လါယနူၤအါရံၤ ၂၂ သီ, ၂၀၂၆ နံၣ်, ခ့ၣ်အဲးစံၣ်
ကညီကီၢ်စဲၣ် ကီးတရံးဝ့ၢ်လၢသုးမီၤစိရိၤကမၤဝဲလီၢ်ခံကတၢၢ်တၢ်ဃုထၢအကူၥ်-၃ အံၤ တုၤလၢမဟါလါယနူၤအါရံၤ ၂၀ သီအနံၤန့ၣ် လၢဝ့ၢ်ပူၤ တၢ်လီၢ်အခိၣ်အဃၢၤတဖၣ် တၢ်ဒုးဆဲးကဲထီၣ်ဝဲလၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤအိၣ်ဝဲကိးမုၢ်နံၤဒဲး အဂ့ၢ်န့ၣ် ကီးတရံးကမျၢၢ်တဖၣ်စံးဝဲန့ၣ်လီၤ.
“တၢ်ဒုးဒုကဲထီၣ်ကိးမုၢ်နံၤဒဲးလီၤ.လၢကီးတရံးဝ့ၢ်မုၢ်နုၥ်တကပၤဒီးကလံၤထံးတကပၤန့ၣ်ပယီၤသုးခးလီၤကျိဖးဒိၣ်, ခးလီၤဒြိမၢ်မၢ် လီၤ”အဂ့ၢ်န့ၣ် ကီးတရံးကမျၢၢ်တဂၤအံၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢခံခီခံကပၤတၢ်ဒုးအပူၤအံၤစ့ၢ်ကီး ပယီၤသုးတကပၤသံဘၣ်ဒိဘၣ်ထံးအါမးအသိး ဟဲက့ၤဟ့ၣ်လီၤသးဆူဟီၣ်ကဝီၤ (KNLA) သုးပၥ်ဖှိၣ် အအိၣ်စ့ၢ်ကီးအိၣ်ဝဲအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးတၢ်ပၢၢ်ဆၢကရူၢ်ကရၢအအိၣ်န့ၣ်လီၤ.
သုးမီၤစိရိၤအံၤလၢကထီၣ်ဒိၣ်စိက့ၤဝဲကီးတရံး-မၠၣ်ဝတံၣ်အ့ရှါကျဲမုၢ်အံၤအဂီၢ် စးထီၣ်လၢ(၂၀၂၄)နံၣ်အခါန့ၣ် ပျၢ်လီၤဝဲ(အီၣ်စ့ၣ်ယး) သုးကျိၤဒီးစးထီၣ်ဖဲန့ၣ်တၢ်ဒုးဆူၣ်ထီၣ်ဝဲလၢကီးတရံးကီၢ်ဆၣ်အပူၤဒီး တုၤလၢခဲအံၤဝ့ၢ်ခိၣ်ဝ့ၢ်ဃၢၤဒူသဝီတဖၣ် ဒိၣ်စိဝဲတန့ၢ် ဒိၣ်စိန့ၢ်ဝဲထဲဒၣ် ကီးတရံးဝ့ၢ်အံၤန့ၣ်လီၤ.
သုးမိၤစိရိၤအံၤဒူသဝီလၢအိၣ်ကီးတရံးဝ့ၢ်ခိၣ်ဝ့ၢ်ဃၢၤအံၤဒီးဒူသဝီလၢအိၣ်အ့ရှါကျဲမုၢ်သီအခိၣ်အဃၢၤအံၤတဖၣ်ခီဖျိဒိၣ်စိဝဲတန့ၢ်လၢလၢ ပှဲၤပှဲၤဘၣ်အဃိ လၢကဟဲတၢ်ဃုထၢအကူၥ်-၃ အံၤအဂီၢ်ဒ်သိးမၤဝဲတၢ်ဃုထၢအလီၢ်ကလဲၢ်ထီၣ်အဂီၢ်န့ၣ် အသုးဂံၢ်ဘါဟဲထီၣ်ဝဲ အါအါဂီၢ်ဂီၢ်အဂ့ၢ်န့ၣ် တၢ်ပၢၢ်ဆၢကရူၢ်တကပၤစံးဝဲန့ၣ်လီၤ.
တကးဒံးဘၣ်ခါခဲအံၤ တၢ်ဖးဒၢလီၢ်လၢတၢ်ဆီလီၤပၥ်လီၤဝဲဖဲကီးတရံးဝ့ၢ်ပူၤအံၤတဖၣ်ဒ်သိးတၢ်ပၢၢ်ဆၢကရူၢ်ကရၢသုတဟဲမၤတံၥ် တဲၥ်ဝဲတဂ့ၤအဂီၢ် ပယီၤသုးအံၤမၤဃံးထီၣ်ဝဲတၢ်သမံသမိးလၢဝ့ၢ်ခိၣ်ဝ့ၢ်ဃၢၤ,သီခါဖၠၣ်,ကၠိဒီးဆီလီၤဝဲအပှၤအိၣ်ခိးဝဲတၢ်အဂ့ၢ်န့ၣ် သ့ၣ်ညါဘၣ်လၢကမျၢၢ် အအိၣ်န့ၣ်လီၤ.
တၢ်ဃုထၢအကူၥ်-၃ လၢသုးမီၤစိရိၤကမၤဝဲလီၢ်ခံကတၢၢ်အံၤ ကီၢ်စဲၣ်တဖၣ်အကျါမ့မ့ၢ်ကညီကီၢ်စဲၣ်အပူၤ ပၥ်ဃုၥ်ဝဲကီးတရံးဝ့ၢ်ဒီး နိၣ်တကီ (ကၠၤအ့စ့ၣ်ကၠံ )ဝ့ၢ်အံၤန့ၣ်လီၤ.
