လါနိၣ်ဝ့ဘၢၣ် ၉ သီ, ၂၀၂၅ နံၣ်, ခ့ၣ်အဲးစံၣ်
ကညီပှၤသးဝံၣ်တၢ်ဖိ Happy Poe လၢအဘၣ်တၢ်သ့ၣ်ညါအီၤအါဝဲအံၤ ဖဲမဟါလါနိၣ်ဝ့ဘၢၣ် ၈ သီ ဟါခီ ၈ နၣ်ရံၣ် ခိၣ်ဃၢၤ အဆၢကတီၢ်န့ၣ် စူၥ်ကွံၥ်သးခီဖျိလီၤအုးသံလၢထံအံၤဖဲကီၢ်ကၠီၣ်တဲၣ် မဲၢ်လး-မဲၢ်ဆီးဝ့ၢ်ဘၢၣ်စၢၤ မဲၢ်ရမၣ်ဝ့ၢ်ဃၢၤ မီဝါသဝီအဂ့ၢ်န့ၣ် သ့ၣ်ညါဘၣ်န့ၣ်လီၤ.
(Happy Poe)လၢအိၣ်ဆိးဝဲဖဲမဲၢ်ရမၣ်အံၤ ဖဲမဟါကဘၣ်ဖဲဟါခီ ၇ နၣ်ရံၣ်ဃၣ်ဃၣ်အဆၢကတီၢ်န့ၣ် အဝဲဒီးအသကိးခံဂၤလဲၤ ယူၤအီၣ်ဝဲညၣ်လၢမဲၢ်ရမၣ်ဝ့ၢ်ဆၢလၥ်မီဝါသဝီ ထံကမါတဘ့ၣ်အပူၤဒီး ဖဲယူၤအီၣ်ညၣ်အဆၢကတီၢ်လီၤအုးသံလၢထံကျါ ဘၣ်ဟဲ ကဲထီၣ်ဒ်အံၤလီၤအဂ့ၢ်န့ၣ် အသမူသကိးလၢဘူးဒီးအီၤတဖၣ် စံးဝဲအသိးသ့ၣ်ညါဘၣ်န့ၣ်လီၤ.
ဘၣ်ဃး(Happy Poe)စူးကွံၥ်သးလီၤအုးသံလၢထံကျါဘျီဝဲအံၤအဂ့ၢ်အကျိၤကဲထီၣ်သးဒ်လဲၣ်န့ၣ် အသကိးတဂၤ စံးဝဲလၢ “တၢ်ကဲထီၣ်သးန့ၣ်အလဲၤယူၤထံ တမ့ၢ်လၢထံကျိပူၤဘၣ်လၢကမါပူၤလီၤ. နါက့ကမါတဘ့ၣ်အပူၤန့ၣ်နီၣ်တီၣ် တစဲးဖိ.နီၢ်နီၢ်န့ၣ် အကလဲၤယူၤ အီၣ်ညၣ်န့ၣ်အလဲၤကိးသရၣ်အိၣ်တဂၤ.သရၣ်တဂၤန့ၣ်တဲအီၤလၢနဘါယွၤတနံၤအံၤလီၤတလိၣ်လဲၤလၢၤဘၣ် .မ့ဝံၤတၢ်စူၤဒီတနံၤတၢ်ဂိၢ်လဲၤက့ၤလၢခံပှၤတဲအီၤဒ်န့ၣ်.တဲဝဲလၢသါအဲၣ်ဒိးယူၤထံအဃိလဲၤဝဲန့ၣ် .လဲၤယူၤထံဘျီ အခိၣ်တိတထံၣ် ခံထံၣ်န့ၣ်အဟဲက့ၤမီၤထီၣ်ခိၣ်ဒံး.နၤယူၤယၤယူၤဘျီပှၤတနီၣ်ပလီၢ်သးဘၣ်.လၢပှၤနီၣ်ပလီၢ်သးမးအတဟဲက့ၤထီၣ်လၢၤဘၣ်ဘျီပှၤလဲၤလူၤကွၢ်ဘျီပှၤထံၣ်ကဒါလၢထံကျါနီၣ်ဖီလၥ်န့ၣ်ဘျီပှဲၤလဲၤထုးထီၣ်က့ၤအီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ် န့ၣ်လီၤ.
(Happy Poe)လီၤအုးလၢထံကဲထီၣ်သီသီတဘျီဃီအခါန့ၣ်တၢ်လဲၤဆှၢအီၤဆူမဲၢ်ရမၣ်တၢ်ဆါဟံၣ်ဖးဒိၣ်ဘၣ်ဆၣ် တၢ်လူၤအသး သမူတချုးဝဲ လၢၤဘၣ်ဒီးတနၤဃီဖဲန့ၣ်တၢ်က့ၤဆှၢလီၤအီၤဆူဖၣ်အၣ်ကီၢ်ရ့ၣ်(သုးက့ ၇)လူၢ်ပျဲၢ်ကီၢ်ဆၣ် ကၢၢ်ဂီၤသဝီ အနီၢ်ကစၢ်ဒ့ ပိၥ်လီၢ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိး(Happy Poe)စူၥ်ကွံၥ်သးမဟါဝံၤဖဲတနံၤအံၤလါနိၣ်ဝ့ဘၢၣ် ၉ သီ မုၢ်ဃ့ၢ်လီၤ ၂း၀၀ နၣ်ရံၣ်အဆၢကတီၢ်န့ၣ် တၢ်ကလဲၤပၥ်လီၤကွံၥ် အဟီၣ်ခိၣ်ဒဲအဂ့ၢ်န့ၣ် အသမူသကိးစံးဝဲဒၣ်န့ၣ်လီၤ.
ကညီပှၤသးဝံၣ်တၢ်ဖိ(Happy Poe)စူၥ်ကွံၥ်သးအကတီၢ်န့ၣ် အသးနံၣ်ကအိၣ်ဒံးဒၣ်ထဲ(၂၈)နံၣ်ခိၣ်ဃၢၤ မ့ၢ်ပှၤလၢအိၣ်ဒီး အဟံၣ်ဖိဃီဖိအဃိ အမါဃုၥ်ဒီးအဖိမုၣ်ဖိခွါ(၂)ဂၤအိၣ်လီၤတဲၥ်ကွံၥ်ဝဲဒၣ်န့ၣ်လီၤ.
(Happy Poe)အံၤမ့ၢ်ပှၤသးဝံၣ်တၢ်ဖိတဂၤလၢအိၣ်ဒီးအကလုၢ်ဖိလၢအမုၥ်လီၤဆီလီၤသယုၢ်သညိဒီး ဒ်န့ၣ်အသိး တၢ်သးဝံၣ် လၢအထုးထီၣ်သးဝံၣ်ဝဲသ့ၣ်တဖၣ်စ့ၢ်ကီး ပှၤသူၣ်ဘီၣ်သးစၢ်လၢၤဃုၥ်ဒီးဖိဒံဖိသၣ်သ့ၣ်တဖၣ်(ကၠဲး) ဘၣ်သူၣ်ဘၣ်သးဝဲ ဒိၣ်မး တကးဒံးဘၣ် တၢ်သူၣ်ဝံၣ်သးဆၢလၢအသးဝံၣ်ဝဲတဖၣ်အကျါပၣ်ဃုၥ်ဝဲဒီးထံကီၢ်တၢ်သးဝံၣ်အါမးအဃိ ဘၣ်တၢ်သ့ၣ်ညါအီၤ အါဝဲလၢကီၢ်ပူၤကီၢ်ချၢ ထံဆၢကီၢ်ဆၢကညီဖိအကျါန့ၣ်လီၤ.
(Happy Poe)အိၣ်မူဒံးအခါမ့ၢ်ပှၤဒ်လဲၣ်တဂၤလဲၣ်န့ၣ် အသကိးဖိတဂၤက့ၤတဲပၠးကဒါဝဲလၢ“လၢပဂီၢ်န့ၣ်ကဲထီၣ်တၢ်လီၤသး ဘၣ်ဒိဘၣ်ဒိၣ်ညါလီၤ.အဝဲန့ၣ်ပလဲၤဟးလၢအဟံၣ်မၢ်မၢ်လီၤ.အဝဲန့ၣ်အဲၣ်အသမူသကိးဒိၣ်မး.မ့ဝံၤအီၤန့ၣ်အထီၣ်ပှၢ်စိဘၣ်ဆၣ် အဲၣ်အဟံၣ်ဖိဃီဖိ,ပၥ်အဟံၣ်ဖိဃီဖိလၢပှဲၤလီၤ.မ့တဲန့ၣ်တလၢၤနီဘျီလၢၥ်ဘၣ်.ပနၢ်ဟူသီသီခါန့ၣ်ပလီၤဘှါဒီတဂၤလီၤ.တၢ်သူၣ်ဝံၣ်သးဆၢန့ၣ်အဲၣ်ဝဲဆ့ၣ်နီၤသးဝံၣ်တၢ်ကိးမုၢ်နံၤလီၤ.အဟံၣ်အဃီန့ၣ်(ခဲမရၢ်ဒၢ),စတူးဒံးယိၤခါအိၣ်ခဲလၢၥ်လီၤ.အသမူသကိးလဲၤသးဝံၣ်တၢ်န့ၣ်တလၢၤစ့ဘၣ်(ဖြံ)လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်တၢ်သူၣ်ဝံၣ်သးဆၢအမဲၥ်ညါန့ၣ် ဖဲ(Happy Poe)အအိၣ်မူဒံးအခါမ့ၢ်ပှၤတဂၤလၢအဟးဃုအီၣ်ညၣ်မုၥ်ဝဲအဃိ ဖဲအချုုး အဆၢကတီၢ်န့ၣ်ညီနုၢ်ဖဲဟးဃုအီၣ်ညၣ်အခါန့ၣ်တီၣ်ထီၣ်ဝဲတၢ်ဂီၤမူ လၢအ(facebook)ပူၤအိၣ်အသိး တဘျီတခီၣ် ပၥ်ဖျါထီၣ်ဝဲအတၢ်ဟူး တၢ်ဂဲၤ လၢအဟူးအဂဲၤဝဲလၢတနံၤအဂီၢ်စ့ၢ်ကီးအိၣ်ဒီး တၢ်ဂီၤမူတၢ်ဟူးတၢ်ဂဲၤဖိလၢအပၥ်ဖျါထီၣ်ဝဲတဖၣ် ပှၤဟ့ၣ်ဂံၢ်ဟ့ၣ်ဘါ နုၥ်လီၤကွၢ်အတၢ်ဂီၤမူဖိအိၣ်ဝဲဒၣ်အါအါဂီၢ်ဂီၢ်န့ၣ်လီၤ.
