လါနိၣ်ဝ့ဘၢၣ် ၁သီ, ၂၀၂၅နံၣ်, ခ့ၣ်အဲးစံၣ်,
အပူၤကွံၥ်လါအီးကထိဘၢၣ်ဒီတလါအတီၢ်ပူၤ,ကီၢ်ကၠီၣ်တဲၣ်ကီၢ်ပယီၤကီၢ်ဆၢမဲၢ်လးကညီဘၣ်ကီဘၣ်ခဲဒဲကဝီၤ,ကဝီၤဒ့(B4B)(B3B)(B5B)(C2)(C1B)အပူၤ,ဒဲကဝီၤဖိ(၅)ဂၤစၢၢ်လီၤကိၥ်မၤသံလီၤအနီၢ်ကစၢ်သးကဲထီၣ်ဝဲအဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ပှၤလၢစၢၢ်လီၤကိၥ်မၤသံလီၤနီၢ်ကစၢ်သးသ့ၣ်တဖၣ်အံၤမ့ၢ်ဝဲ(နီၢ်မၣ်တ့ၤနူၣ်-၅၆နံၣ်)( စီၤဘံၣ်ယၤမံး-၃၇နံၣ်)(ဖုစီနီၤသးနံၣ်-၆၇နံၣ်)(စီၤသူၤရၣ်-၂၁နံၣ်)ဃုၥ်ဒီး(စီၤလါမုၢ်ထူ-၄၀)နံၣ်သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.
ဒီးပှၤဒဲကဝီၤဖိလၢအစၢၢ်လီၤကိၥ်မၤသံလီၤနီၢ်ကစၢ်သးသ့ၣ်တဖၣ်အံၤ,တၢ်သမံသမိးဃုထံၣ်သ့ၣ်ညါဘၣ်ဝဲလၢမ့ၢ်ပှၤတူၢ်ဘၣ်တၢ်ဆါထီရီၤဒီးမ့ၢ်ပှၤသူကသံၣ်မူၤဘှီးတဖၣ်အဂ့ၢ်,မဲၢ်လးဒဲကဝီၤခိၣ်စီၤစၢဒ့စံးဝဲဒ်အံၤန့ၣ်လီၤ.
အဝဲစံးဝဲလၢ“ကဲထီၣ်သးဒ်အံၤန့ၣ်အါတက့ၢ်ခီဖျိလၢတနီၤအသုတူၢ်ဘၣ်တၢ်ဆါထီရီၤဒီးတနီၤသူတၢ်မူၤတၢ်ဘှီးအဃိလီၤမီၤနီၤ.တမ့ၢ်လၢဒဲကဝီၤပူၤတၢ်ဃံးတၢ်စ့ၤအဃိဘၣ်.ဘၣ်မနုၤဃိလဲၣ်န့ၣ်ပကွၢ်က့ၤဆၢကတီၢ်ခဲအံၤန့ၣ်ဒဲကဝီၤပူၤတၢ်ခွဲးတၢ်ယၥ်အိၣ်ထီၣ်လၢတၢ်ဃုဖံးဃုမၤအသိး,တၢ်အီၣ်တၢ်အီစ့ၢ်ကီးဖဲအကြၢးကၢကီၣ်န့ၣ်ဘၣ်လီၢ်ဘၣ်စးဒံးဝဲဒၣ်လီၤ.အဃိန့ၣ်ပသမံသမိးက့ၤပှၤသ့ၣ်တဖၣ်အံၤန့ၣ်ပထံၣ်ဘၣ်တၢ်ဂ့ၢ်ခံထံၣ်လၢအမ့ၢ်တနီၤဘၣ်အီၣ်ဝဲတၢ်ဆါထီရီၤကသံၣ်,(ကသံၣ်ခရီနံး)တနီၤအီၣ်စဲၤကိၤကသံၣ်ဒီးတနီၤသူဝဲတၢ်မူၤတၢ်ဘှီးန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ပှၤလၢစၢၢ်လီၤကိၥ်မၤသံလီၤသးတဖၣ်အကျါတနီၤအပူၤကွံၥ်တၢ်ဖီၣ်ချူးဝဲအီၤလၢကသံၣ်မူၤဘှီးဂ့ၢ်ကျိၤအိၣ်ဝဲခဲအံၤခဲအံၤစ့ၢ်ကီးအဂ့ၢ်,ဒဲကဝီၤဘံၣ်ဘၢပှၤဘၣ်မူဘၣ်ဒါတဂၤစံးဝဲဒ်အံၤစ့ၢ်ကီးန့ၣ်လီၤ.
အဝဲစံးဝဲလၢ“ပှၤစၢၢ်လီၤကိၥ်တဖၣ်န့ၣ်အကျါန့ၣ်အပူၤကွံၥ်ပဖီၣ်ချူးဒီးကသံၣ်မူၤဘှီးအဘိၣ်အိၣ်န့ၣ်လီၤ.ပှၤသိၣ်ပှၤသီဝံၤပှၤပျၢ်လီၤက့ၤလီၤ.ကသံၣ်မူၤဘှီးအံၤဒဲကဝီၤပူၤပှၤဂုၥ်ကျဲးစၢးမၤစှၤလီၤနါက့တလီၤစှၤဘၣ်.တၢ်အိၣ်သးခဲအံၤဒုကသံၣ်ကသီဒုအါသပှၢ်လီၤ.ဖိသၣ်လၢသးနံၣ်တပှဲၤ(၁၁)နံၣ်ဒၣ်လဲၥ်သူဝဲဒၣ်အါမးန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ,အပူၤကွံၥ်လါအီးကထိဘၢၣ်အပူၤခီဖျိဒဲကဝီၤအပူၤတၢ်သံတၢ်ပှၢ်တၢ်မူးတၢ်ရၢ်ကဲထီၣ်သးအါဝဲအဃိ,တလါအံၤလါနိၣ်ဝ့ဘၢၣ်အပူၤကီၢ်ဆၣ်ပတီၢ်ကၠီၣ်တဲၣ်ခိၣ်နၢ်ပှၤဘၣ်မူဘၣ်ဒါဒိၣ်ထီတဖၣ်အတၢ်ရဲၣ်တၢ်ကျဲၤအိၣ်ဝဲလၢကနုၥ်လီၤကွၢ်ထံသမံသမိးတၢ်အိၣ်ဝဲအဂ့ၢ်,သ့ၣ်ညါဘၣ်ဒ်ဒဲကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ကီၢ်ကၠီၣ်တဲၣ်ကီၢ်ပယီၤကီၢ်ဆၢဘၣ်ကီဘၣ်ခဲဒဲကဝီၤတဖၣ်အကျါ,မဲၢ်လးကညီဘၣ်ကီဘၣ်ခဲဒဲကဝီၤအံၤမ့ၢ်ဝဲဒဲကဝီၤလၢအဒိၣ်ကတၢၢ်တဘ့ၣ်ဒီးပှၤကညီနီၢ်ဂံၢ်အါကတၢၢ်အသိး,တၢ်ဟုၣ်တၢ်ဘျၣ်အမဲၥ်ညါပှၤသူကသံၣ်မူၤဘှီး မ့ၢ်ဂ့ၤ,တၢ်မၤသံလိၥ်သးကဒဲကဒဲမ့ၢ်ဂ့ၤ,တၢ်မၤသံလီၤကစၢ်သးမ့ၢ်ဂ့ၤကဲထီၣ်သးအမျးကယၤအါန့ၢ်ဒံးဘၣ်ကီဘၣ်ခဲဒဲကဝီၤလၢအဂၤတဖၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,မဲၢ်လးကညီဘၣ်ကီဘၣ်ခဲဒဲကဝီၤအံၤအပူၤကွံၥ်(၂၀၁၇-၁၈)အပူၤတၢ်မၤသံလီၤက့ၤသးတၢ်မူးတၢ်ရၢ်ဒ်အံၤတဖၣ်ကဲထီၣ်တ့ၢ်သးအါကတၢၢ်တုၤလၢအဂၤ(၁၀)ဘျဲၣ်အိၣ်ဝဲအဂ့ၢ်,သ့ၣ်ညါဘၣ်ဒ်ဒဲကဝီၤခိၣ်နၢ်တဖၣ်အတၢ်မၤနီၣ်မၤဃါအိၣ်ဝဲအသိးန့ၣ်လီၤ.
