လါစဲးပထ့ဘၢၣ် ၁၈ သီ, ၂၀၂၅ နံၣ်, ခ့ၣ်အဲးစံၣ်
လၢကဟဲလါဒံၣ်စ့ဘၢၣ် တၢ်ဃုထၢလၢသုးမီၤစိရိၤကမၤဝဲအံၤ တူၢ်လိၥ်ဝဲဒီးကမၤစၢၤဆီၣ်ထွဲဒီသဒၢန့ၢ်ဝဲတသ့ဖဲအသ့အဂ့ၢ်န့ၣ် ဘူးဒးတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)လီၢ်ခၢၣ်သး တၢ်ရ့လိၥ်မုၥ်လိၥ်ဝဲၤဒၢး ထုးထီၣ်ပၥ်ဖျါဝဲဖဲမဟါလါစဲးပထ့ဘၢၣ် ၁၇ သီ အနံၤ န့ၣ်လီၤ.
ပၣ်တံၣ်ဖှိၣ်ဒံၣ်မိၣ်ခြ့ၣ်စံၣ်တၢ်ဃုထၢလၢတၢ်ကစးထီၣ်မၤဝဲဖဲလါဒံၣ်စ့ဘၢၣ်အတီၢ်ပူၤအံၤ (DKBA)ကရူၢ်လၢအဘၣ်တၢ်တီခိၣ်ရိၣ် မဲအီၤလၢ သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤဘိၤဘံၣ်အံၤ တူၢ်လိၥ်သဂၢၢ်ဝဲအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် ဖီၣ်စုကဝဲၤကရူၢ်ကရၢလၢအဒုးအိၣ်ထီၣ်တၢ်ဒုးတၢ်ယၤလၢထံလီၢ်ကီၢ်ပူၤအံၤတဖၣ် ကပတုၥ်ကွံၥ်တၢ်ဒုးတၢ်ယၤဒီး တၢ်မ့ထံၣ်လိၥ်တဲသကိးတၢ်ဒီးသုးပဒိၣ်မးတၢ်မုၥ်တၢ်ခုၣ်ကအိၣ်ဝဲအဃိ နၥ်ဝဲနီၢ်နီၢ်လၢတၢ်ဃုထၢ အံၤကသူၣ်ထီၣ်ဝဲဒံၣ်မိၣ်ခြ့ၣ်စံၣ်ကီၢ်စၢဖှိၣ်လၢအအိၣ်ဒီးတၢ်တုၤသိးထဲသိးအံၤသ့ဝဲအဂ့ၢ်န့ၣ် စံးဝဲန့ၣ် လီၤ.
လၢတၢ်န့ၣ်အဃိ တၢ်ဃုထၢလၢသုးမီၤစိရိၤကမၤဝဲအံၤ တူၢ်လိၥ်ဝဲလၢလၢပှဲၤပှဲၤဒီး ပှၤနီၢ်တဂၤ,ထံရူၢ်ကီၢ်သဲးပၣ်တံၣ်လၢကအနုၥ် လီၤတၢ်ဃုထၢလၢကညီကီၢ်စဲၣ်အပူၤတဖၣ် ကဆီၣ်ထွဲမၤစၢၤဒီးသဒၢ အံးထွဲကွၢ်ထွဲ ဝဲလၢအဂ့ၤကတၢၢ်အဂ့ၢ်န့ၣ် DKBA စံးစ့ၢ်ကီး ဝဲန့ၣ်လီၤ.
(DKBA)သုးခိၣ်ဘိၤဘံၣ်ကရူၢ်လၢအကဆီၣ်ထွဲမၤစၢၤဝဲသုးမီၤစိရိၤအံၤ အိၣ်ဆီလီၤသးဟူးဂဲၤဝဲဒၣ်ဖဲဒူသထူၣ်ကီၢ်ရ့ၣ် (သုးက့ ၁) ဖၣ်အၣ်ကီၢ်ဆၣ် ကရူၢ်(၄)ဘ့ၣ်လၢအမ့ၢ် နီဖးဒိၣ်ကရူၢ်,မဲၢ်ကရီကရူၢ်,နိၣ်ချံးကရူၢ်,ခဲတီၣ်ကရူၢ် ဒူသဝီတဖၣ်အပူၤဒီး ဘၣ်ဆၣ် တကီၢ်ခါဟီၣ်ကဝီၤပူၤဖဲန့ၣ်လၢတၢ်ဃုထၢအဂီၢ်တၢ်နုၥ်လီၤဟူးဂဲၤဝဲတအိၣ်ဒံးဘၣ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဝဲ န့ၣ်လီၤ.
ဘၣ်ဃး(DKBA)သုးခိၣ်ဘိၤဘံၣ်ကရူၢ်အလံၥ်ထုးထီၣ်ပၥ်ဖျါအံၤန့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဝဲလၢ “အဝဲသ့ၣ်ဒုဘၣ်တူၢ်လိၥ်ဘၣ်ထုးထီၣ်ဝဲလံၥ်ဧါသၢၣ်.ဘၣ်မနုၤအဃိလဲၣ်န့ၣ်အဝဲသ့ၣ်မ့ၢ်ဝဲပယီၤ အပှၤစဲၤနီၢ်လံမီၤ. မ့ၢ်ဘၣ်ကွၢ်လၢ ဖီၣ်စုကဝဲၤကရူၢ်လၢအဂၤနါက့ထုးထီၣ်ဝဲလံမီၤ.တၢ်ဘၣ်ဘျုးဒံၣ်မိၣ်ခြ့ၣ်စံၣ်( DKBA)ဧါ,(BGF)ဧါ,(PC)ဧါထုးထီၣ်ဝဲအိၣ်မီၤ. အဝဲသ့ၣ်တၢ်မၤအိၣ်န့ၣ်မၤဝဲန့ၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတၢ်ဃုထၢလၢသုးမီၤစိရိၤကမၤဝဲအံၤ(ခ့ၣ်အဲၣ်ယူၣ်)တကပၤတတူၢ်လိၥ်ဝဲဘၣ်အမဲၥ်ညါ လီၢ်ကဝီၤကမျၢၢ် လၢအိၣ်(DKBA)သုးခိၣ်ဘိၤဘံၣ်အဟီၣ်ကဝီၤပူၤတဖၣ်စ့ၢ်ကီးအါဒၣ်တက့ၢ်တတူၢ်လိၥ်ဝဲတၢ်ဃုထၢအံၤဘၣ်အသိး တၢ်ဃုထၢဘျီဝဲအံၤစ့ၢ်ကီးတမ့ၢ်လၢအဘျုးအဖှိၣ်အိၣ်ဝဲဘၣ်အဂ့ၢ်န့ၣ် ကမျၢၢ်လၢအိၣ်ဖဲန့ၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.
“ဘၣ်မနုၤအဃိလၢပတဟ့ၣ်တၢ်ဖး(မဲ)ဘၣ်လဲၣ်န့ၣ်ဖဲတၢ်ဒုးတၢ်ယၤတၢ်အိၣ်သးတဂ့ၤဒံးဘၣ်အကတီၢ်အံၤနမ့ဟ့ၣ်တၢ်ဖးနါက့ ကဲဝဲတၢ်ခီလီ,ဟ့ၣ်နါက့အဘျုးအဖှိၣ်တအိၣ်တၢ်နီတမံၤဘၣ်.ခဲအံၤတမ့ၢ်တၢ်ဆၢကတီၢ်လၢတၢ်ကမၤတၢ်ဃုထၢဘၣ်မီၤနီၤ. ကဲဘျုး လၢသုးမီၤစိရီၤအဂီၢ်ခဲလၢၥ်လီၤ.တၢ်ဃုထၢလၢတၢ်ကမၤဝဲအံၤကလုၥ်ဒူၣ်ဖီၣ်စုကဝဲၤကရူၢ်ကရၢဒီးကမျၢၢ်ထံဖိကီၢ်ဖိမ့တူၢ်လိၥ် ဟ့ၣ်ဝဲ အခွဲးမးတၢ်ဃုထၢအံၤကမ့ၢ်တၢ်ဃုထၢလၢအမ့ၢ်အတီမီၤနီၤ.မ့မၤဝဲဒ်အံၤန့ၣ်မ့ၢ်တၢ်ဃုထၢလၢအယီၤအဘျၣ်လီၤ”အဂ့ၢ် န့ၣ် စံးဝဲန့ၣ်လီၤ.
တကးဒံးဘၣ်တၢ်ဃုထၢဘျီဝဲအံၤကမၤထီထီၣ်သုးမီၤစိရိၤအသးသမူအဃိ ဒ်သိးကမျၢၢ်သ့ၣ်တဖၣ် သုတဟ့ၣ်တၢ်ဖးတဂ့ၤအဂီၢ်န့ၣ် ဟီၣ်ကဝီၤဖဲန့ၣ်အပူၤကီၢ်ရ့ၣ်/ကီၢ်ဆၣ်ဘၣ်ထွဲပှၤဘၣ်မူဘၣ်ဒါတဖၣ်နုၥ်လီၤဟ့ၣ်ဝဲတၢ်သ့ၣ်ညါနၢ်ပၢၢ်အိၣ် အိၣ်ဝဲ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
တကီၢ်ခါခဲအံၤဟီၣ်ကဝီၤတၢ်လီၢ်လၢ(DKBA)ဟူးဂဲၤဝဲန့ၢ်တဖၣ်န့ၣ် (DKBA)တကပၤမၤအါထီၣ်ဝဲအသုးဂံၢ်ဘါအိၣ်ဝဲအသိး စှၤသီအတီၢ်ပူၤအံၤခးလီၤဝဲကျိဖးဒိၣ်ဆူကမျၢၢ်အိၣ်ဆိးလီၢ်အိၣ်ဝဲအဂ့ၢ်န့ၣ် လီၢ်ကဝီၤကမျၢၢ်စံးဝဲအသိးသ့ၣ်ညါဘၣ်န့ၣ်လီၤ.
တကတီၢ်ဃီတၢ်ဃုထၢလၢသုးမီၤစိရိၤကမၤဝဲဘျီဝဲအံၤန့ၣ် ဘူးဒးကညီသုးမုၢ်ဒိၣ်(DKBA)အမဲၥ်ညါ ကညီသုးခိးကီၢ်ဆၢ(BGF), ကညီတၢ်မုၥ်တၢ်ခုၣ်ကီၣ်ကး ကရၢ(PC) ဒီး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ကရူၢ်ကရၢတဖၣ် ကဆီၣ်ထွဲ မၤစၢၤဝဲ စုၥ်စုၥ်အဂ့ၢ်န့ၣ် ကရူၢ်အံၤတဖၣ် ထုးထီၣ်ပၥ်ဖျါတ့ၢ်ဝဲလံၥ်တၢ်ပၥ်သးအိၣ်ဝဲန့ၣ်လီၤ.
(DKBA)သုးခိၣ်ဘိၤဘံၣ်အကရူၢ်အံၤ စးထီၣ်ဖဲ ၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် အတၢ်ပၥ်ဖှိၣ်မၤသကိး တၢ်ဒီးသုးမီၤ စိရိၤအိၣ်ထီၣ်ဝဲဖျိဖျိဖျါဖျါဒီး လၢန့ၣ်အမဲၥ်ညါတချုးပယီၤသုးထီၣ်ဟံကဒါက့ၤမၠၣ်ဝတံၣ်-ကီးတရံးအ့ရှါကျဲ န့ၢ်ဒံးဘၣ်အခါဖဲကြုၢ်တု-ကီးတရံးတၢ်ဒုး ဒီတကတီၢ်အပူၤန့ၣ် မ့ၢ်ကရူၢ်ကရၢတဒူၣ်လၢအပၣ်ဃုၥ်ပၣ်ဂီၢ်မၤစၢၤဝဲ ပယီၤသုးလၢတၢ်ဒုးအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
