လါအီကူး ၁၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်(သုးက့ ၇)လီၢ်ခၢၣ်သးလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်တရံးထံဝၢ်ခီအံၤ သုးမီၤစိရိၤအကဘီယူၤ (Y-12)လဲၤ တ့ၢ်လီၤမ့ၣ်ပိၢ်ဝံၤလီၢ်ခံ တုၤလၢခဲအံၤကဘီယူၤတၢ်လီၤဘၣ်ယိၣ်အိၣ်ဒံးအဃိ လီၢ်ကဝီၤကမျၢၢ်လၢအဃ့ၢ်ထီၣ်တဖၣ် က့ၤဆူအဟံၣ် တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်တလါအံၤလါအီကူး ၁၀ သီ ဟါခီ ၈း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ် သုးမီၤစိရိၤအကဘီယူၤတဘ့ၣ် လဲၤတ့ၢ်လီၤ ဝဲမ့ၣ်ပိၢ်(၂၀)ဘျဲၣ်လၢ(သုးက့ ၇)ကျိၣ်ယီၢ်လ့ သုးဝဲၤလီၢ်ခိၣ်သ့ၣ်တၢ်လီၢ်အခိၣ်အဃၢၤအဖီခိၣ် ကျိၣ်ယီၢ်လ့ကမျၢၢ်ဃုၥ်ဒီးကမျၢၢ်လၢအိၣ် မီၤပၢၤခိၣ်, ကျီၢ်ကရၢ,ခိရံယါတၢ်ဆါဟံၣ်,သ့ၣ်ဘ့ၣ်ထၣ်,မုၣ်အ့ပူၤသ့ၣ်တဖၣ် ပှၤနီၢ်ဂံၢ်လၢအကထိ ဃ့ၢ်ထီၣ်တဲဆူကီၢ်ကၠီၣ်တဲၣ်တကပၤ န့ၣ်လီၤ.
လီၢ်ကဝီၤကမျၢၢ်ဃုၥ်ဒီးပှၤကၠိဖိလၢအဃ့ၢ်ထီၣ်သ့ၣ်တဖၣ်အံၤ တနီၤန့ၣ်လဲၤအိၣ်ဝဲလၢအဘူးအတံၢ်အသမူသကိးဟံၣ်အိၣ်ဝဲဒီး တနီၤန့ၣ်ကၠီၣ်တဲၣ်ပှၤဘၣ်မူဘၣ်ဒါဆီလီၤပၥ်လီၤန့ၢ်အလီၢ်အကျဲပျဲအိၣ်ကဒုဝဲဖဲမဲၢ်တရံးသီခါဖၠၣ်ကရၢၢ်ပူၤစ့ၢ်ကီးအိၣ်ဝဲဒၣ်န့ၣ်လီၤ.
ခဲအံၤအဝဲသ့ၣ်ဟးစံၣ်ပလဲၥ်သးတၢ်ဆၢကတီၢ်န့ၢ်(၄)သီလံဘၣ်ဆၣ် (သုးက့ ၇)သုးဝဲၤလီၢ်ခိၣ်သ့ၣ်တၢ်လီၢ်ဒီတကျိၤ လၢအဝဲသ့ၣ် အိၣ်ဆိးလီၢ်ကျဲန့ၣ် တၢ်ကစီၣ်ဟးထီၣ်လၢကဘီယူၤကဟဲခးလီၤဒံးတၢ်ဒီး ခ့ၣ်အဲၣ်ယူၣ်ပှၤဘၣ်မူဘၣ်ဒါတကပၤစ့ၢ်ကီး ဒုးသ့ၣ်ညါ လီၤကမျၢၢ်လၢကသုးလီၢ်သုးကျဲအိၣ်လၢတၢ်ဘံၣ်တၢ်ဘၢလီၢ်အဃိ ကမျၢၢ်က့ၤဆူဟံၣ်တဘူၣ်ဒံးဘၣ်အမဲၥ်ညါကၠိစ့ၢ်ကီးဘၣ်တၢ်ကးတံၢ် ကွံၥ်ဝဲခဲလၢၥ်ဃၣ်ဃၣ်အဂ့ၢ်န့ၣ် လီၢ်ကဝီၤကမျၢၢ် စံးဝဲ န့ၣ်လီၤ.
ဘၣ်ဃးတၢ်ဂ့ၢ်အံၤကမျၢၢ်လၢဃ့ၢ်ထီၣ်တဂၤစံးဝဲလၢ“ပှၤလၢဟဲဃ့ၢ်ထီၣ်တဖၣ်အတက့ၤဒံးဘၣ်.တၢ်တတီၤအံၤခိၣ်နၢ်ပှၤဘၣ်မူဘၣ်ဒါမၢအိၣ်လၢတၢ်ပလီၢ်ပဒီပူၤထီဘိလီၤ.ပှၤကၠိဖိနါက့ပှၤတပျဲထီၣ်ကၠိလၢၤဘၣ်. ဖဲမဟါန့ၣ်ကဘီယူၤဟဲဆှၣ် တၢ်တဘျီကဒီးလံ. ဘၣ်သးအုး လၢကဟဲကွံၥ်လီၤဝဲလၢမုၢ်ဟါခါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤကမျၢၢ်ဃုၥ်ဒီးပှၤကၠိဖိလၢလဲၤအိၣ်မဲၢ်တရံးသီခါဖၠၣ်လၢအနီၣ်ဂံၢ်ကအိၣ်ဝဲအဂၤ(၂၀၀)ဘျဲၣ်အံၤတဖၣ်န့ၣ် ကၠီၣ်တဲၣ် တၢ်ကရၢကရိအံးထွဲကွၢ်ထွဲဆီၣ်ထွဲမၤစၢၤဝဲအိၣ်အသိး ကညီဂံၢ်ခီၣ်ထံးတၢ်ကရၢကရိစ့ၢ်ကီးလဲၤဟ့ၣ်လီၤဆီၣ်ထွဲ မၤစၢၤဝဲအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤဟီၣ်ကဝီၤပူၤဖဲန့ၣ် လၢတၢ်ဘံၣ်တၢ်ဘၢတၢ်အိၣ်သးအဖီခိၣ် ပှၤအိၣ်တ့ၢ်က့ၤထဲဒၣ်ခ့ၣ်အဲၣ်ယူၣ်ဘၣ်ထွဲပှၤမၤတၢ်ဖိ ပှၤသုးဖိသံၣ်ဖိဒီး ပှၤပိၥ်ခွါသ့ၣ်တဖၣ်လီၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါဒီးကမျၢၢ်စံးဝဲအသိး သ့ၣ်ညါဘၣ်န့ၣ်လီၤ.
(သုးက့ ၇)သုးဝဲၤလီၢ်ခိၣ်သ့ၣ်တၢ်လီၢ်အခိၣ်အဃၢၤကဘီယူၤလဲၤတ့ၢ်လီၤမ့ၣ်ပိၢ်အခါ ခီဖျိပှၤဒိးန့ၢ်စိဃၥ်တၢ်ကစီၣ်အိၣ်အဃိ တၢ်သံတၢ်ဘၣ်ဒိဘၣ်ထံးတအိၣ်အါအါဘၣ်ဘၣ်ဆၣ် ဘၣ်ဒိတဂၤဒီးဟံၣ်ဃီတၢ်သူၣ်ထီၣ်စှၤကိၥ်ဖျၢၣ်ဟးဂီၤအိၣ်ဝဲန့ၣ်လီၤ.
တကတီၢ်ဃီ(သုးက့ ၇)တၢ်လီၢ်ဒီတကျိၤလၢသုးမီၤစိရိၤကဘီယူၤလဲၤခးလီၤတၢ်အံၤန့ၣ် ကညီဒီကလုၥ်တၢ်ထူၣ်ဖျဲး သုးမုၣ်ဒိၣ် (KNLA)သုးဝဲၤလီၢ်ခိၣ်သ့ၣ် အမဲၥ်ညါ ခ့ၣ်အဲၣ်ယူၣ်လီခၢၣ်သးဃုၥ်ဒီးတၢ်ကရၢကရိဘၣ်ထွဲလၢအဂၤခိၣ်နၢ်တဖၣ်အိၣ်ဆီလီၤသးဖဲ န့ၣ်တပူၤဃီအဃိ သုးမီၤစိရိၤဘၣ်ပညိၣ်ဟဲခးလီၤတၢ်ဒ်အံၤလီၤအဂ့ၢ်န့ၣ် တၢ်ပဲၥ်ထံနီၤဖးစံးဝဲအိၣ်လီၤ.
ဒ်န့ၣ်အသိးတၢ်လီၢ်ဖဲန့ၣ်စးထီၣ်ဖဲအပူၤကွံၥ်(၂၀၂၄)လါအီကထိဘၢၣ်တုၤလၢတနံၣ်အံၤ(၂၀၂၅)လါယူၤန့ၣ် တၢ်လဲၤတ့ၢ်လီၤဝဲဒီးဒြိ မ့ၣ်ပိၢ်အိၣ်ဝဲ(၄)ဘျီလံဘၣ်ဆၣ် တၢ်ဟဲခးလီၤတၢ်ဒီးကဘီယူၤဒ်အံၤမ့ၢ်တၢ်အဆိကတၢၢ်တဘျီလီၤဒီး ဘၣ်ဃးသုးမီၤစိရိၤအကဘီယူၤလဲၤခးဘျီဝဲအံၤစ့ၢ်ကီးတုၤလၢခဲအံၤ ခ့ၣ်အဲၣ်ယူၣ်တကပၤထုးထီၣ်ပၥ်ဖျါ,က့ၤခီၣ်ဆၢစံးကဒါတၢ် တအိၣ်နီမံၤဒံးဘၣ်န့ၣ်လီၤ.
