လါအီကူး ၁၅သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်,လၢၢ်ဒိၣ်စိကီၢ်ဆၣ်, ကလ့ၤအီၣ် ဆူ နၣ်အ့ၣ်တီၣ် ကျဲမုၢ်ခိၣ်, ဖဲ လါအီးကူး(၁၃)သီအနံၤန့ၣ် KNLAကညီဒီကလုၥ်တၢ်ထူၣ်ဖျဲးသုးမုၢ်ဒိၣ်မၤဝဲဒၣ်တၢ်သမံသမိးအဆၢကတီၢ် ဖီၣ်ချုးန့ၢ်ဝဲ ကီၢ်ပယီၤ MOGE အ့ကၠ့ၣ်နံယၢၣ် တဂၤအဂ့ၢ် သ့ၣ်ညါဘၣ်လၢလီၢ်ကဝီၤ KNLAအပှၤဘၣ်မူဘၣ်ဒါအအိၣ်န့ၣ်လီၤ.
ကီၢ်ပယီၤ MOGE အ အ့ကၠ့ၣ်နံယၢၣ်ဝဲအံၤန့ၣ် အိၣ်ဝဲဒၣ်လၢဝ့ၢ်ဒဝဲၢ်ဒ်သိးကလဲၤထီၣ်ဝဲဆူနၣ်အ့ၣ်တီၣ်ကီၢ်ဆၢအဂီၢ်ဒီးဖဲတၢ်မၤတၢ်သမံသမိးအဆၢကတီၢ်တၢ်ထံၣ်န့ၢ်ဝဲဒၣ်လၢအမ့ၢ်ဝဲဒၣ် ပှၤလၢမၤစၢၤပယီၤသုးမီၤစိရိၤအဂ့ၢ် KNLA သုးရ့ၣ်(၂၇)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမူဂ့ၤ စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ဖီၣ်န့ၢ်ဒုတမ့ၢ်ဘၣ်.အိၣ်ဒၣ်ပကိးတ့ၢ်အီၤန့ၣ်လီၤ.အမံၤလၢသ့ထိဒီးယဆိမိၣ်လၢအကလဲၤဆီတလဲပှၤကညီန့ၣ်လီၤ.ပတသံကွၢ်ဘၣ်အီၤမူၤနီၢ်ဘၣ်.အခဲအံၤပဆှၢထီၣ်အီၤဆူသုးက့(၆)ဒီးသုးဝဲၤလီၢ်ခိၣ်သ့ၣ်လံန့ၣ်လီၤ.ဘၣ်လၢအဝဲဟဲအခါပသမံသမိးဒီးပှၤအဂၤန့ၣ် တၢ်အုၣ်သးပၣ်သနၥ်က့အဝဲန့ၣ်တၢ်အုၣ်သးတပၣ်ဘၣ်အဃိန့ၣ်ဖျါထီၣ်ဝဲန့ၣ်လီၤ.တၢ်လၢကီၢ်ကၠီၣ်တဲၣ်ခီပနံၣ်န့ၣ်အိၣ်ဒီးအတၢ်အုၣ်သး(ကးခ်)ကိးဂၤဒဲးလီၤ.ကၠီၣ်တဲၣ်ခီပနံၣ်ပှၤမၤတၢ်ဖိန့ၣ်ထီၣ်ထီၣ်လီၤလီၤလ့ၢ်လိၤဒ်ညီနုၢ်အသိးလီၤ.ဘၣ်ဆၣ်သနၥ်က့မ့မ့ၢ်သုးမီၤစိရိၤအပှၤဒီးပှၤလၢမၤန့ၢ်သုးမီၤစိရိၤအတၢ်သ့ၣ်တဖၣ်န့ၣ်တၢ်တပျဲလ့ၢ်လိၤအီၤဘၣ်.”အဂ့ၢ်စံးဝဲဒၣ်န့ၣ်လီၤ.
ကီၢ်ပယီၤ MOGE အ့ကၠ့ၣ်နံယၢၣ် အူသ့ထိဝဲအံၤန့ၣ် ဟဲဒိးပိၥ်ဝဲ ကီၢ်ကၠီၣ်တဲၣ် PPTTEP ခီပနံၣ် ပှၤမၤတၢ်ဖိသ့ၣ်တဖၣ်အသိလ့ၣ်ခံဒီးဖဲတၢ်သမံသမိးအဆၢကတီၢ်ဘၣ်တၢ်ထံၣ်န့ၢ်ဝဲအီၤဒ်အံၤလီၤအဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ပီၣ်လဲၣ်ပူၤ တဆီ ဆူဝ့ၢ်ဒဝဲၢ်ဒီး ဆူ နၣ်အ့ၣ်ဒီၣ်ကီၢ်ဆၢန့ၣ်အိၣ်ဝဲဒၣ်ဒီး ကီၢ်ပယီၤ MOGE ဒီး ကီၣ်ကၠီၣ်တဲၣ် PPTTEP ခီပနံၣ်အဂၥ်သဝံအကျိၤတဘိန့ၣ်လီၤ.ဂၥ်သဝံတၢ်တိၤကျဲၤတၢ်မၤဝဲအံၤန့ၣ်လီၤလၢဝဲဒၣ်လၢစ့ အမဲရကၣ်ဒီလၣ်(၇၂)ကကွဲၢ်န့ၣ်လီၤ. ကီၢ်ပယီၤ ယတနၣ်ဂၥ်သဝံတၢ်တိၥ်ကျဲၤ,ယဲတကိၤဂၥ်သဝံတၢ်တိၥ်ကျဲၤဒီးစီတံၣ်ကၣ်ဂၥ်သဝံတၢ်တိၤကျဲၤသ့ၣ်တဖၣ်လၢကမၤသကိးဝဲအဂီၢ် ဆဲးလီၤသကိးတဲစုမုၢ်ကျၢၢ်ဖဲ အပူၤကွံၥ် ၂၀၁၄နံၣ် လါအီကူးအတီၢ်ပူၤအဂ့ၢ် သ့ၣ်ညါဘၣ်န့ၣ်လီၤ.
