လါဒံၣ်စဲဘၢၣ် ၂၂သီ, ၂၀၂၅နံၣ်, ခ့ၣ်အဲးစံၣ်,
ကကွၢ်ထံဆိၣ်မိၣ်က့ၤတၢ်လၢကမျၢၢ်တၢ်မိၣ်န့ၢ်သးလီဒီးတၢ်မုၢ်လၢ်ကွၢ်စိအဂီၢ်အဂ့ၢ်,သုးခိၣ်ဒိၣ်စိစီၤ(AOne)ဆီၣ်တခူစံးလီၤဝဲလၢ(၃၁)နံၣ်ပှဲၤထီၣ်(DKBA)မုၢ်နံၤလၢတၢ်မၤဝဲဖဲမဟါလါဒံၣ်စဲဘၢၣ်(၂၁)သီအနံၤလၢတၢ်မၤဝဲလၢဝဲၤလီၢ်ခိၣ်သ့ၣ်ဆိၤစံမၠဲၣ်တၢ်လီၢ်အပူၤန့ၣ်လီၤ.
(၃၁)အတီၢ်ပူၤအံၤတၢ်ကကွၢ်ထံနီၤဖးက့ၤဝဲကရူၢ်ကရၢအတၢ်ပညိၣ်တၢ်ပၥ်လီၤကျဲဒီးကမျၢၢ်တၢ်မုၢ်လၢ်ကွၢ်စိတၢ်မိၣ်န့ၢ်သးလီတၢ်မုၥ်တၢ်ခုၣ်အဂ့ၢ်,တီနီၢ်မုၢ်နုၥ်သုးဟီၣ်ကဝီၤနီၣ်ဂံၢ်(၂)ဒုးယၤခိၣ်သုးခိၣ်ဒိၣ်စိစီၤ(AONE)စံးလီၤတ့ၢ်ဝဲဒၣ်လၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤ.
“မုၢ်တနံၤအံၤပ(DKBA)ပှဲၤထီၣ်ဝဲ(၃၁)နံၣ်လံ,ပကက့ၤစိၥ်ထံက့ၤဆိမိၣ်ထံက့ၤပပှၤကလုၥ်တၢ်မိၣ်န့ၢ်သးလီ,ပပှၤကလုၥ်တၢ်မုၢ်လၢ်ကွၢ်စိ,ပမၤအီၤလၢပှဲၤထီၣ်ပှဲၤခါလံလဲၣ်.ကမျၢၢ်ကန့ၢ်တၢ်မုၥ်တၢ်ခုၣ်တၢ်သဘျ့ဂီၢ်ပဂုၢ်ကျဲးစၢးပမၤန့ၢ်အီၤန့ၢ်ထဲလဲၣ်.ဒီးစုကဝဲၤလၢပဖီၣ်ထီၣ်အံၤပကဘၣ်မၤအီၤလၢမနုၤအဂီၢ်လဲၣ်,ပတၢ်ပညိၣ်တၢ်ပၥ်လီၤကျဲပဘၣ်လဲၤအီၤဒ်လဲၣ်န့ၣ်ပကပဲၥ်ထံနီၤဖးအီၤထံထံဆးဆးန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,စုကဝဲၤလၢပဖီၣ်ထီၣ်ဝဲအံၤပကဘၣ်က့ၤသူက့ၤအီၤလၢပပှၤကလုၥ်တၢ်မိၢ်န့ၢ်သးလီ,ပပှၤကလုၥ်အတၢ်လိၣ်ဘၣ်,တၢ်ခွဲးတၢ်ယၥ်,တၢ်ထဲသိးတုၤသိးအဂီၢ်လီၤအဂ့ၢ်,ကတိၤဟ့ၣ်ဂံၢ်ဟ့ၣ်ဘါစံးလီၤဝဲဒၣ်စ့ၢ်ကီးန့ၣ်လီၤ.
မုၢ်မဆါတနံၤအံၤ,ထံရုၢ်ကီၢ်သဲးတၢ်ဆီၣ်သနံးအိၣ်ဝဲအါမံၤအါကပၤအဖီခိၣ်,ကညီကလုၥ်ဒူၣ်တဖၣ်လီၤမုၢ်လီၤဖးဝဲဒီး,သုးမုၢ်ဒိၣ်တဖၣ်စ့ၢ်ကီးလီၤဖးဝဲဒၣ်အဖုအါမးအဖီခိၣ်,မ့ၢ်တၢ်လီၤသးအုးဒိၣ်မးအဂ့ၢ်,သုးခိၣ်ဒိၣ်စိစီၤ(AONE)ကတိၤပၥ်ဖျါဝဲဒၣ်လၢတၢ်ရဲၣ်တၢ်ကျဲၤအပူၤန့ၣ်လီၤ.
တကတီၢ်ဃီ,ဒ်သိးတၢ်လီၤမုၢ်ပၠံပၠါသုတအိၣ်လၢၤတဂ့ၤဒီးတၢ်ဃူတၢ်ဖိးကအိၣ်က့ၤထီၣ်က့ၤအဂီၢ်,ကပၥ်ဖှိၣ်မၤသကိးက့ၤတၢ်ဒ်သနၢၣ်ဒၣ်ဝဲဒ်ဒီပုၢ်ဒီဝဲၢ်အသိးအဂ့ၢ်,ကတိၤပၥ်ဖျါဆီၣ်တခူစံးစ့ၢ်ကီးဝဲဒၣ်န့ၣ်လီၤ.
(DKBA)ကညီဖီၣ်စုကဝဲၤကရူၢ်ကရၢအံၤအပူၤကွံၥ်(၁၉၉၄)ပူၤထုးဖးကွံၥ်ဝဲအသးဒီး(ခ့ၣ်အဲၣ်ယူၣ်)ဒီးက့ၤမၤသကိးက့ၤဝဲတၢ်ဒီး(နဝတ)အဂ့ၢ်သ့ၣ်ညါဘၣ်န့ၣ်လီၤ.
ဒီးဖဲတၢ်မၤသကိးဝဲတၢ်ဒီး(န၀တ)ယံၥ်ဝဲ(၁၅)နံၣ်ဝံၤအလီၢ်ခံ,ခီဖျိကရူၢ်ကရၢဖိတနီၤတတူၢ်လိၥ်ဝဲ(ဘံၣ်ကၠံၣ်အဲၣ်)ဘၣ်အဃိ(၂၀၁၀)နံၣ်အပူၤ,သုးခိၣ်စီၤလၢပှဲၤဒုးအိၣ်ထီၣ်ကဒါက့ၤဝဲ(DKBA)သုးမုၢ်ဒိၣ်လၢအအိၣ်ဆၢထၢၣ်ဝဲဒ်(တၢ်ဘၣ်ဘျူးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်တဖုအံၤအသိး,ဘူးဒးကညီသုးမုၢ်ဒိၣ်(DKBA)လၢသုးခိၣ်ဘိၣ်ဘံၣ်တီခိၣ်ရိၢ်မဲဝဲတဖၣ်စ့ၢ်ကီးအိၣ်ဆၢထၢၣ်ဝဲဒ်အလီၢ်လီၢ်အသိးဒီးဟူးဂဲၤဝဲလၢသုးက့(၁)ဟီၣ်ကဝီၤပူၤတုၤမဆါတနံၤအံၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.