KNA ကဟးထီၣ်လၢမၠၣ်ဝတံၣ်ဝ့ၢ်ပူၤဒီးတၢ်မ့ဟဲခး(၂၇၅)သုးကလၢၤန့ၣ်ကက့ၤခးလီၤကဒါတၢ်ဒီးကဘီယူၤအဂ့ၢ် သုးမီၤစိရိၤစံးဝဲ

လါယနူၤအါရံၤ ၂၃ သီ, ၂၀၂၆ နံၣ်, ခ့ၣ်အဲးစံၣ်

(BGF)လၢအဆီတလဲသးဆူ(KNA)လၢအိၣ်မၠၣ်ဝတံၣ်ဝ့ၢ်ပူၤတဖၣ်ကဘၣ်ဟးထီၣ်ကွံၥ်ဒီး တၢ်မ့ဟဲခး(၂၇၅)သုးရ့ၣ် တၢ်လီၢ်အံၤန့ၣ် ကက့ၤခးလီၤကဒါ ဝဲဝ့ၢ်အံၤလၢကဘီယူၤအဂ့ၢ်န့ၣ် သုးမီၤစိရိၤစံးဝဲန့ၣ် လီၤ.

ဖဲလါယနူၤအါရံၤ ၁၉ သီအနံၤန့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဒီးတၢ်မုၥ်တၢ်ခုၣ်ကီၣ်ကးကရၢ (KNU/KNLA-PC)လၢအိၣ်မၠၣ်ဝတံၣ်ဝ့ၢ်ပူၤအံၤတဖၣ် သုးမီၤစိရိၤအသုးတြိၤ (၂၂)အခိၣ်အံၤ ကိးထံၣ်အဝဲသ့ၣ်ဝံၤလီၢ်ခံ သုးမီၤစိရိၤအလံၥ်လၢအိၣ်ဃုၥ်တၢ်ဂ့ၢ်(၄)ထံၣ်အံၤဘၣ်ဟဲအိၣ်ဖျါထီၣ်ဝဲဒ်အံၤလီၤအဂ့ၢ်န့ၣ် (PC)သုးခိၣ်ဒိၣ်စိ စီၤကၠီၤညိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

“လံၥ်လၢတၢ်ဂ့ၢ်တၢ်ကျိၤပၣ်ဃုၥ်(၄)ထံၣ်အံၤန့ၣ်အမ့ၢ်အနီၢ်ကီၢ်လီၤ.ဘၣ်မနုၤပပၥ်ဂၢၢ်ပၥ်ကျၢၤအီၤသ့လဲၣ်န့ၣ်လၢအပူၤကွံၥ်တသီခံသီအခါန့ၣ် PC ပခိၣ်ပနၢ်လၢအိၣ်ရၤမတံတဖၣ်အံၤန့ၣ်ဟဲက့ၤလီၤလၢလီၢ်ခၢၣ်သးပတံထီၣ်ဝဲလၢထးခိၣ်မီၤ.တဲဝဲလၢပယီၤသုးန့ၣ် ကိးထံၣ်အဝဲသ့ၣ်လိၣ်ဘၣ်ဝဲတၢ်ဂ့ၢ်တၢ်ကျိၤ(၄)ထံၣ်ဒ်သိးလံၥ်အိၣ်ဖျါအပူၤလီၤမီၤနီၤ”အဂ့ၢ်န့ၣ် စံးဝဲန့ၣ်လီၤ.

ဒ်သုးမီၤစိရိၤအလံၥ်တဘ့ၣ်အံၤပူၤပၥ်ဖျါဝဲတၢ်ဂ့ၢ်(၄)ထံၣ်အသိးန့ၣ် (KNA)အတၢ်ဆီတလဲသးအံၤခီဖျိတတူၢ်လိၥ်ဝဲဘၣ် အဃိ တၢ်တဟ့ၣ်အခွဲးလၢကအိၣ်လၢဝ့ၢ်ပူၤအံၤလၢၤဘၣ်ကဟးထီၣ်ကွံၥ် ဒီးတကးဒံးဘၣ်တၢ်မ့ဟဲခးဝဲမၠၣ်ဝတံၣ်ဝ့ၢ်ဟးထီၣ် (၂၇၅) သုးကလၢၤ လၢအပူၤကွံၥ်တၢ်ပၢၢ်ဆၢကရူၢ်နုၥ်လီၤခးထီၣ်န့ၢ်တ့ၢ်ဃၥ်ဝဲဖဲ(၂၀၂၄)အခါအံၤန့ၣ်ကဟဲခးလီၤဝဲတၢ်ဒီး ကဘီယူၤလၢ တၢ်လီၢ်(၁၈)တီၤန့ၣ်လီၤ.

ဒ်န့ၣ်အသိးတၢ်ဂ့ၢ်လၢအဂၤ(၂)ထံၣ်န့ၣ် (DKBA)ဒီး(KNU/KNLA-PC)အပှၤလၢအိၣ်မၠၣ်ဝတံၣ်ဝ့ၢ်ပူၤအံၤတဖၣ် ကဘၣ်ဆှၢထီၣ်ဝဲ အအိၣ်ဆိးလီၢ်ကျဲ, သုးဖိအမံၤစရီ,တၢ်ဂီၤသ့ၣ်တဖၣ်အံၤဆဲးခံကတၢၢ်ဖဲတလါအံၤ ၂၄ သီအသိး ဖီၣ်စုကဝဲၤကရူၢ်(၂)ဖုအံၤလၢ တၢ်ဘံၣ်တၢ်ဘၢအဂီၢ် ကပၥ်ဖှိၣ်မၤသကိးတၢ်ဒီးအဝဲသ့ၣ်အဂ့ၢ်န့ၣ် သုးမီၤစိရိၤစံးစ့ၢ်ကီးဝဲန့ၣ်လီၤ.

ဘၣ်ဃးသုးမီၤစိရိၤအတၢ်နဲၣ်လီၤတၢ်ကလုၢ်အံၤအတၢ်ပညိၣ်ကမ့ၢ်မုနၤလဲၣ်န့ၣ် စီၤကၠီၤညိၣ် စံးဝဲလၢ “တၢ်ဂ့ၢ်တၢ်ကျိၤတဖၣ်အံၤ အကျါနီၣ်ဂံၢ်(၁)န့ၣ်(DKBA)သုးမ့ၢ်ဂ့ၤ,(PC)သုးမ့ၢ်ဂ့ၤကယဲၢ်မ့ၢ်သုးအိၣ်လၢရၤမတံဝ့ၢ်ပူၤအံၤကဘၣ်ဟ့ၣ် ထီၣ်နီၢ်ကစၢ်အဂ့ၢ်အကျိၤ ဃုၥ်ဒီးတၢ်ဂီၤ.တကးဒံးဘၣ်စုကဝဲၤကရူၢ်ကရၢတဖၣ်တဘၣ်ပၥ်ပြံပြါအီၤတဂ့ၤန့ၣ်အဝဲတၢၣ်ပီၣ်ဝဲန့ၣ်ပနၢ်ဟူဒ်န့ၣ်.ယနၢ်ဟူန့ၣ်တၢ်ဟူးတၢ်ဂဲၤကအိၣ်ထီၣ်တမံၤမံၤမီၤလၢအဝဲသ့ၣ်အကျိၥ်အကျၥ်န့ၣ်.လၢ(KNA)တၢ်ဂ့ၢ်မ့ၢ်ဂ့ၤ,လၢ(ကၠါဖၠၣ်)တၢ်ဂ့ၢ်မ့ၢ်ဂ့ၤ.ယဆိမိၣ်မ့မ့ၢ် (KNA)တၢ်ဂ့ၢ်ဒုတမ့ၢ်အကါဒိၣ်ထဲန့ၣ်ဘၣ်.ယဆိကဘၣ်မ့ၢ်တၢ်ဘျးစဲလိၥ်သးလၢ(ကၠါဖၠၣ်)တၢ်ဖံးတၢ်မၤတဖၣ်အံၤဧါတခါခါ ဧါဒု တဲတဘၣ်ဘၣ်ကအိၣ်တမံၤမံၤလီၤ”အဂ့ၢ်န့ၣ် စံးဝဲန့ၣ်လီၤ.

ဒ်န့ၣ်အသိးဘၣ်ဃးကရူၢ်အပှၤကဘၣ်ဆှၢထီၣ်မံၤသၣ်စရီဒီးလၢတၢ်ဘံၣ်တၢ်ဘၢအဂီၢ်ကပၥ်ဖှိၣ်မၤသကိးတၢ်ဒီးသုးမီၤစိရိၤကရူၢ် တၢ်ဂ့ၢ်အံၤအဖီခိၣ် ဒ်သိးကသ့ၣ်ညါဘၣ်တၢ်ပၥ်သးလၢ(DKBA)အအိၣ်တကပၤစ့ၢ်ကီးအဂီၢ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးဝဲ ကရူၢ်အံၤပှၤဘၣ်မူ ဘၣ်ဒါဘၣ်ဆၣ်တဖီၣ်ဝဲလီတဲစိဘၣ်န့ၣ်လီၤ.

(KNA)ဖီၣ်စုကဝဲၤကရူၢ်လၢသုးမီၤစိရိၤထုးထီၣ်လံၥ်လၢတပျဲအိၣ်လၢမၠၣ်ဝတံၣ်ပူၤအံၤဘၣ်န့ၣ် အပူၤကွံၥ်မ့အိၣ်ဝဲလၢသုးမီၤစိရိၤ အစုတီၤဖီလၥ် မၤစၢၤဝဲတၢ်ဃုထၢတၢ်ဘံၣ်တၢ်ဘၢဘၣ်ဆၣ် ဖဲအပူၤကွံၥ်တလါအံၤလါယနူၤအရံၤထီၣ် ၁ သီ အနံၤန့ၣ် လၢ(BGF) အံၤတဆီဆီတလဲက့ၤအသးဆူ(KNA)သနါက့ ဘၣ်ဃးတၢ်ဆီတလဲအံၤထံၣ်ဘၣ်လၢသုးမီၤစိရိၤအံၤ တတူၢ်လိၥ်ဝဲဘၣ်န့ၣ် လီၤ.

တကးဒံးဘၣ်လၢ(BGF)အတၢ်ဆီတလဲသးဘျီဝဲအံၤန့ၣ် လီၤဆီဒၣ်တၢ်သုးဟီၣ်ကဝီၤ(၄)ဒီး သုးဟီၣ်ကဝီၤ(၁)အံၤ တဆီတလဲ အသး အိၣ်ဆၢဝဲဒ်အပူၤကွံၥ်(BGF)အသိးဒီး သုးဟီၣ်ကဝီၤ(၁)န့ၣ်အဝဲလီၢ်ခိၣ်သ့ၣ်အိၣ်ဝဲဖဲမၠၣ်ဝတံၣ်,မ့မ့ၢ်လၢသုးဟီၣ်ကဝီၤ(၄)ခီ န့ၣ် အဝဲၤလီၢ်ခိၣ် သ့ၣ်အိၣ်ဆီလီၤသးလၢမၠဲၣ်ကၠံငူၣ်(ခီၣ်တီၣ်)ဝ့ၢ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

အပူၤကွံၥ်တလါအံၤနံၣ်ထီၣ်သီ(BGF)မ့ဆီတလဲသးဆူ(KNA)ဘၣ်ဆၣ် မ့မ့ၢ် (DKBA)ဒီး(PC)ကရူၢ်ခံဒူၣ်အံၤန့ၣ်ဆဲးလီၤတ့ၢ်ဃၥ်ဝဲ ထံကီၢ်ဒီဘ့ၣ်တၢ်ပတုၥ်တၢ်ခးအိၣ်ဒံးဝဲလၢသုးမီၤစိရိၤစုတီၤဖီလၥ် န့ၣ်လီၤ.

အဃိဘၣ်ဃးသုးမီၤစိရိၤဃ့ဝဲကရူၢ်ခံဖုအံၤအပှၤမံၤစရီ,တၢ်ဂီၤတၢ်ဂ့ၢ်အံၤအပူၤကွံၥ်တၢ်ဃ့ဝဲမ့တအိၣ်ဘၣ်ဘၣ်ဆၣ် လီၤဆီဒၣ်တၢ် ဝ့ၢ်ဃုၥ်ဒီးဟီၣ်ကဝီၤတၢ်လီၢ်လၢဖီၣ်စုကဝဲၤကရူၢ်ကရၢအိၣ်ဆီလီၤသးတၢ်သဘံၣ်သဘုၣ်ကဲထီၣ်အလီၢ် တဖၣ်န့ၣ်ဒ်သိးတၢ်ထံၣ် ကမၣ် လိၥ်သးသုတအိၣ်တဂ့ၤအဂီၢ်သုးမီၤစိရိၤဃ့ဝဲတၢ်သ့ၣ်တဖၣ်အံၤဟဲအိၣ်ထီၣ်ဖျိဖျိဖျါဖျါအဂ့ၢ်န့ၣ် သ့ၣ်ညါဘၣ်န့ၣ်လီၤ.