လါအီးကထိဘၢၣ် ၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်(သုးက့-၄)တၢ်ပၢဟီၣ်ကဝီၤအပူၤစးထီၣ်လၢလါစဲးပထ့ဘၢၣ် ထီၣ်(၁)သီအနံၤတုၤလီၤလၢလါစဲးပထ့ဘၢၣ်(၃၀)သီလၢတလါအတီၢ်ပူၤ,ပယီၤသုးဖိဟဲက့ၤဟ့ၣ်လီၤအသးဒီးတၢ်ဖီၣ်ချုးန့ၢ်လၢတၢ်ဒုးပူၤခဲလၢၥ်အိၣ်ဝဲ(၁၇)ဂၤအဂ့ၢ်ဘျံးဒဝဲၢ်ကီၢ်ရ့ၣ်လါစဲးပထ့ဘၢၣ်တၢ်ပၥ်ဖျါတဖၣ်ပူၤအသိးသ့ၣ်ညါဘၣ်န့ၣ်လီၤ.
ပယီၤသုးဖိလၢဟဲက့ၤဟ့ၣ်လီၤအသးဒီးတၢ်ဖီၣ်ချုးန့ၢ်အီၤ(၁၇)ဂၤအံၤ, ဟဲက့ၤဟ့ၣ်လီၤအသးလၢကညီဒီကလုၥ်တၢ် ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်-၄, သုးရ့ၣ်-၁၁ အစုပူၤ(၆)ဂၤ, လၢကညီဒီကလုၥ်ဂၢၤသးကရၢသုးရ့ၣ်(၇)အစုပူၤ(၇)ဂၤ ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၁၂)ဖီၣ်ချုးန့ၢ်ဝဲလၢတၢ်ဒုးအပူၤ(၄)ဂၤအဂ့ၢ်ပၥ်ဖျါဝဲန့ၣ်လီၤ.
ဒ်န့ၣ်အသိးပယီၤသုးဖိလၢအဟဲက့ၤပၥ်လီၤတၢ်စုကဝဲၤသ့ၣ်တဖၣ်အံၤအါဒၣ်တၢ်က့ၢ်န့ၣ်မ့ၢ်ဝဲပှၤသ့ၣ်တဖၣ်လၢသုးကီၣ်ကးဖီၣ်ဆူၣ်မၢဆူၣ်ကဲသုးသ့ၣ်တဖၣ်ဒီးမ့ၢ်လၢနီၢ်ကစၢ်တအဲၣ်ဒိးကဲသုးဘၣ်အဃိဃ့ၢ်ဖျိးထီၣ်ဒီးဟဲက့ၤဟ့ၣ်လီၤအသးလၢ(သုးက့-၄)အစုပူၤဒ်အံၤလီၤအဂ့ၢ်ကီၢ်ရ့ၣ်တၢ်ပၥ်ဖျါအပူၤသ့ၣ်ညါဘၣ်စ့ၢ်ကီးန့ၣ်လီၤ.
ဒ်လံၥ်တၢ်ပၥ်ဖျါပူၤအသိးန့ၣ်ပယီၤသုးဖိလၢဟဲက့ၤဟ့ၣ်လီၤအသးသ့ၣ်တဖၣ်ဟဲက့ၤစိၥ်ဃုၥ်ဝဲတၢ်စုကဝဲၤ,တၢ်ပီးတၢ်လီတအိၣ်နီမံၤဘၣ်အသိးမ့မ့ၢ်ပယီၤသုးဖိလၢတၢ်ဖီၣ်န့ၢ်ဝဲ(၄)ဂၤသ့ၣ်တဖၣ်န့ၣ်တၢ်မၤန့ၢ်ဃုၥ်ဝဲ MA1ကျိ (၄) ခိၣ်, ကျိချံ (၁၀၃၀) ဖျၢၣ်, ကျိဆၣ်ဒၢ (၁၆) ဘ့ၣ်န့ၣ်လီၤ.
လၢန့ၣ်အမဲၥ်ညါဘျံးဒဝဲၢ်ကီၢ်ရ့ၣ်(သုးက့-၄)တၢ်ပၢဟီၣ်ကဝီၤအပူၤဖဲအပူၤကွံၥ်လါယူၤလံဒီတလါအတီၢ်ပူၤစ့ၢ်ကီးန့ၣ် ပယီၤသုးဖိဟဲက့ၤပၥ်လီၤတၢ်စုကဝဲၤအိၣ်ဝဲခဲလၢၥ်အဂၤ(၁၀)အဂ့ၢ်ဒ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
