လါအီးကထိဘၢၣ် ၂၈ သီ, ၂၀၂၅ နံၣ်, ခ့ၣ်အဲးစံၣ်
ဖဲတနံၤအံၤလါအီးကထိဘၢၣ် ၂၈ သီဂီၤခီအဆၢကတီၢ် မဲၢ်လးဒဲကဝီၤကမျၢၢ်ပိၥ်ခွါတဂၤအလၢလဲၤမၤတၢ်မၤလၢကီၢ်ကၠီၣ်တဲၣ် (စးကဲးကီၢ်ရ့ၣ်)ကထံပိၥ်ကျီးပူၤအံၤ စၢၢ်သံလီၤကိၥ်အဃိသံဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲတနံၤအံၤဂီၤခီကဘၣ်ဖဲ ၂း၀၀ နၣ်ရံၣ်ဃၣ်ဃၣ်အဆၢကတီၢ် စီၤလါမုၢ်ထူ(၄၀)နံၣ်အံၤ တူၢ်ဘၣ်ဝဲအဟၢဖၢဆါ,သးကိၢ်အူအဃိ အသကိးဒုးအီအီၤကသံၣ်ဝံၤလီၢ်ခံဖဲ ၄း၀၀ နၣ်ရံၣ်အဆၢကတီၢ်န့ၣ် တၢ်ထံၣ်က့ၤအီၤလၢအစၢၢ်လီၤကိၥ်လၢတၢ်ဟးလီၢ်ပူၤ သံဝဲလံအဂ့ၢ်န့ၣ် မဲၢ်လးပှၤဘၣ်မူဘၣ်ဒါဒီးပှၤသံအဟံၣ်ဖိဃီဖိတဖၣ်စံးဝဲန့ၣ်လီၤ.
ဘၣ်ဃၣ်တၢ်ဂ့ၢ်ကဲထီၣ်သးအံၤ မဲၢ်လးဒဲကဝီၤခိၣ် စီၤဆါဒ့ စံးဝဲလၢ“တၢ်ကဲထီၣ်သးန့ၣ်ဖဲမုၢ်ဝါထီၣ် ၂ နၣ်ရံၣ်န့ၣ် အဝဲန့ၣ်အသးကိၢ် အူ,အဟၢဖၢဆါဘျီလဲၤကိးဂဲၤဆၢထၢၣ်အသကိးလၢအဲၣ်ဒိးအီကသံၣ်န့ၣ်မီၤ. မ့ဝံၤအသကိးဒုးအီအီၤကသံၣ်,ဆဲးကျိးန့ၢ်အီၤဒီး သ့ၣ်ခိၣ်တၢ်မၤကစၢ်ဘျီပှၤဟဲစိၥ်န့ၢ်အီၤကသံၣ်ကသီ,တၢ်အီၣ်တၢ်အီတဖၣ်မီၤ.လၢခံအတဲအသကိးလၢသါမၤတကဲလၢၤဘၣ်သါကမၤကတၢၢ်သါတၢ်အိၣ်မူ.အသကိးတဲအီၤလၢတဘၣ်လိၣ်မၤဒ်န့ၣ်ဘၣ်,အသကိးစ့ၢ်ကီးတပၥ်သူၣ်ပၥ်သးနီတမံၤစ့ၢ်ဘၣ်,အသကိးက့ၤမံၤမုၢ်ဝါထီၣ် ၄ နၣ်ရံၣ်ဘျီပှၤလဲၤထံၣ်က့ၤအီၤအလဲၤစၢၢ်လီၤကိၥ်လၢတၢ်ဟးလီၤပူၤဒ်န့ၣ်. ပမ့က့ၤကွၢ်တၢ်တဂၤအံၤ အပူၤကွံၥ် အိၣ်လၢ ဒဲကဝီၤပူၤခါန့ၣ်သူတၢ်မူၤတၢ်ဘှီးအါဒီးလဲၤက့ၤလၢန့ၣ်တသူဘၣ်ဝဲလၢၤဘၣ်အဃိတၢ်ဂ့ၢ်ကဲထီၣ်သးဒီးဒ်အံၤလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်က စီၣ် န့ၣ်လီၤ.
စီၤလါမုၢ်ထူလၢအစၢၢ်သံလီၤအကိၥ်တဂၤအံၤ တချုးအဟးထီၣ်လဲၤမၤတၢ်လၢ(ကထံပိၥ်)ကျီးပူၤဒံးဘၣ်အိၣ်ဖဲဒဲကဝီၤပူၤ အခါန့ၣ် မ့ၢ်ပှၤတဂၤလၢအီသံးအမဲၥ်ညါသူဝဲကသံၣ်ကသ့ၣ်တၢ်မူၤတၢ်ဘှီးတဖၣ်အံၤဒီးတကးဒံးဘၣ်ဖဲအလဲၤတုၤလၢကထံပိၥ်ၥ်ကျီး ပူၤအခါ န့ၣ်စ့ၢ်ကီးအီသံးအိၣ်ဝဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် အဟံၣ်ဖိဃီဖိတဖၣ်စံးဝဲန့ၣ်လီၤ.
တကးဒံးဘၣ်ဘၣ်ဃးစီၤလါမုၢ်ထူစၢၢ်သံလီၤကိၥ်တၢ်ဂ့ၢ်အံၤကဲထီၣ်သးလၢကသံၣ်မူၤဘှီးတၢ်ဂ့ၢ်ပိၥ်ထွဲထီၣ်ခံအဃိ အတၢ်သံအံၤ တၢ်ဘၣ်ထွဲဒီးပှၤအဂၤတအိၣ်နီမံၤဘၣ်အဂ့ၢ်န့ၣ် အမါနီၢ်ကစၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“အဝဲန့ၣ်လဲၤတုၤန့ၣ်သူတၢ်မူၤတၢ်ဘှီး,ဆဲးဖိလၢပအိၣ်န့ၣ်ပဒူးပဒ့ၣ်တၢ်.ဆဲးဖိန့ၣ်အမူၤမၢ်မၢ်လီၤ.အအိၣ်လၢညါခါဖဲအံၤန့ၣ်မ့မူၤထီၣ် န့ၣ်ဟဲက့ၤတဲအါတၢ်,တထူၣ်တထီလၢပလိၤဒီး အိၣ်ဒၣ်ပဘၣ်ခၠီးအီၤအိၣ်လၢအဖီလၥ်လီၤ. အဝဲန့ၣ်အီသံးစ့ၢ်,သူကသံၣ်မူၤဘှီး(က သံၣ်ကသ့ၣ်)စ့ၢ်သူခဲလၢၥ်လီၤ.တချုးအသံဒံးဘၣ်န့ၣ်တဲတၢ်ဒီးယၤဒံး,တဲပၠးဝဲလၢသါမံတန့ၢ်ဘၣ်,သါသးတဂၢၢ်ဘၣ်.တဲပၠးဝဲလၢသါမ့ သံန့ၣ်မၢပှၤဟဲက့ၤစိၥ်သါစိၣ်ဒံး.ယတဲအီၤနကသံဒ်လဲၣ်နလဲၤဖံးအီၣ်မၤအီၣ်တၢ်လၢနဟံၣ်ဖိဃီဖိအဂီၢ်ဒီးနဟးဆိမိၣ်တၢ်နသံတသ့ဘၣ်မီၤယတဲအီၤဒ်န့ၣ်.တၢ်ကဲထီၣ်သးခဲအံၤတမ့ၢ်ပှၤတၢ်ကမၣ်နီတဂၤဘၣ်ခီဖျိလၢအသူတၢ်မူၤတၢ်ဘှီးအဃိအတၢ်ကဲထီၣ်က့ၤသးဒီးအီၤဒ်န့ၣ်လီၤ”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်ဖဲအပူၤကွံၥ်စှၤနံၣ်ဒံးအခါန့ၣ်ခီဖျိလၢကသံၣ်မူၤဘှီးအတၢ်ဂ့ၢ်ပိၥ်ထွဲအံၤအဃိ အဘၣ်ကူစါယါဘျါအီဝဲနီၢ်သးတၢ်ဆါ (စိတ်ရောဂါ) စဲးကိၤကသံၣ်လၢတၢ်ဆါဟံၣ်ကအိၣ်ဝဲလၢတနံၣ်ဃၣ်ဃၣ်ညါအဂ့ၢ်န့ၣ် အမါစံးအါထီၣ်ဝဲန့ၣ်လီၤ.
မဲၢ်လးဒဲကဝီၤဖိ စီၤလါမုၢ်ထူအံၤ အဝဲအိၣ်ဒီးအဖိမုၣ်(၂)ဂၤ,ပိၥ်ခွါ(၂)ဂၤ မ့ၢ်ပှၤအိၣ်ဝဲဒၣ်ဖဲကဝီၤဒိၣ် Zone-c ကဝီၤဒ့(C1B) ဒီး ဖဲတလါအံၤလါအီးကထိဘၢၣ် ၂၁ သီအနံၤ လၢကထံပိၥ်ကျီးဒီးလါမယါကျီးတၢ်မၤအဂီၢ် ပှၤဒဲကဝီၤဖိဟးထီၣ်(၁၂၅)ဂၤ အကျါ ပၣ်ဃုၥ်ဝဲဒီးအီၤဒီး ဖဲအလဲၤတုၤမၤတၢ်မၤ လၢကထံပိၥ်ကျီးပူၤကအိၣ်ထဲဒၣ်(၅)သီခိၣ်ဃၢၤဝံၤတၢ်ဘၣ်ဟဲကဲထီၣ်သးဒ်ခဲအံၤအသိး န့ၣ်လီၤ.
တကီၢ်ခါခဲအံၤအသံစိၣ်န့ၣ် ဒ်အတချုးသံအတၢ်ဃ့ထီၣ်အိၣ်အသိးန့ၣ် ကၠီၣ်တဲၣ်ပှၤဘၣ်မူဘၣ်ဒါဟဲက့ၤစိၥ်ဝဲ ဆူမဲၢ်လးဒဲကဝီၤ ပူၤလံဘၣ်ဆၣ် တုၤလၢဂီၤခီ ၁၁ နၣ်ရံၣ်ခဲအံၤအိၣ်ဒံးဝဲလၢကျဲပူၤအဖၢမုၢ်အဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲန့ၣ်လီၤ.
မဲၢ်လးဒဲကဝီၤအပူၤ စးထီၣ်ဖဲပှၤဒဲကဝီၤဖိဟးထီၣ်လဲၤတုၤမၤတၢ်လၢ(လါမယါ)ကျီးပူၤလၢကၠီၣ်တဲၣ်တၢ်မၤကစၢ်ဟဲကိးဝဲလၢ အဖိးသဲစးအံၤဝံၤလီၢ်ခံန့ၣ် သးစၢ်လၢအလဲၤမၤတၢ်မၤဖဲန့ၣ်တဖၣ်တနီၤ တီၣ်ထီၣ်ဝဲတၢ်ဂီၤမူလၢအဘၣ်ဃးတၢ်ဖံးတၢ်မၤတၢ်ကီတၢ်ခဲ တၢ်အိၣ်သးလၢအဝဲသ့ၣ်သဂၢၢ်ဘၣ်ဝဲသ့ၣ်တဖၣ်အိၣ်ထီၣ်ဝဲဖျိဖျိဖျါဖျါလၢ(social media)အပူၤန့ၣ်လီၤ.
