လါစဲးပထ့ဘၢၣ် ၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်(သုးက့-၆)တၢ်ပၢဟီၣ်ကဝီၤအပူၤ,တိၤဟးဂီၤတဘိလၢအအိၣ်ဝဲဒၣ်ဖဲအ့ရှၢၣ် ကျဲမုၢ်ကီးတရံးဒီးရၤမတံဝ့ၢ်အဘၢၣ်စၢၤ,ဖဲကီးနွဲၢ်သဝီခိၣ်ထိး(တိၤ)အံၤပယီၤသုးဟဲက့ၤထီၣ်ဘှီကဒါက့ၤဝဲဒၣ်တိၤအံၤအဂ့ၢ်သ့ၣ်ညါဘၣ်အသိးတၢ်လဲၤတ့ၢ်လီၤဝဲဒၣ်ဒီးဒြိမ့ၣ်ပိၢ်အဂ့ၢ်တၢ်မဲၥ်ညါဂံၢ်ခီၣ်ထံးတၢ်ကစီၣ်စံးဝဲန့ၣ်လီၤ.
ပယီၤသုးကျိၤလၢအဟဲက့ၤတ့ထီၣ်ဘှီထီၣ်ကဒါက့ၤဝဲ(ကီးနွဲၢ်)တိၤလၢတၢ်ကက့ၤထီၣ်ဒိၣ်စိန့ၢ်က့ၤဝဲရၤမတံဝ့ၢ်အဂီၢ်အံၤဖဲအပူၤကွံၥ်မဟါအနံၤန့ၣ်တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်လဲၤတ့ၢ်လီၤဝဲဒြိမ့ၣ်ပိၢ်သ့ၣ်တဖၣ်အဖီခိၣ်ပယီၤသုးတကပၤတၢ်သံတၢ်ဘၣ်ဒိအိၣ်ဝဲအဂ့ၢ်(KNLA)သုးဖိလၢအိၣ်တၢ်မဲၥ်ညါတဂၤစံးဝဲဒ်အံၤန့ၣ်လီၤ.
“ဖဲမဟါတၢ်လဲၤတ့ၢ်လီၤဝဲဒြိမ့ၣ်ပိၢ်မီၤနီၤ. မဟါန့ၣ်အဝဲသ့ၣ်တ့ဒံးဝဲဒီးတနံၤညါအံၤန့ၣ်တၢ်တသီၣ်အါအါလၢၤ ဘၣ်,လီၤဘှ့ၣ်လံ. အဝဲသ့ၣ်ဟဲထီၣ်ဒီးသိလ့ၣ်လၢကတ့ထီၣ်ဝဲတိၤအံၤန့ၣ်န့ၢ်ဝဲတဘျုးသီလံန့ၣ်လီၤ. တၢ်လဲၤ မၤတံၥ်တၥ်အီၤအိၣ်အဃိတိၤအံၤကဝံၤအဂီၢ်ကဘၣ်ဖးယံၥ်ညါဒံးန့ၣ်လီၤ. ဒ်နၢ်ဟူတၢ်ကစီၣ်အသိးန့ၣ်အ ဝဲသ့ၣ်သံ(၁)ဂၤ,ဘၣ်ဒိ(၈)န့ၣ်လီၤ. ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဖဲမဟါလါစဲးပထ့ဘၢၣ်(၁)သီအနံၤစ့ၢ်ကီးန့ၣ်လၢကီးတရံး-ရၤမတံဝ့ၢ်အ့ၡၢၣ်ကျဲမုၢ်ဟီၣ်က ဝီၤဖဲယီၢ်ကုၤသဝီဒီးတီနီၢ်ထံလီၤဆူကစၢၢ်ကဆူၣ်တၢ်လီၢ်သ့ၣ်တဖၣ်တၢ်ဒုးတၢ်ယၤဆူၣ်ဝဲဒၣ်လၢ(KNLA)တၢ်ပၢၢ်ဆၢသုးပၥ်ဖှိၣ်ဒီးပယီၤသုးမီၤစိရိၤအဘၢၣ်စၢၤအသိးပယီၤသုးတကပၤခးလီၤစၢၤန့ၢ်ဝဲကျိဖးဒိၣ်အါအါဂီၢ်ဂီၢ်အဂ့ၢ်သ့ၣ်ညါဘၣ်လၢဂံၢ်ခီၣ်ထံးတၢ်ကစီၣ်အိၣ်န့ၣ်လီၤ.
ဘၣ်ထွဲဒီးကီးတရံး-ရၤမတံအ့ၡၢၣ်ကျဲမုၢ်သီအံၤပယီၤသုးမီၤစိရိၤတကပၤဘၣ်ပျၢ်စုပျၢ်ခီၣ်ကွံၥ်ဝဲဒၣ်ဖဲအပူၤ ကွံၥ်(၂၀၂၃)နံၣ်အခါလံၤလံၤလံဒီးပယီၤသုးမီၤစိရိၤအံၤဒ်သိးကဟဲက့ၤထီၣ်ဒိၣ်စိက့ၤဝဲအဂီၢ်အခဲအံၤတဘျီကဒီးမၤဝဲသုးကျိၤတၢ်ထီၣ်ဒုးဘၣ်ဆၣ်တုၤတကီၢ်ခါခဲအံၤတၢ်ပၢၢ်ဆၢသုးပၥ်ဖှိၣ်တကပၤဒိၣ်စိဒံးဝဲအဖၢမုၢ်အဂ့ၢ်ဂံၢ်ခီၣ်ထံးတၢ်ကစီၣ်ဝဲန့ၣ်လီၤ.
