ကျိဖးဒိၣ်အဃိ မၠၣ်ဝတံၣ်ဝ့ၢ်ဃၢၤကမျၢၢ်ဒီဖိမိၢ်သံ(၂)ဂၤ ဒီး ကၠဲးထိၣ်ကီၢ်ဆၣ်ပူၤ ကမျၢၢ်ပိၥ်မုၣ်ဘၣ်ဒိ ၁ ဂၤ

လါအီးကထိဘၢၣ် ၂၃ သီ, ၂၀၂၅ နံၣ်, ခ့ၣ်အဲးစံၣ်

ဖဲမဟါလါအီးကထိဘၢၣ် ၂၂ သီအနံၤန့ၣ် လၢခ့ၣ်အဲးယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်ဝတံၣ်ဝ့ၢ်ဃၢၤ မ့လဲၣ်ပၤသဝီတကပၤန့ၣ် ခီဖျိပယီၤသုးခးလီၤကျိဖးဒိၣ်အဃိ ကမျၢၢ်ဒီဖိမိၢ်သံဝဲ ၂ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ

ဖဲမဟါဂီၤခီအဆၢကတီၢ် လၢလ့က့ၣ်ကိၥ်ဝ့ၢ်သီ မ့လဲၣ်ပၤသဝီအခိၣ်အဃၢၤ တၢ်ဒုးကဲထီၣ်ဝဲလၢပယီၤသုးဒီးဟီၣ်ကဝီၤ ကညီ ဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤဒိၣ်ဒိၣ်မုၢ်မုၢ်ဒီး ဖဲန့ၣ်ခီဖျိပယီၤသုးတကပၤခးလီၤ ကျိဖးဒိၣ် အဃိ ဘၣ်သံဝဲ ဖိသၣ်အမိၢ်ဃုၥ်ဒီးအဖိလၢအသးနံၣ်ကအိၣ်ဒံးဒၣ်ထဲ(၂)နံၣ်ခိၣ်ဃၢၤအံၤန့ၣ်လီၤ.

“ဖဲမဟါန့ၣ်လၢမ့လဲၣ်ပဲၤသဝီအခိၣ်အဃၢၤန့ၣ်တၢ်ဒုးကဲထီၣ်လီၤ.ပယီၤသုးခးလီၤကျိဖးဒိၣ်န့ၣ်လီၤတဲၥ်လၢမ့လဲၣ်ပၤသဝီဃၢၤအဃိ ပှၤသံခံဂၤန့ၣ်အဒီဖိမိၢ်လီၤ.တၢ်လီၢ်ဖဲန့ၣ်တဖၣ်န့ၣ်ပှၤသဝီဖိကမျၢၢ်ဃ့ၢ်ဃၥ်ဖးယံၤလံ.တနံၤအံၤဒုတနၢ်ဟူတၢ်ဒုးကဲထီၣ်ဘၣ်အဂၢၢ်လီၤမီၤနီၤ”အဂ့ၢ်န့ၣ် ကီးတရံးကီၢ်ဆၣ်ခိၣ် ပဒိၣ်စီၤဖၣ်ထယါ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဒ်န့ၣ်အသိးဖဲမဟါလါအီးကထိဘၢၣ် ၂၂ သီ ဂီၤခီ ၁၀း၀၀ နၣ်ရံၣ်ဘျဲၣ်အဆၢကတီၢ် တၢ်ဒုးကဲထီၣ်တအိၣ် ပယီၤသုးခီၣ်ချ့သုးရ့ၣ် (ခမရ-၅၉၈) လၢအိၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီထံးကီၢ်ဆၣ်ပူၤ စလိၣ်ကၠံအံၤတဖၣ်ခးလီၤစိဃီၤဝဲ(၈၁ မမ) ကျိဖးဒိၣ် ၂ ဖျၢၣ် ဆူ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဝီၢ်က့ကရူၢ်ပူၤန့ၣ်လီၤ.

ပယီၤသုးခးလီၤကျိဖးဒိၣ်ဘျီဝဲအံၤခီဖျိလီၤတဲၥ်ပိၢ်ဖးထီၣ်ဝဲလၢ ဝီၢ်က့ၤသဃၢၤအဃိ သဝီဖိ ဒီၤမဲၣ်ကံၤ(၆၂)နံၣ်အံၤ ကျိဖးဒိၣ်အက့ အခီဘၣ်ဝဲအခံကိၢ်လီၤဖျိဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ်တကီၢ်ခါခဲအံၤလၢမိၣ်ပလ့ၤ-ကၠဲးထိၣ်ဝ့ၢ်အဘၢၣ်စၢၤကျဲဒီတကျိၤန့ၣ် ပယီၤသုးဟူးဂဲၤဟဲ အါထီၣ်ဝဲဒၣ်န့ၣ်လီၤ.

ဒ်န့ၣ်အသိးတကီၢ်ခါခဲအံၤလၢမၠၣ်ဝတံၣ်ဝ့ၢ်ဃၢၤ ဖလူ,မ့လဲၣ်ပဲၤ,အ့ၤကၠ့မၠဲၣ်,ပဟံၣ်ကျိး,ထံမဲး၀ါခံသဝီတကပၤန့ၣ်စ့ၢ်ကီး ဒုးယၤတၢ်ဖ့ၣ်စၢ ဆဲးကဲထီၣ်ဒံးဝဲလၢပယီၤသုးဒီးတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤအဂ့ၢ်န့ၣ် လီၢ်ကဝီၤကမျၢၢ်တဖၣ်စံးဝဲန့ၣ် လီၤ.