လါယနူၤအါရံၤ ၂၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် တီအူကီၢ်ရ့ၣ်(သုးက့ ၂)ဒီးချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအပူၤ ခီဖျိလၢကဘီယူၤ,ကျိဖးဒိၣ်,ဒြိဒီး ဟီၣ်လၥ် မ့ၣ်ပိၢ်အံၤအဃိ စးထီၣ်လၢတလါအံၤ ၁၃ သီတုၤလၢ ၂၁ သီအံၤ လီၢ်ကဝီၤကမျၢၢ်သံဝဲ ၈ ဂၤ ဒီး ဘၣ်ဒိဘၣ်ထံးဝဲ ၆ ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ဘၣ်ထွဲအံၤတဖၣ် ထုးထီၣ်ပၥ်ဖျါ ဝဲအသိး သ့ၣ်ညါဘၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်(သုးက့ ၃)မူကီၢ်ဆၣ်အပူၤ ဖဲမဟါလါယနူၤအါရံၤ ၂၁ သီအနံၤ ပယီၤသုးခီၣ်ချ့သုးရ့ၣ်(ခမရ-၃၅၁)လဲၤတ့ၢ်လီၤ ဒြိမ့ၣ်ပိၢ်အဃိ ကမျၢၢ်ပိၥ်ခွါ(၂)ဂၤလၢအသးနံၣ်အိၣ်(၂၈-၅၄)နံၣ်အဘၢၣ်စၢၤအံၤသံဝဲဒီး ဘၣ်ဒိဝဲပိၥ်ခွါတဂၤ,ပိၥ်မုၣ်(၂၄)နံၣ် တဂၤ အဂ့ၢ်န့ၣ် ကညီဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲကရူၢ်(KPSN)ထုးထီၣ်ပၥ်ဖျါဝဲဖဲတနံၤအံၤမုၢ်ထူၣ်အခါန့ၣ်လီၤ.
ဒ်န့ၣ်အသိးလၢတီအူကီၢ်ရ့ၣ်(သုးက့ ၂)ထီတထူၣ်ကီၢ်ဆၣ်အပူၤစ့ၢ်ကီး ဖဲလါယနူၤအါရံၤ ၁၉ သီ မုၢ်ထူၣ် ၁၂း၃၅ မံးနံးအဆၢကတီၢ် တဘျီ ဒီး မုၢ်ဃ့ၢ်လီၤ ၁း၁၅ မံး နံး အဆၢကတီၢ်တဘျီန့ၣ် သုးမီၤစိရိၤအကဘီယူၤ လဲၤတ့ၢ်လီၤဝဲပီၣ်(၅၀၀)မ့ၣ်ပိၢ် (၃)ဖျၢၣ် လၢမီၤန့ၢ်ပှၤကရူၢ် စံဒီၣ်ခိၣ်သဝီပူၤအဃိ ဘၣ်သံဝဲသဝီဖိပိၥ်မုၣ်နီၢ်ဖီဆၢ(၈၅)နံၣ် ဒီး နီၢ်မုၢ်သဲ(၅၅)နံၣ်သ့ၣ်တဖၣ်အံၤန့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤဘၣ်ဒိစ့ၢ်ကီးဝဲ နီၢ်ဝါ(၅၂)နံၣ် ဒီး နီၢ်ဆၣ်ခုၣ်(၆၄)နံၣ်အသိး ဟံၣ်ဟးဂီၤစ့ၢ်ကီးဝဲ (၆)ဖျၢၣ် အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်န့ၣ်အသိးခီဖျိလၢကဘီယူၤဒီးကျိဖးဒိၣ်အံၤအဃိ စံဒီၣ်ခိၣ်သဝီဖိခဲလၢၥ်ပျံၤတၢ်ဃ့ၢ်ထီၣ်ဟးအိၣ်ဝဲလၢတၢ်ဘံၣ်တၢ်ဘၢလီၢ်ဒီး ခဲအံၤလၢအဝဲသ့ၣ်အဂီၢ်လိၣ်ဘၣ်ဝဲဂ့ၢ်ဂီၢ်အူတၢ်ဆီၣ်ထွဲမၤစၢၤအဂ့ၢ်န့ၣ် လံၥ်တၢ်ပၥ်ဖျါအပူၤစံးဝဲန့ၣ်လီၤ.
တကးဒံးဘၣ်ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်မဟါ ၂၁ သီ တချုးပယီၤသုးလဲၤတ့ၢ်လီၤဒြိမ့ၣ်ပိၢ်ကမျၢၢ်ပိၥ်မုၣ်သံ(၂)ဂၤ ကဲထီၣ်ဒံး ဘၣ်ဖဲ ၁၉ သီအနံၤ န့ၣ်စ့ၢ်ကီး လၢလ့ၤဒိသဝီ(လှေဒုံး)အပူၤ ခီဖျိပယီၤသုးခီၣ်ချ့သုးရ့ၣ် (ခမရ-၃၀၇)သုးရ့ၣ်အံၤ လဲၤတ့ၢ်လီၤဝဲ ဒြိမ့ၣ်ပိၢ်အဃိ ဘၣ်ဒိဝဲ သဝီဖိ အူစွ့ၤမၠ့ၣ်(၆၀)နံၣ်အံၤကဲထီၣ်ဒံးဝဲန့ၣ်လီၤ.
တကတီၢ်ဃီပယီၤသုးကဘီယူၤလၢအိၣ်တီအူကဘီယူၤသန့အံၤတဘ့ၣ် လဲၤတ့ၢ်လီၤစ့ၢ်ကီးဝဲပီၣ်(၃၀၀)မ့ၣ်ပိၢ် ၂ ဖျၢၣ်လၢ ကွံဒိၣ် ကရူၢ်ပူၤ ဒီး ပယီၤသုးခီၣ်ချ့သုးရ့ၣ်(ခမရ-၂၆၄)သုးရ့ၣ်အံၤခးလီၤစ့ၢ်ကီးဝဲ(၈၁ မမ)ကျိဖးဒိၣ် ၂ ဖျၢၣ် ဆူ အ့ပဝၤသဝီ(အင်းပုဝါ) ပူၤ အဃိ ဘၣ်ဒိဝဲကျီၢ်(၂)ဒုဒီးလ့ၣ်ဟးဂီၤဝဲတခိၣ်အဂ့ၢ်န့ၣ် ထုးထီၣ်ပၥ်ဖျါစ့ၢ်ကီးဝဲန့ၣ်လီၤ.
မူကီၢ်ဆၣ်အံၤအပူၤဖဲအပူၤကွံၥ်လါယနူၤအါရံၤ ၁၃ သီ အနံၤစ့ၢ်ကီး လၢနဲးလီ(နတ်လောင်း)သဝီဒီး စံဖၠူၤခ့ၣ်(ဇီးဖြူခင်)သဝီအပူၤ ခီဖျိပယီၤသုး(ခမရ-၄၃၉)ခးလီၤဝဲကျိဖးဒိၣ်ဒီးဒြိအံၤအဃိ ဘၣ်သံဝဲ မီၣ်ကလါကၠံ(၂၅)နံၣ်အံၤဒီး ဘၣ်ဒိဝဲကိၤမိဝ့ (၄၀)နံၣ် အံၤဒံး န့ၣ်လီၤ.
တကတီၢ်ဃီတၢ်ကဲထီၣ်သးတနံၤဃီဝဲအံၤ ပယီၤသုးကျိၤနုၥ်လီၤဝဲလၢသနံခီ(သနှီးခေါင်း)သဝီပူၤ ဖီၣ်ဃၥ်ဝဲကမျၢၢ်ပိၥ်မုၣ်ပိၥ်ခွါ ခဲလၢၥ် (၈)ဂၤအကျါပၣ်ဃုၥ်ဝဲဖိသၣ်မုၣ် မၣ်ပၠ့ၤစ့ၤမိ(၁၅)နံၣ်အံၤဒီးပှၤသ့ၣ်တဖၣ်အံၤတၢ်ဆှၢထီၣ်အီၤဆူ ပနွ့ၣ်ကိပၢၤကီၢ်ဝဲၤဒၢး န့ၣ်လီၤ.
တကးဒံးဘၣ်တၢ်ကဲထီၣ်သးဝံၤမုၢ်ဆ့ၣ်ထီၣ် ၁၄ သီအနံၤန့ၣ် ပယီၤသုးသ့ၣ်တဖၣ်အံၤဖဲအဝဲသ့ၣ်နုၥ်လီၤလၢသဝီပူၤအခါဒိးလီၤတ့ၢ် ဃၥ်ဝဲမ့ၣ်ပိၢ်အဃိ ဖယါကိသဝီ အူသီမၠ့ၣ်(၇၃)နံၣ်, ဒီၤသါအ့(၇၀)နံၣ်ဒီး န့ၤစါလ့(၁၆)န့ၣ်သ့ၣ်တဖၣ်အံၤ ယီၢ်ဘၣ်ဝဲမ့ၣ်ပိၢ် သံဝဲဒၣ် အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ခ့ၣ်အဲၣ်ယူၣ် တီအူကီၢ်ရ့ၣ်ဒီးချၢၣ်လွံၢ်ထူၣ်ကီၢ်ရ့ၣ်အမဲၥ်ညါ ဖဲလါယနူၤအါရံၤ ၁၈ သီအနံၤစ့ၢ်ကီး လၢဒူသထူၣ်ကီၢ်ရ့ၣ်(သုးက့ ၁)ကၠဲး ထိၣ်ကီၢ်ဆၣ်အပူၤ ပယီၤသုး(၃၁၀)အမျိၥ်သုးဒီးပယီၤသုးလၢအိၣ်ပကိကီၢ်ခီဒိၣ် ဝီကီၢ်ဆၣ် လဲၣ်ပၤသဝီအပူၤတဖၣ်အံၤ ပညိၣ်ခး လီၤဝဲ(၁၂၀ မမ) ၆ ဖျၢၣ်လီၤတဲၥ်ပိၢ်ဖးထီၣ်ဝဲလၢခရၢၢ်ကရူၢ် ခရၢၢ်သဝီ,သိခွးသဝီဒီးအခဲၤသဝီသ့ၣ်တဖၣ်အံၤပူၤအဃိ သီခါအီၣ်စိ တၢ်သူၣ်ထီၣ်ဟးဂီၤဝဲ(၁)တဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
