်လါယူၤလံ ၂၆ သီအနံၤန့ၣ် ဘိးဘၣ်ရၤလီၤစံးဝဲလၢကထီၣ်ဟံန့ၢ်ဒိၣ်စိက့ၤကီးတရံး-မၠၣ်ဝတံၣ်အ့ရှါ ကျဲမုၢ် အံၤအိၣ်ဝဲဒီး တကးဒံးဘၣ်တၢ်ကစီၣ်စ့ၢ်ကီးဟးထီၣ်လၢအသီ(၉၀)အတီၢ်ပူၤသုးမီၤစိရိၤတိၥ်ပၥ်ဝဲလၢကထီၣ်မၠၣ်ဝတံၣ်ဝ့ၢ်တုၤအန့ၢ် ဘၣ်ဆၣ် ဘၣ်ဃးတၢ်ဂ့ၢ်အံၤတၢ်ပၥ်ဂၢၢ်ပၥ်ကျၢၤဝဲတန့ၢ်ဒံးဘၣ်န့ၣ်လီၤ.
