လါအီးကထိဘၢၣ် ၃သီ, ၂၀၂၅, ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်(နဘူ)တန့ခၠါကီၢ်ဆၣ်ထံဖိစီသဝီခိၣ်ထိးကျဲအပူၤပီၢ်(၅၀၀)မ့ၣ်ပိၢ်လီၤတဲၥ်ဝံၤအလီၢ်ခံ,ကမျၢၢ်လီၢ်ကဝီၤဖိတဖၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ်,သဝီလီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. အပူၤကွံၥ်မဟါလါအီးကထိဘၢၣ်(၂)သီမုၢ်နၤခီ(၁၁)နၣ်ရံၣ်အဆၢကတီၢ်သဝီခိၣ်ထိးကျဲသီခါဖၠၣ်မဲၥ်ညါတၢ်ပျီတတီၤအပူပယီၤသုးပီၢ်(၅၀၀)မ့ၣ်ပိၢ်(၂)ဖျၢၣ်လီၤတဲၥ်ဝဲဝံၤအလီၢ်ခံ,ကမျၢၢ်လီၤကဝီၤဖိတဖၣ်ပျံၤတၢ်ဖုးတၢ်ဒီးဃ့ၢ်ထီၣ်မှံကွံၥ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
ပယီၤသုးကရူၢ်အမ့ၣ်ပိၢ်လီၤတဲၥ်ဝဲအံၤကမျၢၢ်တၢ်ဘၣ်ဒိဘၣ်ထံးတအိၣ်ဝဲဘၣ်ဆၣ်,ကမျၢၢ်လီၤကဝီၤဖိတဖၣ်ပျံၤတၢ်ဖုးတၢ်အဖီခိၣ်ဃ့ၢ်ထီၣ်မံဝဲတုၤလၢခဲအံၤဒီးအိၣ်ကတီၤသးလၢကသုးလီၢ်သုးကျဲအသိးတနီၤစိၥ်တၢ်ဖိတၢ်လံၤသုးလီၢ်သုးကျဲအိၣ်ဝဲလံအဂ့ၢ်,ထံဖိစီသဝီလီၢ်ကဝီၤပိၥ်ခွါတဂၤစံးဝဲဒၣ်ဒ်အံၤန့ၣ်လီၤ.
“ထံဖိစီသဝီမဟါတၢ်သီၣ်ဝံၤအလီၢ်ခံပှၤပျံၤတၢ်ဖုးတၢ်ဃ့ၢ်ထီၣ်မံကွံၥ်ဝဲဒၣ်တုၤခဲအံၤန့ၣ်လီၤ.ယဲနါက့ယဟးစံၣ်မံလီၤ.ခဲအံၤယစိၥ်ထီၣ်ယတၢ်ဖိတၢ်လံၤအဖၢမုၢ်စ့ၢ်ကီးလီၤ.တနံၤအံၤသဝီပူၤတၢ်အိၣ်ဘှ့ၣ်ကလးလီၤ.ပှၤတနီၤအိၣ်ကတီၤထီၣ်သး,စိၥ်ထီၣ်တၢ်ဖိတၢ်လံၤအိၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ဟီၣ်ကဝီၤပူၤတၢ်ဒုးကဲထီၣ်တအိၣ်ဝဲဒၣ်ဒီးတၢ်ဒုးကဲထီၣ်ဝဲလၢကီးတရံးမၠးပတဲၤတကပၤဘၣ်ဆၣ်ခီဖျိပယီၤသုးကရူၢ်ခးနါစိၤတၢ်အဃိကျိချံမ့တမ့ၢ်မ့ၣ်ပိၢ်လီၤတဲၥ်ဝဲလၢသဝီပူၤခဲအံၤခဲအံၤအိၣ်ဝဲအဂ့ၢ်,လီၢ်ကဝီၤပိၥ်ခွါတဂၤအံၤစံးအါထီၣ်ဝဲဒၣ်န့ၣ်လီၤ.
ထံဖိစီသဝီအံၤ,သဝီလီၢ်ကဝီၤဖိထူလံၤတဖၣ်အမဲၥ်ညါကီးတရံးကမျၢၢ်လီၢ်အိၣ်ကမှံဖိတဖၣ်လဲၤအိၣ်ဆိးအိၣ်ကဒုဝဲသးအါအါဂီၢ်ဂီၢ်အိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
ဒီးကီးတရံးကမျၢၢ်ပှၤဃ့ၢ်တၢ်ဒုးလီၢ်အိၣ်ကမှံဖိသ့ၣ်တဖၣ်အံၤအပူၤကွံၥ်(၂၀၂၃)နံၣ်အပူၤတၢ်ဒုးကဲထီၣ်ဝဲလၢပယီၤသုးဒီးတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤအဃိ,ဃ့ၢ်ထီၣ်အိၣ်ကဒုတ့ၢ်ဝဲအသးဖဲထံဖိစီသဝီပူၤအဂ့ၢ်,ကမျၢၢ်လီၢ်ကဝီၤဖိတဖၣ်စံးဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိး,တကီၢ်ခါခဲအံၤသဝီလီၢ်ကဝီၤဖိတဖၣ်အနီၢ်ကစၢ်ဒၣ်လဲၥ်ဃ့ၢ်ထီၣ်ကွံၥ်ဝဲအဃိကမျၢၢ်ပှၤလီၢ်အိၣ်ကဒုဖိတဖၣ်ဘၣ်ဃ့ၢ်ထီၣ်ဃုၥ်ဝဲဒီးအဝဲသ့ၣ်တဖၣ်အံၤဃ့ၢ်ထီၣ်သကိးဝဲဆူခိၣ်ဃၢၤသဝီတဖၣ်အပူၤအိၣ်ဝဲအဂ့ၢ်သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ.
