လါအီကူာ်(၂၈)သီ, ၂၀၂၅နံၣ်.
ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်(သုးက့-၄)တၢ်ပၢ,ကစၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲလါအီကူၥ်(၂၅)သီအနံၤန့ၣ်ပယီၤ မီၤစိရိၤမၤဝဲသုးကျိၤတၢ်ထီၣ်ဒုးအဆၢကတီၢ်နုၥ်လီၤဒွဲၣ်အူအီၣ်ကွံၥ်ဝဲဒၣ်ကမျၢၢ်ပှၤသဝီဖိအဟံၣ်(၇၆)ဖျၢၣ်ဒီးမၤသံကွံၥ်ဝဲပှၤသဝီဖိ(၂)ဂၤအဂ့ၢ်ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဖဲလါအီကူၥ်(၂၈)သီမဟါအနံၤန့ၣ်လီၤ.
ဘၣ်ထွဲဒီးတၢ်ကဲထီၣ်အသးအံၤန့ၣ်ပယီၤသုးမီၤစိရိၤလၢအအိၣ်(သယဲးခၠီ)ဝ့ၢ်သ့ၣ်တဖၣ်မၤဝဲသုးကျိၤတၢ်ထီၣ်ဒုးစးထီၣ်လၢ(စီဃ့တိၢ်ပြိး)ဟီၣ်ကဝီၤဒီးတုၤလီၤလၢ(စီၣ်ဖၠါ)သဝီဒီးမိရွ့ၣ်ကူသဝီအဆၢကတီၢ်သုးမီၤစိရိၤအံၤဒွဲၣ်အူအီၣ်ကွံၥ်ဝဲ(စီၣ်ဖၠါ)သဝီဖိဟံၣ်အဖျၢၣ်(၆၀),မိရွ့ၣ်ကူသဝီဖိဟံၣ်(၁၆)ဖျၢၣ်အဂ့ၢ်ဒ်လံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
တၢ်ပၢၢ်ဆၢဖိလၢအိၣ်တၢ်မဲၥ်ညါတဂၤစံးဝဲဒၣ် “ဖဲပယီၤသုးမီၤစိရိၤအသုးကျိၤဟဲထီၣ်အဆၢကတီၢ်န့ၣ်ဒူသဝီလၢအမ့ၢ် (စီၣ်ဖၠါ)သဝီန့ၣ်ပယီၤသုးဒွဲၣ်အူကွံၥ်ဝဲဒၣ်သဝီဖိဟံၣ်အဖျၢၣ်(၆၀)န့ၣ်လီၤ. မ့မ့ၢ်လၢ(မိရွ့ၣ်ကူ)သဝီန့ၣ်(၁၆)ဖျၢၣ်မီၤ နီၤ. ခဲလၢၥ်န့ၣ်ဒွဲၣ်အူဝဲဒၣ်(၇၆)ဖျၢၣ်န့ၣ်လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါပယီၤသုးကီၣ်ကးအံၤမၤသံကွံၥ်စ့ၢ်ကီးဝဲဒၣ်(မိရွ့ၣ်ကူ)သဝီဖိ(၂)ဂၤဆှုၣ်မဲၥ်ကဲၤမဲၥ်ဖဲ(မိရွ့ၣ်ကူ)သဝီအသီခါဖၠၣ်ကရၢၢ်အပူၤဒီးဘၣ်တၢ်မၤသံအီၤအခါဖဲလဲၣ်န့ၣ်တၢ်တသ့ၣ်ညါအီၤလီၤတံၢ်ဒံးဘၣ်အသိးကတီၢ်ခါခဲအံၤဘၣ်တၢ်မၤလီၤတံၢ်အမံၤ,သးနံၣ်အဖၢမုၢ်ဒံးလီၤအဂ့ၢ်လီၢ်ကဝီၤတၢ်မဲၥ်ညါပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ကစၢၢ်ဒိၣ်ကီၢ်ဆၣ်ဟီၣ်ကဝီၤအပူၤအံၤပယီၤဟူးဂဲၤဆှၢထီၣ်ဆှၢလီၤဝဲအပှၤသုးဖိ,တၢ်အီၣ်တၢ်အီဒီးမၤဝဲသုးကျိၤတၢ်ထီၣ်ဒုးစ့ၢ်ကီးအိၣ်ဝဲဒၣ်န့ၣ်လီၤ.
ဒ်န့ၣ်အသိးမ့ၢ်ဘၣ်ကွၢ်က့ၤဝဲကစၢၢ်ဒိၣ်ကီၢ်ဆၣ်အပူၤဖဲလါအီကူၥ် ၁၈, ၁၉, ၂၀ သီအနံၤန့ၣ်(KNLA)ဒီးတၢ်ပၢၢ်ဆၢသုး ပၥ်ဖှိၣ်ခိးခးဝဲပယီၤမီၤစိရိၤသုးကျိၤလၢကဟဲထီၣ်ဆူဝ့ၢ်တၢ်အဲၣ်ဒီးကၠီၣ်မဲဒီၣ်သ့ၣ်တဖၣ်အဖီခိၣ်တၢ်မၤန့ၢ်ဝဲပယီၤသုးကျိချံပှၥ်သၣ်အါအါဂီၢ်ဂီၢ်အမဲၥ်ညါပယီၤသုးသံ(၂၀)ဃၣ်ဃၣ်ဒီးတၢ်ဖီၣ်မူဒံးန့ၢ်ဝဲ(၃)ဂၤအဂ့ၢ်လီၢ်ကဝီၤဘၣ်မူဘၣ်ဒါစံးဝဲန့ၣ်လီၤ.
