လါစဲးပထ့ဘၢၣ် ၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ်ပူၤ လၢကတ့ထီၣ်သီခါဖၠၣ်အဂီၢ်သီခါဃုၥ်ဒီးအပျဲၢ်အဘီၣ် (အတကၢ်)ထၢစ့လၢလီၢ်ကဝီၤကမျၢၢ်အအိၣ်ဘၣ်ဆၣ် ခဲအံၤစ့လၢကမျၢၢ်ဟ့ၣ်လီၤဝဲတဖၣ်တၢ်က့ၤဟ့ၣ်ကဒါဝဲခဲလၢၥ်လံ အဂ့ၢ်န့ၣ် လီၢ်ကတီၤကမျၢၢ်စံးဝဲအသိးသ့ၣ်ညါဘၣ်န့ၣ်လီၤ.
ဝၣ်တရဲၢ်သဝီပူၤ သီခါဖၠၣ်လီၢ်လံၤလၢတၢ်တ့ထီၣ်ဃၥ်အီၤန့ၢ်အနံၣ်လၢအဆံအံၤလၢတၢ်တၢ်ကရိၢ်လီၤတ့ထီၣ်က့ၤအီၤလၢအသီအဂီၢ် ဖဲအပူၤကွံၥ်နွံအခါသီခါတီခိၣ်ရိၣ်မဲထၢဝဲစ့လၢ ဝၣ်တရဲၢ်သဝီဖးဒိၣ်,သဝီဖိ,နီဖးဒိၣ်,နိရါ,ဖှ့ဒူကူ,ထံဃီဝါသဝီပူၤ ဟံၣ်တဖျၢၣ် (၇၀၀,၀၀၀)ကၠးန့ၣ်လီၤ.
ဘၣ်ဃးတၢ်စ့ဘျီဝဲအံၤတမ့ၢ်တၢ်ဆၢကတီၢ်လၢအကြၢးဝဲဘၣ်ဝဲဘၣ်အဃိ လီၢ်ကဝီၤကမျၢၢ်တဖၣ် အါဒၣ်တက့ၢ်တတူၢ်လိၥ်ဝဲ တၢ်ဂ့ၢ်အံၤဘၣ်ဘၣ်ဆၣ်တဲဝဲတဘူၣ်ဘၣ်အဖီခိၣ် လၢတၢ်တသ့တဘၣ်ဘၣ်အပူၤထၢနုၥ်လီၤစ့အိၣ်တနီၤ အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဆၣ်ဖဲလါအီကူး ၃၀ သီအနံၤန့ၣ် ဘၣ်ဃးတၢ်ဂ့ၢ်အံၤ သီခါအပျဲၢ်အဘီၣ်တဖၣ်မၤဝဲတၢ်အိၣ်ဖှိၣ်ဝံၤ စ့လၢကမျၢၢ်ဟ့ၣ်လီၤဃၥ်ဝဲ တဖၣ်က့ၤဟ့ၣ် တၢ်က့ၤဟ့ၣ်ကဒါဝဲစ့ခဲလၢၥ်အဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဂၤစံးဘၣ်ခ့ၣ်အဲးစံၣ်-ကညီတၢ် ကစီၣ်ဒ်အံၤ န့ၣ်လီၤ.
“အခဲအံၤစ့လၢအဝဲသ့ၣ်ထၢဝဲန့ၢ်တဖၣ်န့ၣ်သီခါက့ၤဆှဲက့ၤဟ့ၣ်ကဒါဝဲလၢၤလံ.စ့န့ၣ်အထၢဝဲန့ၢ်ဆံးအါလဲၣ်န့ၣ်တသ့ၣ်ညါဘၣ်,ဘၣ်ဆၣ်ဖဲသဝီပူၤအံၤယသံကွၢ်ပှၤက့ၤဟ့ၣ်ကဒါဝဲသ့ၣ်စ့လၢၤလံ.အဝဲသ့ၣ်မၤတၢ်န့ၣ်တလိၤတဃီၤဘၣ်မ့ၢ်စ့ၢ်.မ့ဝံၤဒီးလၢပှၤတဲတၢ်တဂၤ န့ၣ်ခီန့ၣ်တၢ်ကတိၤဆူၣ်အဃိအဝဲသ့ၣ်ကနၣ်ဝဲတမုၥ်ဘၣ်ကမ့ၢ်ဒ်န့ၣ်လီၤ”အဂ့ၢ်န့ၣ် စံးဝဲန့ၣ်လီၤ.
ဘၣ်ဃးဝၣ်တရဲၢ်သီခါက့ၤဟ့ၣ်ကဒါကမျၢၢ်စ့ဒ်အံၤ ကဘၣ်ထွဲလိၥ်အသးဖဲအပူၤကွံၥ်နွံလါအီကူး ၂၁ သီ တၢ်ကစီၣ်ရၤလီၤ သးဘၣ်ဃးတၢ်ဂ့ၢ်အံၤအဃိ တၢ်အိၣ်သးဘၣ်ဆီတလဲဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါဒီးကမျၢၢ်လၢ အိၣ်ဘူးဖဲန့ၣ်တဖၣ်ပဲၥ်ထံနီၤဖး စံးဝဲန့ၣ်လီၤ.
တကီၢ်ခါခဲအံၤစ့လၢကမျၢၢ်ထၢနုၥ်ဝဲတဖၣ်တၢ်က့ၤဟ့ၣ်ကဒါဝဲလံဘၣ်ဆၣ် မ့မ့ၢ်လီၢ်ကဝီၤကမျၢၢ်လၢအဟ့ၣ်ထီၣ်တၢ်ကစီၣ်တဂၤအံၤ တၢ်ကဆဲးလူၤဃိထံသမံးသမိးဃုသ့ၣ်ညါဝဲအဂ့ၢ်န့ၣ် ကမျၢၢ်ပိၥ်မုၣ်လၢအိၣ်ဖဲန့ၣ်တဂၤစ့ၢ်ကီးစံးဝဲန့ၣ်လီၤ.
အဝဲစံးဝဲလၢ“ပှၤက့ၤဟ့ၣ်ကဒါစ့လံတၢ်မၢၤပှၤတဲပၠးတၢ်ဖိတဂၤန့ၣ်အဝဲသ့ၣ်ကဟးလူၤဃုသ့ၣ်ညါဝဲဒံး.အဝဲသ့ၣ်ဟးလူၤဃုပှၤတဲတၢ်ဖိတဂၤန့ၣ်မ့ဘၣ်န့ၣ်မ့ၢ်အဝဲသ့ၣ်ကမၤဝဲဒ်လဲၣ်ဒုတသ့ၣ်ညါဘၣ်.ပှၤတဲတၢ်ဒုအဘၣ်ကအိၣ်,အကမၣ်ကအိၣ်လီၤဘၣ်ဆၣ်နမ့ဟံ န့ၢ်အီၤလၢအရ့ဒုမၤသ့ဝဲလဲၣ်တၢ်တဖၣ်အံၤ.တၢ်မၢအတဲတၢ်န့ၣ်ဖျါကြၢၢ်ကလၤလီၤလၢပှၤတဲတၢ်ဖိတဂၤန့ၣ်ကလူၤဃုသ့ၣ်ညါက့ၤဝဲ” အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤကမျၢၢ်လၢအိၣ်ဖဲန့ၣ်တဖၣ်စံးဝဲအသိးန့ၣ် သီခါဖၠၣ်လၢတၢ်ကရိၢ်လီၤတ့ထီၣ်အီၤလၢအသီအံၤ အဟးဂီၤတအိၣ်ဘၣ်ဒီး ဒ်န့ၣ်အသိးတၢ်ထၢစ့အကတီၢ်အံၤတၢ်ဒုးတၢ်ယၤတၢ်အိၣ်သးအမဲၥ်ညါလၢမုၢ်ကျိၤဝဲၤကွၥ်တၢ်လုၢ်အီၣ် နီၢ်ခိသးသမူအဂီၢ်စ့ၢ်ကီး ကမျၢၢ်တဖၣ်ဘၣ်ကွၢ်ဆၢၣ်မဲၥ်ဝဲတၢ်ဃံးတၢ်စ့ၤတၢ်ဂ့ၢ်ကီအကလုၥ်ကလုၥ်န့ၣ်လီၤ.
ခီဖျိလၢတၢ်ဃံးတၢ်စ့ၤတၢ်အိၣ်သးသ့ၣ်တဖၣ်အံၤအဃိ ကျိၣ်စ့တၢ်လၢၤဘူၣ်လၢၤစ့အကလီၢ်လွံၢ်ကထိကၠးလၢတၢ်တိၥ်လီၤဝဲလၢ ကတ့ထီၣ်သီခါဖၠၣ်အံၤ ကဲထီၣ်ဝဲတၢ်ကီတၢ်ခဲလၢကမျၢၢ်အဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဝၣ်တရဲၢ်သဝီၤအံၤအိၣ်ဝဲလၢခ့ၣ်အဲၣ်ယူၣ်(သုးက့ ၁)ဖၣ်အၣ်ကီၢ်ဆၣ်အပူၤဘၣ်ဆၣ် ဘၣ်ဃးတၢ်ရဲၣ်တၢ်ကျဲၤအိၣ်လၢတၢ်ကတ့ ထီၣ်သီခါဖၠၣ်တၢ်ထၢစ့လၢသဝီသ့ၣ်တဖၣ်အံၤအပူၤန့ၣ် တၢ်ဒုးသ့ၣ်ညါကီၢ်ဆၣ်ပှၤဘၣ်မူဘၣ်ဒါတအိၣ်ဝဲဘၣ်အသိး ဒူသဝီတၢ်လီၢ် အခိၣ် အဃၢၤဖဲန့ၣ်ဘူးဒးကညီ သုးမုၢ်ဒိၣ်(DKBA)သုးခိၣ်ဘိၤဘံၣ်အပှၤဟူးဂဲၤအိၣ်ဆီလီၤအသးအိၣ်ဝဲအဂ့ၢ်န့ၣ် သ့ၣ်ညါဘၣ်လၢ ကမျၢၢ်အအိၣ်န့ၣ်လီၤ.
လၢန့ၣ်အမဲၥ်ညါသဝီအံၤ မ့ၢ်စ့ၢ်ကီးဝဲ (DKBA)သုးခိၣ် စီၤခၠ့ၣ်သါ လၢအပူၤကွံၥ်မ့ၢ်တ့ၢ်ဝဲသုးမီၤစိရိၤ အဂၢၤကီၢ်သုး(ပြည်သူ့စစ်)အံၤ အသဝီဒီး ကၠီတလူၢ်သဝီ ဃိကီးတၢ်လီၢ်လၢအိၣ်ဘူးဝဲဝၣ်တရဲၢ်သဝီအံၤ (DKBA)အတြဲၤတၢ်သမံသမိးလီၢ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိဟီၣ်ကဝီၤဖဲန့ၣ်အပူၤ (DKBA)သုးခိၣ်ဘိၤဘံၣ်အပှၤလၢအိၣ်ဆီလီၤသးဖဲန့ၣ်တဖၣ်ဒီး ဟီၣ်ကဝီၤကညီ ဒီကလုၥ် တၢ်ထူၣ်ဖျဲးသုးမုၣ်ဒိၣ်(KNLA) သုးရ့ၣ်-၁ အဘၢၣ်စၢၤ တၢ်ဘၣ်ဂံၥ်ဂူၥ်ကဲထီၣ်ဝဲတလီၢ်လီၢ်န့ၣ်လီၤ.
