လါအီကူး ၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မူကီၢ်ဆၣ်ဒီးလၢၢ်ဒိၣ်ကီၢ်ဆၣ်ခံဘ့ၣ်အံၤအပူၤ ခီဖျိထံဒိၣ်ဃိၣ်ယွၤအံၤအဃိ ဟံၣ်ခိၣ် (၁၆၀၀၀)ဘျဲၣ်လိၣ်ဘၣ်ဝဲဂ့ၢ်ဂီၢ်အူတၢ်ဆီၣ်ထွဲမၤစၢၤအဂ့ၢ်န့ၣ် ကီၢ်ဆၣ်ခံဘ့ၣ်ဘၣ်ထွဲကညီဂ့ၢ်ဂီၢ်အူတၢ်တိစၢၤမၤစၢၤကရူၢ် ထုးထီၣ် ပၥ်ဖျါဝဲန့ၣ်လီၤ.
ဒ်မူကီၢ်ဆၣ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် စးထီၣ်ဖဲလါယူၤလံ ၂၃ သီအနံၤ တၢ်စူၤတပယူၥ်ဃီဒီးထံဒိၣ်ထီၣ်ဝဲလၢ ဟီၣ်ကဝီၤ တၢ်လီၢ်သကုၤဆးဒးအပူၤန့ၣ်လီၤ. အဃိလၢထံဒိၣ်ဃိၣ်ယွၤအံၤအဖီခိၣ် ဒူသဝီပၥ်ဖှိၣ်(၁၀၆)ဖျၢၣ်, ဟံၣ်ခိၣ် (၁၁,၃၇၇) ဖျၢၣ်, ပှၤနီၣ်ဂံၢ် (၆၁,၇၈၇)ဂၤဘၣ်သုးလီၢ်သုးကျဲဒီး ကၠိဘၣ်ပံးသး(၁၈)ဖျၢၣ် န့ၣ်လီၤ.
တကးဒံးဘၣ်ခီဖျိလၢထံဒိၣ်ဃိၣ်ယွၤဟီၣ်ခိၣ်လၥ်အံၤအဃိ ဟံၣ်လီၤထွံကွံၥ်ဝဲ(၁၆)ဖျၢၣ်လီၤဒီးကမျၢၢ်ဘၣ်ဒိဝဲ(၂)ဂၤအသိး စံၥ်လီၢ်ပၥ်ဖှိၣ်(၄,၂၅၀)အ့ကၢၣ်လီၤဘျၢဝဲလၢထံကျါအဂ့ၢ်န့ၣ် စံးဝဲန့ၣ်လီၤ.
လၢတၢ်န့ၣ်အဃိဒူသဝီကမျၢၢ်လၢအသဂၢၢ်ဘၣ်ထံဒိၣ်ဃိၣ်ယွၤအံၤတဖၣ်အဂီၢ် လိၣ်ဘၣ်ဝဲဂ့ၢ်ဂီၢ်အူတၢ်ဆီၣ်ထွဲမၤစၢၤအဖီခိၣ် ကီၢ်ပူၤကီၢ်ချၢဘၣ်ထွဲကရူၢ်ကရၢတဖၣ်ကဆီၣ်ထွဲမၤစၢၤသကိးဘၣ်တၢ်လိၣ်ဘၣ်အံၤအဂ့ၢ်န့ၣ် မူကီၢ်ဆၣ်ဂ့ၢ်ဂီၢ်အူတၢ်တိစၢၤမၤစၢၤ ကမံးတံၥ် ဃ့ထီၣ်ဝဲဒၣ်န့ၣ်လီၤ.
ဒ်န့ၣ်အသိးလၢလၢၢ်ဒိၣ်ကီၢ်ဆၣ်အပူၤစ့ၢ်ကီး လၢတၢ်စူၤထံဒိၣ်ဃိၣ်ယွၤအံၤအဃိ ဒူသဝီ(၈၀)ဖျၢၣ်, ဟံၣ်ခိၣ် (၅,၄၉၅)ဖျၢၣ်, ပှၤနီၣ်ဂံၢ်(၂၈,၁၆၂)ဂၤသဂၢၢ်ဘၣ်ဝဲထံဒိၣ်ဃိၣ်ယွၤတၢ်ကီတၢ်ခဲအံၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဘၣ်ဆၣ်လၢၢ်ဒိၣ်ကီၢ်ဆၣ်ပူၤ ဒူသဝီလၢတၢ်ပၥ်ဖျါထီၣ်ဝဲ(၈၀)အကျါလီၤဆီဒၣ်တၢ်သဝီ(၈)ဖျၢၣ်ဃၣ်ဃၣ်ပူၤကမျၢၢ်တဖၣ် သဂၢၢ်ဘၣ်ထံဒိၣ်ဃိၣ်ယွၤအမဲၥ်ညါ ပှၤသ့ၣ်တဖၣ်အံၤအိၣ်လၢသဝီပူၤတဘူၣ်ဘၣ်ဟးအိၣ်ကဒုသး လၢတၢ်ဘံၣ်တၢ်ဘၢအလီၢ် ကအိၣ်လၢ(၃)နံၣ်လံအဃိ လိၣ်ဘၣ်ဝဲဂ့ၢ်ဂီၢ်အူတၢ်အီၣ်တၢ်အီ,တၢ်ခိၣ်ဒုး,ကသံၣ်ကသီသ့ၣ်တဖၣ်အဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါ စံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ လၢၢ်ဒိၣ်ကီၢ်ဆၣ် ကညီဂ့ၢ်ဂီၢ်အူတၢ်တိစၢၤမၤစၢၤကမံးတံၥ် ပှၤကတိၤတၢ်ပၢ စီၤအဲၣ်ကီၢ်တီ စံးဝဲလၢ “ဘၣ်ဃး ထံဒိၣ်ဒုထံဒိၣ်လၢတၢ်လီၢ်ပူၤဒဲးလီၤ.ဘၣ်ဆၣ်လီၤဆီဒၣ်တၢ်လၢထံရူၢ်ကီၢ်သဲးအတၢ်ဂ့ၢ်ကီ,တၢ်ဒုးတၢ်ယၤကဲထီၣ်အဃိဘၣ်ဃ့ၢ်မှံဟးဖျိးတနီၤ,တအိၣ်ဘၣ်လၢဒူသဝီပူၤဘၣ်တနီၤမီၤ.အဝဲသ့ၣ်ဘၣ်ဟးအိၣ်လၢစံၥ်ပျီတၢ်ခိၣ်တၢ်ဃၢၤဒ်န့ၣ်.ခဲအံၤမူခိၣ်စူၤထံဒိၣ်ထီၣ်အဃိအဝဲသ့ၣ်ဘၣ်ကွၢ်ဆၢၣ်မဲၥ်တၢ်အါန့ၢ်ပှၤအဂၤဒံးမီၤနီၤ.ဖဲလၢၢ်ဒိၣ်ကီၢ်ဆၣ်ပူၤအံၤဒူသဝီကအိၣ်ဝဲ(၈)ဖျၢၣ်,(၉)ဖျၢၣ်ညါလၢအသဂၢၢ်ဘၣ်တၢ်အံၤန့ၣ်.ပက့ၤကွၢ်ကဒါက့ၤအဝဲသ့ၣ်လၢဟံၣ်ဖိဃီဖိတၢ်လိၣ်နီၢ်နီၢ်န့ၣ်မ့ၢ်ဝဲအိၣ်ဆိးလီၢ်ကျဲ,တၢ်အီၣ်တၢ်အီ,တၢ်အိၣ်ဆူၣ်အိၣ်ချ့ဒီးတကးဒံးဘၣ်တၢ်ကူၣ်ဘၣ်ကူၣ်သ့တကပၤစ့ၢ်ကီးကဲထီၣ်တၢ်ဂ့ၢ်ကီ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
ဒ်န့ၣ်အသိးမူကီၢ်ဆၣ်အမဲၥ်ညါလၢၢ်ဒိၣ်ကီၢ်ဆၣ်အပူၤ ခီဖျိလၢထံဒိၣ်ဃိၣ်ယွၤအံၤအဃိ ကၠိတၢ်သူၣ်ထီၣ်(၃၇)ဖျၢၣ် လီၤဘျၢလၢ ထံကျါဒီး ပှၤကၠိဖိ(၂,၇၄၈)ဂၤအံၤတၢ်ကီတၢ်ခဲအိၣ်လၢကဖံးလိမၤဒိးတၢ်အဂ့ၢ်န့ၣ် လံၥ်တၢ်ပၥ်ဖျါအပူၤလံၥ်ဖျါဝဲန့ၣ်လီၤ.
ကီၢ်ကၠီၣ်တဲၣ်ဒီးကီၢ်ပယီၤတၢ်လီၢ်အါတီၤအပူၤစးထီၣ်ဖဲလါယူၤလံ ၂၀ သီဃၣ်ဃၣ်အခါန့ၣ်တၢ်စးထီၣ်စူၤဝဲလၢကိးမုၢ်နံၤဒဲး ဃၣ်ဃၣ်အဃိ ချၢၣ်လွံၢ်ထူၣ်ကီၢ်ရ့ၣ်အမဲၥ်ညါ ကီၢ်ရ့ၣ်/သုးက့ လၢအဂၤသ့ၣ်တဖၣ်ကိးဘ့ၣ်ဒဲးဃၣ်ဃၣ် ဒူသဝီကမျၢၢ်လၢအိၣ် ဘူးထံကျိအံၤသ့ၣ်တဖၣ်သဂၢၢ်ဘၣ်ဝဲ ထံဒိၣ်ဃိၣ်ယွၤဘၣ်သုးလီၢ် သုးကျဲဝဲအါအါဂီၢ်ဂီၢ်န့ၣ်လီၤ.
