လါအီးကထိဘၢၣ် ၂၂သီ, ၂၀၂၅နံၣ်,ခ့ၣ်အဲးစံၣ်.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ရမၤတံဝ့ၢ်ကလံၤထံး တၢ်လံၣ်အီၣ်လီအီၣ်ကျိၣ်စ့အလီၢ်လၢအမံၤဟူသၣ်ဖျါတခါလၢအမ့ၢ် KK park အပူၤပှၤမၤတၢ်ဖိတဖၣ်န့ၣ် စးထီၣ်ဖဲမဟါလါအီးကထိဘၢၣ် (၂၁)သီဟါခီအဆၢကတီၢ်န့ၣ် BGF တၢ်ရဲၣ်တၢ်ကျဲၤအဖီခိၣ် တၢ်သုးကွံၥ်အလီၢ်အကျဲအဂ့ၢ် သ့ၣ်ညါဘၣ်ဒ်ပှၤလီၢ်ကဝီၤဖိစံးဝဲဒၣ်အသိးန့ၣ်လီၤ.
KK park ကရၢၢ်ပူၤပှၤမၤတၢ်ဖိလၢအကယၤသ့ၣ်တဖၣ်အံၤ စးထီၣ်ဖဲမဟါအနံၤန့ၣ် တၢ်တီဆှၢအဝဲသ့ၣ်ဒီး BGF သိလ့ၣ်အဒိၣ်အဆံးဒီးပှၤသ့ၣ်တဖၣ်န့ၣ် အါတက့ၢ်လီၤဂၥ်ပှၤတရူးဖိအဂ့ၢ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒၣ်န့ၣ်လီၤ.
အဝဲစံးဝဲဒၣ်လၢ“ဖဲအံၤန့ၣ်တၢ်ကိးဝဲလၢ AA side န့ၣ်လီၤ. AA side အတြဲၤန့ၣ်အိၣ်ဝဲ ၁,၂,၃,၄ ဒီးတုၤဖဲလဲၣ်န့ၣ်တသ့ၣ်ညါဘၣ်.ပှၤကညီသုးဖှိၣ်သးဖဲန့ၣ်ဖးအါညါန့ၣ်လီၤ.အါတက့ၢ်မ့ၢ်ပှၤတရူးဖိန့ၣ်လီၤ. ဘၣ်တၢ်စိၥ်တီဆှၢအဝဲသ့ၣ်ဒီး BGF သိလ့ၣ်န့ၣ်လီၤ. သိလ့ၣ်(၆)ပၣ်မုၢ်ဆ့ၣ်မုၢ်ဂီၤစ့ၢ်ကီးပၣ်ဃုၥ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဖဲအပူၤကွံၥ်လါအီးကထိဘၢၣ်(၁၉)သီအနံၤ KK park လၢအမံၤဟူသၣ်ဖျါလၢတၢ်လံၣ်အီၣ်လီအီၣ်ကျိၣ်စ့လၢ(Online)ပူၤဝဲအံၤန့ၣ် ပယီၤသုးဝၣ်နုၥ်ရှဲလဲဝဲဒၣ်အဂ့ၢ် ဘိးဘၣ်ရၤလီၤဝဲအိၣ်ဘၣ်ဆၣ် အဝဲသ့ၣ် တၢၣ်ပီၣ်တဲသကိးဝဲဒၣ်တၢ်ဒီး BGFခိၣ်နၢ်ဝံၤမးဝၣ်နုၥ်ဒိဝဲဒၣ်တၢ်ဂီၤတၢ်ဖီၣ်အဂ့ၢ် သ့ၣ်ညါဘၣ်ဒ်ပှၤလၢဘူးဒီး BGF သ့ၣ်တဖၣ်စံးဝဲဒၣ်အသိးန့ၣ်လီၤ.
ဘၣ်ဃးဒီးသုးက့ၤ KK Park ကရၢၢ်ပူၤတၢ်သုးကွံၥ်ပှၤမၤတၢ်ဖိလီၢ်ကျဲတၢ်ဂ့ၢ်အံၤန့ၣ် ခီဖျိသုးကရူၢ်အတၢ်ဆီၣ်သနံးဒီး တၢ်ဖံးတၢ်မၤဝဲအံၤအဃိတၢ်ကရၢကရိအမံၤဟးဂီၤဝဲဒၣ်အဖီခိၣ် ပှၤလၢအဲၣ်ဒိးက့ၤတဖၣ်တၢ်ပျဲက့ၤအဝဲသ့ၣ်လၢနီၢ်ကစၢ်လီၢ်ကျဲအဂ့ၢ် BGF သုးဟီၣ်ကဝီၤနီၣ်ဂံၢ်(၂)အသုးဟီၣ်ကဝီၤခိၣ် သုးခိၣ်ကျၢၢ်ဖိ စီၤတ့ၤဝ့ စံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲဒၣ်လၢ“ပမၢအဝဲသ့ၣ်က့ၤကွံၥ်န့ၣ်လီၤ.ခီဖျိလၢမံၤထီၣ်သၣ်ထီၣ်လၢကၠါဖၠၣ်တၢ်လံၣ်တၢ်လီတၢ်ဖံးတၢ်မၤအဃိန့ၣ် တၢ်ကရၢကရိအမံၤစ့ၢ်ကီးဟးဂီၤဝဲဒၣ်န့ၣ်လီၤ.ပယီၤတကပၤန့ၣ်တၢ်ဆီၣ်နံးအိၣ်စ့ၢ်ကီးန့ၣ်လီၤ.ပတဲအဝဲသ့ၣ်လၢဘၣ်ဃးတၢ်လံၣ်တၢ်လီ,တၢ်တဂ့ၤတၢ်တဝါန့ၣ်သုတဘၣ်မၤလၢၤဘၣ်.အဃိန့ၣ်ပမၢအဝဲသ့ၣ်က့ၤကွံၥ်န့ၣ်လီၤ.က့ၤဝဲဒၣ်ဒ်အနီၢ်ကစၢ်တၢ်ဆဲးကျိးအိၣ်အသိးန့ၣ်လီၤ.တၢ်တသုးအလီၢ်လၢသ့ၣ်ကတ့ၤဘၣ်.ပှၤလၢအဲၣ်ဒိးက့ၤတဖၣ်န့ၣ်က့ၤဝဲဒၣ်လၢကစၢ်သ့ၣ်ညါသ့ၣ်ခိးကျဲန့ၣ်လီၤ.က့ၤဝဲဒၣ်လၢအကစၢ်တၢ်ဆဲးကျိးဒၣ်ဝဲန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဘၣ်ဃးတၢ်ဂ့ၢ်ဝဲအံၤန့ၣ် မ့ၢ်တၢ်ဆှၢက့ၤပှၤမၤတၢ်ဖိဧါမ့တမ့ၢ် တၢ်သုးကွံၥ်ပှၤမၤဝၢ်ဖိသ့ၣ်တဖၣ်အံၤအလီၢ်အကျဲဧါန့ၣ် ခ့ၣ်အဲးစံၣ် ဆဲးမၤလီၤတံၢ်ဝဲဒၣ်အဖၢမုၢ်န့ၣ်လီၤ.လီၢ်ကဝီၤပှၤဟ့ၣ်တၢ်ကစီၣ်တဂၤစံးဝဲဒၣ်လၢ ခီဖျိလၢ န့ၣ်ပၠံၣ်တီၣ် သုးကရူၢ်သ့ၣ်ညါဝဲတၢ်ဂ့ၢ်အံၤအဃိ KK park ပှၤမၤတၢ်ဖိသ့ၣ်တဖၣ်အံၤတၢ်သုးကွံၥ်အလီၢ်အကျဲလၢ ရၤမတံဝ့ၢ်တၢ်လီၢ်တတီၤအဂ့ၢ် စံးဝဲဒၣ်န့ၣ်လီၤ.
ဖဲအပူၤကွံၥ်လါအီးကထိဘၢၣ်(၁၄)သီအနံၤ KK park ဟီၣ်ကဝီၤပူၤအံၤ ဘၣ်တၢ်ဒီၣ်တဲၥ်ကွံၥ် Internet ဘၣ်ဆၣ် ကၠါဖၠၣ်တၢ်ဖံးတၢ်မၤသ့ၣ်တဖၣ်အံၤလဲၤတရံးသးအိၣ်ဒ်ဝဲအဖၢမုၢ်အဂ့ၢ် AFP ဃုထံၣ်သ့ၣ်ညါဝဲတဆီဝံၤကီၢ်ပူၤ,ကီၢ်ချၢ တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
KK Park တၢ်လီၢ်အံၤန့ၣ်စးထီၣ်ဖဲ ၂၀၂၃နံၣ်အဆၢကတီၢ်စးထီၣ်မံၤဒိၣ်ထီၣ်ဝဲဒၣ်လၢ ခၣ်စံၣ်နိၣ်,ဟီးတဲး,တၢ်အီၣ်ကျး, Night club, အမဲၥ်ညါ မုၣ်ခွါတၢ်မုၥ်ဖံးမုၥ်ညါတၢ်ဖံးတၢ်မၤအိၣ်ဝဲအသိး တၢ်လံၣ်အီၣ်ကျိၣ်စ့လၢ(Online)ပူၤအိၣ်ဝဲဒ် စွ့ၣ်ကိၣ်ကိၤဝ့ၢ်သီတၢ်တိၤကျဲၤတၢ်လီၢ်အသိးဒီးအိၣ်ဆီလီၤဝဲအသးလၢ ရၤမတံဝ့ၢ်ယၢ်ပၤယၢ်ပၤန့ၣ်လီၤ.