လါအီးကထိဘၢၣ် ၁၃ သီ, ၂၀၂၅ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ယိၤကျါကရူၢ် ထံဖးဒိၣ်ထၣ်သဝီမုၢ်နုၥ် ကဘီယူၤပျီသဝီအပူၤ ကဘီယူၤလဲၤတ့ၢ်လီၤ မ့ၣ်ပိၢ် ကမျၢၢ်ဃုၥ်ဒီးဖိဒံဖိသၣ်သံဘၣ်ဒိဘၣ်ထံးကဲထီၣ်ဒိၣ်ဒိၣ်မုၢ်မုၢ်ဝံၤလီၢ်ခံ ဒူသဝီကမျၢၢ်လၢအိၣ်ဘူးဖဲတၢ်ခိၣ်တၢ်ဃၢၤ ဖဲန့ၣ် တဖၣ်ပျံၤတၢ်ဟးစံၣ်ပလဲၥ်သးလၢတၢ်ဘံၣ်တၢ်ဘၢအလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲလါအီးကထိဘၢၣ် ၉ သီ မုၢ်နၤခီ ၈း၁၅ မံးနံးအဆၢကတီၢ်န့ၣ် တၢ်ဒုးကဲထီၣ်တအိၣ်သုးမီၤစိရိၤ(Jet fighter)ကဘီယူၤတဘ့ၣ် လဲၤတ့ၢ်လီၤဝဲပီၣ်(၅၀၀)မ့ၣ်ပိၢ် ၂ ဖျၢၣ်လၢအဃိ ကဘီယူၤပျီသဝီပူၤဖိသၣ်(၁၂)နံၣ်ဒီး(၆)နံၣ်အဘၢၣ်စၢၤ သံဝဲ(၅)ဂၤဒီး ဘၣ်ဒိ(၉)ဂၤ အကျါပၣ်ဃုၥ်ဝဲဖိသၣ်အိၣ်(၂)လါတဂၤဘၣ်ဟဲကဲထီၣ်ဝဲဒ်အံၤန့ၣ်လီၤ.
လၢတၢ်န့ၣ်အဃိစးထီၣ်ဖဲန့ၣ်ဝံၤထံဖးဒိၣ်ထၣ်သဝီမုၢ်နုၥ်,ကဘီယူၤပျီသဝီဒီးယိၤကျါသဝီဖိတဖၣ်အါဒၣ်တက့ၢ်ပျံၤတၢ်အိၣ်လၢ သဝီပူၤတဘူၣ်လၢၤဘၣ်စံၣ်ပလဲၥ်သးလၢထံခံထံကွၥ်တၢ်ဘံၣ်တၢ်ဘၢလီၢ်ဘၣ်ဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ် သဝီကရူၢ်ခိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“တၢ်ကဲထီၣ်သးဖဲမဟါတဘျီန့ၣ်ဘၣ်ဖဲသဝီပူၤတီတီ,ပှၤဖိသၣ်သံဒီဒူၣ်ဒီထၢဘျီတဲက့ၤတၢ်တဘၣ်နီမံၤလၢၤဘၣ်.ဟံၣ်တဖၣ်န့ၣ် မ့ကဲထီၣ်တဘၣ်နီမံၤဘၣ်.ခဲအံၤပှၤသဝီဖိတဖၣ်န့ၣ်စံၣ်လၢၤလံ.အိၣ်တ့ၢ်ပူၤဂၤပူၤလီၤ.ထံဖးဒိၣ်ထၣ်,ကဘီယူၤပျီ,ယိၤကျါသဝီတဖၣ်န့ၣ်မုၢ်ဟါခါပှၤတအိၣ်နီတဂၤလၢၤဘၣ်.တုၤလၢထံကျိနံၤခိၣ်န့ၣ်နဃုပှၤတဘၣ်လၢၤဘၣ်.နတစံၣ်ဘၣ်နအိၣ်ဘူးဝဲလဲၣ်. မ့ကဲထီၣ် ဒ်သိးဖဲမဟါတဘျီန့ၣ်ဒုနပုလီၤသးနစိၥ်လီၤသးတဂၥ်လၢၤဘၣ်.အဃိန့ၣ်ပှၤပျံၤတၢ်ပှၤစံၣ်ဝဲန့ၣ်”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်တကီၢ်ခါခဲအံၤတၢ်ဆၢကတီၢ်စ့ၢ်ကီးဘူးထီၣ်လၢတၢ်ဃုထၢလံဒီး ဟီၣ်ကဝီၤဖဲန့ၣ်အပူၤတၢ်ကစီၣ်ဟးထီၣ်လၢ အကဘီယူၤကဟးခးလီၤတၢ်အါထီၣ်သ့ဝဲအဖီခိၣ် ဒူသဝီကမျၢၢ်လၢအဂၤတဖၣ်စ့ၢ်ကီးလၢတၢ်ပလီၢ်ပဒီအပူၤ တနီၤန့ၣ်ဟးပလဲၥ် စိဃၥ်သးလၢတၢ်လီၢ်အဂၤအိၣ်ဝဲအဂ့ၢ်န့ၣ် လီၢ်ကဝီၤကမျၢၢ်လၢအိၣ်ဖဲန့ၣ်တဖၣ်စံးဝဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲမဟါလါအီးကထိဘၢၣ် ၁၁ သီ ဂီၤခီ ၁၁း၀၀ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး လၢမုၢ်တြီၢ်ကီၢ်ရ့ၣ် (သုးက့ ၅) လူၤသီကီၢ်ဆၣ် ဒ့ၣ်ဘူးနိၣ်သဝီဆၢလၥ်ဒူသဝီတဖျၢၣ်အပူၤ ကဘီယူၤလဲၤတ့ၢ်လီၤမ့ၣ်ပိၢ်တစှၤန့ၢ် (၈)ဖျၢၣ် ကမျၢၢ်တၢ်သံ တၢ်ဘၣ်ဒိ ဘၣ်ထံးတအိၣ်ဘၣ်ဆၣ်ဟံၣ်တၢ်သူၣ်ထီၣ်,တၢ်မုၢ်တၢ်ဘိဟးဂီၤအိၣ်ဝဲအဂ့ၢ်န့ၣ် သ့ၣ်ညါဘၣ်လၢ ပှၤဘၣ်မူဘၣ်ဒါအအိၣ် န့ၣ်လီၤ.
ဒူသထူၣ်ကီၢ်ရ့ၣ် ဘံလ့ကီၢ်ဆၣ်ဒူသဝီအပူၤ လီၤဆီဒၣ်တၢ်သုးဟံန့ၢ်တၢ်စိတၢ်ကမီၤဝံၤလီၢ်ခံ သုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ် ဒီး ခဲအံၤတဘျီန့ၣ် ကဲထီၣ်အိၣ်တစှၤန့ၢ်အဘျီ(၁၀)လံဒီး ဒ်န့ၣ်အသိးခီဖျိလၢကဘီယူၤအံၤအဃိ တၢ်သံတၢ်ဘၣ်ဒိဘၣ်ထံး အမဲၥ်ညါ ကၠိ,သီခါဖၠၣ်, တၢ်ဆါဟံၣ်,တၢ်ဘါယွၤသရိၥ်,ကမျၢၢ်တၢ်သူၣ်ထီၣ်ဟးဂီၤကဲထီၣ်တ့ၢ်ဝဲအါးမးလံန့ၣ်လီၤ.
တကီၢ်ခါခဲအံၤလၢကဟဲတၢ်ဃုထၢအဂီၢ်သုးမီၤစိရိၤအံၤစးထီဖဲတလါအံၤထီၣ်န့ၣ်(ခ့ၣ်အဲၣ်ယူၣ်)ဟီၣ်ကဝီၤဃုၥ်ဒီးကလုၥ်ဒူၣ်တၢ်ပၢၢ်ဆၢကရူၢ်ဟီၣ်ကဝီၤအပူၤတဖၣ် ခးလီၤဝဲကျိဖးဒိၣ်,သူဝဲဒြိ,ဟးခးလီၤတၢ်ဒီးကဘီယူၤဟဲအိၣ်ထီၣ်ဝဲတပယူၥ်ဃီန့ၣ်လီၤ.
