DKBA နဲၣ်လီၤတၢ်ကလုၢ်လၢ(ကၠါဖၠၣ်)ပှၤမၤတၢ်ဖိခဲလၢၥ်ကဟးထီၣ်ကွံၥ်လၢဟီၣ်ကဝီၤပူၤလၢအဆိအချ့

လါနိၣ်ဝ့ဘၢၣ် ၂၅ သီ, ၂၀၂၅ နံၣ်, ခ့ၣ်အဲးစံၣ်

လၢ(ကၠါဖၠၣ်)တၢ်ပၣ်ဃုၥ်ပၣ်ဂီၢ်အပူၤ DKBA ခိၣ်နၢ်ဒိၣ်ထီ(၄)ဂၤကီၢ်အမဲရံၣ်ကၤဘိးဘၣ်ရၤလီၤလၢကဟံဂ့ၢ်ဝီဝံၤလီၢ်ခံ ထံဂုၤ ကီၢ်ဂၤဃုၥ်ဒီးတရူး(ကၠါဖၠၣ်)ပှၤမၤတၢ်ဖိလၢအိၣ်ဂီၤလ့ၤဒီးကၠီးခဲးဟီၣ်ကဝီၤပူၤတဖၣ်ကဟးထီၣ်ကွံၥ်လၢအဆိအချ့အဂ့ၢ်န့ၣ် DKBA ထုးထီၣ်နဲၣ်လီၤဝဲကလုၢ်လံန့ၣ်လီၤ.

ဖဲတလါအံၤ ၁၂ သီအနံၤ ဒ်သိးမၠၣ်ဝတံၣ်ဟီၣ်ကဝီၤ(ကၠါဖၠၣ်)တၢ်လံၣ်အီၣ်လီအီၣ်တၢ်ဖံးတၢ်မၤကလီၤမၢ်ကွံၥ်အဂီၢ်န့ၣ် အမဲရံၣ် ကၤဒုးအိၣ်ထီၣ်(Scam Center Strike Force)ဝံၤ တကီၢ်ခါခဲအံၤကၠီးခဲးဒီးဂီၤလ့ၤဟီၣ်ကဝီၤလၢ(ကၠါဖၠၣ်)တၢ်လံၣ်အီၣ်လီအီၣ် တၢ်ဖံး တၢ်မၤအိၣ် ဆီလီၤသးအံၤ တၢ်နဲၣ်လီၤတၢ်ကလုၢ်လံလၢကဘၣ်ဟးထီၣ်ခဲလၢၥ်အဂ့ၢ်န့ၣ် DKBA စံးဝဲန့ၣ်လီၤ.

ဘၣ်ဃးတၢ်ဂ့ၢ်အံၤ DKBA သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ စံးဝဲလၢ“လၢပဟီၣ်ကဝီၤပူၤအံၤပတဲလီၤဝံၤလံ.ပဟ့ၣ်ပဝဲသ့ၣ် တၢ်ကဆၢ ကတီၢ်လၢအချ့လီၤ.ပတဲအဝဲသ့ၣ်လၢတၢ်တခါအံၤပတတူၢ်လိၥ်လၢၤဘၣ်. သုအိၣ်ဖဲအံၤတသ့လၢၤဘၣ်ဒီး သုကဘၣ် က့ၤက့ၤလီၤ.ပှၤဘၣ်မူဘၣ်ဒါမ့ဟဲလီၤကွၢ်တၢ်ဒုပမၤတဘၣ်ဘၣ်.အဃိပဟ့ၣ်သုတၢ်ဆၢကတီၢ်အခွဲးလၢအဂ့ၤကတၢၢ်လံ.ပှၤမ့ဟဲမၤဃံးဒုပဒီသဒၢတန့ၢ်လၢၤဘၣ်မီၤ.အဃိသုဂုၥ်ကျဲးစၢးဟးထီၣ်က့ၤလၢအချ့တဘိမီၤဒ်န့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.

တၢ်ကလုၢ်လၢတၢ်နဲၣ်လီၤဝဲလၢ(ကၠါဖၠၣ်)ပှၤမၤတၢ်ဖိကဘၣ်ဟးထီၣ်အံၤကအိၣ်ဒံးဒၣ်ထဲတနွံခိၣ်ဃၢၤဒံးလီၤအသိး ခဲအံၤလၢတၢ်နဲၣ် လီၤအဖီခိၣ်ဟးထီၣ်သုးလီၢ်သုးကျဲအိၣ်တနီၤလံဘၣ်ဆၣ်တနီၤန့ၣ်ဃ့ထီၣ်ဝဲလၢတရူးနံၣ်ထီၣ်သီဝံၤမးကဟးထီၣ်ကွံၥ်ဝဲအဂ့ၢ်န့ၣ် DKBA ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.

ဒ်န့ၣ်အသိးဘၣ်ဃး(ကၠါဖၠၣ်)ပှၤမၤတၢ်ဖိတၢ်ဂ့ၢ်အံၤဖဲမဟါလါနိၣ်ဝ့ဘၢၣ် ၂၄ သီအနံၤစ့ၢ်ကီး ဟီၣ်ကဝီၤအပူၤ ဖီၣ်စုကဝဲၤကရူၢ်ကရၢ တဒူၣ်ဂ့ၤတဒူၣ်ဂ့ၤ,ပှၤတဂၤဂ့ၤတဂၤဂ့ၤ တဘၣ်ဆှၢထီၣ်ဆှၢလီၤဝဲတရူးထံဖိကီၢ်ဖိဘၣ်ဒီး တၢ်မ့ထံၣ်ဝဲလၢပှၤဆှၢထီၣ်ဆှၢလီၤ ပှၤသ့ၣ်တဖၣ်အံၤန့ၣ်ကဖီၣ်ဟံဝဲဂ့ၢ်ဝီအဂ့ၢ်န့ၣ် (DKBA)ထုးထီၣ်ဝဲဂ့ၢ်ဂီၢ်အူ တၢ်ကလုၢ်ဒံးန့ၣ်လီၤ.

ဘၣ်ဆၣ်တချုး DKBA နဲၣ်လီၤတၢ်ကလုၢ်လၢကၠါဖၠၣ်ပှၤမၤတၢ်ဖိကဘၣ်ဟးထီၣ်လၢအဆိအချ့အိၣ်ထီၣ်ဒံးဘၣ်ဖဲလါနိၣ်ဝ့ဘၢၣ် ၂၁ သီအနံၤန့ၣ် လၢမ့လဲၣ်ပဲၤ(မင်းလက်ပံ)သဝီဃၢၤန့ၣ် ဟီၣ်ကဝီၤ(KNLA)သုးပၥ်ဖှိၣ် ထံၣ်န့ၢ်ဝဲ(ကၠါဖၠၣ်)တၢ်ဖံးတၢ်မၤလီၢ်တခါလၢ အဘၣ် တၢ်ဟံန့ၢ်ဝဲတၢ်ဘံၣ်တၢ်ဘၢလၢ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ကရၢကရိအံၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါစံးဝဲဖဲတနံၤအံၤန့ၣ်လီၤ.

ဟီၣ်ကဝီၤလၢ(ကၠါဖၠၣ်)တၢ်ဖံးတၢ်မၤအိၣ်ဆီလီၤသးအံၤ(DKBA)အမဲၥ်ညါဖီၣ်စုကဝဲၤကရူၢ်ကရၢလၢအဂၤအိၣ်ဆီလီၤသးဟူးဂဲၤဝဲအိၣ်အသိး လၢတၢ်စိၥ်ဆှၢဝဲတရူး(ကၠါဖၠၣ်)ပှၤမၤတၢ်ဖိအပူၤန့ၣ်စ့ၢ်ကီးဘၣ်တၢ်ဆီၣ်သနံးဝဲထဲ(DKBA)ကရူၢ်ကရၢလီၤအဃိ တၢ်ဆၢတဲၥ်လီၤဝဲလၢလ့ၤတက့ၤတၢ်တဘၣ်မၤလၢၤဝဲနီတဂၤဘၣ်ဘၣ်ဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ် သုးခိၣ်ကျၢၢ်ဖိ စီၤစ့ၤဝ့ စံးအါ ထီၣ်ဝဲန့ၣ် လီၤ.

“ဒ်သိးတီၢ်နီၢ်မုၢ်ထီၣ်ပဟီၣ်ကဝီၤပူၤ အံၤပှၤစိၥ်ဆှၢတရူးန့ၣ်ပပှၤပၣ်စ့ၢ်,ပှၤအဂၤစ့ၢ်ကီးပၣ်လီၤ.လၢခံဘျီမံၤထီၣ်က့ၤထဲ ပ(ဒံၣ်ခ့ၣ်ဘံၣ်အ့ၣ်) တဒူၣ်တထၢအံၤလီၤ.အဃိ လၢတၢ်တခါအံၤလ့ၤတက့ၤတဘၣ်မၤနီတဂၤလၢၤတဂ့ၤန့ၣ် ပဆၢတဲၥ်လၢ ပကဟံထီၣ်ဂ့ၢ်ဝီလီၤ.တမံၤဂ့ၤတမၠိဂ့ၤလၢပဟီၣ်ကဝီၤပူၤကၠါဖၠၣ်တၢ်ဖံးတၢ်မၤတခါအံၤပကမၤလီၤမၢ်ကွံၥ်လၢအချ့တဘိလီၤ.မ့ဘၣ်တဲပှၤဆီၣ်သနံးထဲပဟီၣ်ကဝီၤလဲလဲလီၤ.ပဟီၣ်ကဝီၤပူၤအံၤကလုၥ်ဒူၣ်အိၣ်.(BGF)အိၣ်,(KNU)အိၣ်ကိးဒူၣ်ဒဲးလီၤ.တမ့ၢ်လၢပပၢတဒူၣ်ပှၤပၣ်ဃုၥ်ပၣ်ဂီၢ်ကိးဒူၣ်ဒဲးဒ်န့ၣ်လဲၤသးဒ်န့ၣ်မီၤ”အဂ့ၢ်န့ၣ် စံးဝဲန့ၣ်လီၤ.

ဒ်(DKBA)ခိၣ်နၢ်စံးဝဲအသိးန့ၣ် ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိလၢအိၣ်ဂီၤလ့ၤ ဟီၣ်ကဝီၤအံၤ ပှၤနီၣ်ဂံၢ်မ့အိၣ်စှၤဘၣ်ဆၣ် လီၤဆီဒၣ်တၢ်မ့မ့ၢ်လၢကၠီးခဲးတကပၤန့ၣ်တၢ်တယးဝဲလၢ(ကၠါဖၠၣ်)ပှၤမၤတၢ်ဖိအနီၣ်ဂံၢ်ကအိၣ်လၢ ၅၀၀/၆၀၀ ဂၤခိၣ်ဃၢၤန့ၣ်လီၤ.

ဘၣ်ဃး(DKBA)ထုးထီၣ်နဲၣ်လီၤတၢ်ကလုၢ်လၢတရူး(ကၠါဖၠၣ်)ပှၤမၤတၢ်ဖိကဘၣ်ဟးထီၣ်အံၤ တၢ်ပၥ်ပနီၣ်ဝဲမုၢ်နံၤမုၢ်သီလီၢ်ခံ ကတၢၢ် လီၤလီၤဆီဆီမ့တအိၣ်ဒံးဘၣ်ဘၣ်ဆၣ်ပှၤလၢအမ့တက့ၤဘၣ်သ့ၣ်တဖၣ်ဒ်တၢ်နဲၣ်လီၤအိၣ်အသိးကဆဲးလဲၤဝဲဒ် တၢ်သိၣ်တၢ်သီအကျဲသနူအဂ့ၢ်န့ၣ် (DKBA) ပှၤဘၣ်မူဘၣ်ဒါ စံးဝဲန့ၣ်လီၤ.

ဒ်န့ၣ်အသိးအပူၤကွံၥ်လါအီးကထိဘၢၣ်ပယီၤသုးဒီး(BGF)နုၥ်လီၤမၤဟးဂီၤ(KK park)အီၤလါကၠါဖၠၣ်တၢ်ဖံးတၢ်မၤလီၢ်ဝံၤလီၢ်ခံ (ကၠါဖၠၣ်)ပှၤမၤတၢ်ဖိတဖၣ်သုးလီၢ်သုးကျဲလဲၤအိၣ်ဝဲလၢမၠၣ်ဝတံၣ်,စွ့ၤကိၣ်ကိၤဝ့ၢ်ပူၤကဝီၤဒ့အိၣ်အသိး (ကၠါဖၠၣ်)ခိၣ်နၢ်တနီၤန့ၣ် တၢ်ဆှၢလီၤခူသူၣ်ဝဲဆူဖၣ်အၣ်ဝ့ၢ်ဒီး(KNU/KNLA-PC) ဟီၣ်ကဝီၤပူၤအိၣ်ဝဲအဂ့ၢ်န့ၣ် တၢ်ကစီၣ်ပၥ်ဖျါထီၣ်ဝဲအိၣ်အသိးဟီၣ်ကဝီၤ ခ့ၣ်အဲၣ်ယူၣ်ခိၣ်နၢ်ဃုၥ်ဒီးလီၢ်ကဝီၤကမျၢၢ်လၢအထံၣ်ထွဲဝဲတၢ်သ့ၣ်တဖၣ်အံၤစံးဝဲအိၣ်န့ၣ်လီၤ.