လါယနူၤအါရံၤ ၃၁သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ပူၤတၢ်မၤတၢ်ဃုထၢအဆၢကတီၢ်,ဘၣ်ဃးတၢ်ဆါသံးပှ့ၤသံးအံၤတၢ်ဒုးအိၣ်ထီၣ်ဝဲတၢ်သိၣ်တၢ်သီလၢတၢ်ကဘၣ်လူၤပိၥ်မၤထွဲဝဲအီၤအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါထီၣ်ဝဲဒၣ်န့ၣ်လီၤ.
(၂၀၂၆)နံၣ်တၢ်ဃုထၢအတီၢ်ပူၤကီၢ်ကၠီၣ်တဲၣ်တၢ်ဃုထၢခီၣ်မ့ရှၢၣ်(ECT)အံၤ,ဒ်သိးတၢ်ဘျၢသဲးစးတၢ်ဒိၣ်စိဒီးတၢ်တုၤသိးထဲသိးကအိၣ်ဝဲအဂီၢ်,မၤဝဲတၢ်တြီဃၥ်တၢ်ဆါသံးတၢ်ဆၢကတီၢ်တဖၣ်အိၣ်ဝဲအဂ့ၢ်,ကၠီၣ်တဲၣ်တၢ်ကစီၣ်တဖၣ်ပၥ်ဖျါဝဲဒၣ်န့ၣ်လီၤ.
တၢ်ဃုထၢအံၤအဆိကတၢၢ်တၢ်ကမၤဝဲတၢ်ဟ့ၣ်ဆိတၢ်ဖးဖဲလါဖ့ၤဘြူၤအါရံၤ(၁)သီအနံၤဒီးတၢ်ကဆဲးမၤဝဲတၢ်ဃုထၢဖဲလါဖ့ၤဘြူၤအါရံၤ(၈)သီအနံၤအဂ့ၢ်,သ့ၣ်ညါဘၣ်န့ၣ်လီၤ.
ဒီးတၢ်မၤတၢ်ဟ့ၣ်ဆိတၢ်ဖးအနံၤအဂီၢ်,စးထီၣ်ဖဲလါယနူၤအါရံၤ(၃၁)သီအနံၤဟါခီ(၆)နၣ်ရံၣ်တုၤလါဖ့ၤဘြူၤအါရံၤ(၁)သီဟါခီ(၆)နၣ်ရံၣ်အတီၢ်ပူၤတၢ်တဘၣ်ဆါဝဲသံးဘၣ်ဒီးတကတီၢ်ဃီ,လါယနူၤအါရံၤ(၈)သီတၢ်ဃုထၢအနံၤအသီအဂီၢ်စးထီၣ်ဖဲလါဖ့ၤဘြူၤအါရံၤ(၇)သီဟါခီ(၆)နၣ်ရံၣ်တုၤလါဖ့ၤဘြူၤအါရံၤ(၈)သီအနံၤဟါခီ(၆)နၣ်ရံၣ်အတီၢ်ပူၤတၢ်တဘၣ်ဆါဝဲသံးဘၣ်အဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
ကၠီၣ်တဲၣ်တၢ်ဃုထၢအဆၢကတီၢ်တၢ်ပၥ်ပနီၣ်တၢ်ဆါသံးဆါမ့ၤတၢ်ဘိးဘၣ်ရၤလီၤအဖီခိၣ်ကီၢ်ပယီၤထံဖိကီၢ်ဖိတဖၣ်ကလူၤပိၥ်မၤထွဲဒီးအိၣ်ဆိးသ့သ့ဘၣ်ဘၣ်အဂ့ၢ်,(YoungChiOo)ပှၤဟူးဂဲၤလၢပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါအူမိကၠီၣ်ဟ့ပလီၢ်စံးဝဲဒ်အံၤန့ၣ်လီၤ.
“ကၠီၣ်တဲၣ်တၢ်ဃုထၢကစးထီၣ်မၤဝဲဘူးထီၣ်အဃိ,ခဲအံၤမၤဝဲတၢ်သမံသမိးလၢကီၢ်ပယီၤဖိတဖၣ်အကျါပထံၣ်ဘၣ်အိၣ်လံန့ၣ်လီၤ.အဃိတၢ်ဃုထၢအတီၢ်ပူၤပကီၢ်ပယီၤခီကီၢ်ပှၤမၤတၢ်ဖိတဖၣ်ကအိၣ်ဒီးတၢ်ပလီၢ်ပဒီသးလၢတၢ်ဟးထီၣ်က့ၤလီၤ,လံၥ်လဲၢ်တၢ်အုၣ်ကီၤသးအမဲၥ်ညါတဘၣ်အိၣ်ဖှိရိဖုလၢမုၢ်နၤခီ,တဘၣ်မၤတၢထီၣ်တၢလီၤတၢ်ဖဲအိၣ်ဆိးဟီၣ်ကဝီၤကပိၥ်ကပၤတဂ့ၤ”အဂ့ၢ်စံးဝဲဒၣ်န့ၣ်လီၤ.
ကီၢ်ကၠီၣ်တဲၣ်တၢ်ဃုထၢအပူၤခီပယီၤခီကီၢ်ပှၤမၤတၢ်ဖိတဖၣ်အဂီၢ်,ကၠီၣ်တဲၣ်ဟီၣ်ကဝီၤပှၤဘၣ်မူဘၣ်ဒါတဖၣ်ထုးထီၣ်ဝဲတၢ်ဟးထီၣ်က့ၤလီၤတၢ်ပၥ်ပနီၣ်လၢမုၢ်နၤခီတဖၣ်အိၣ်ဝဲအဂ့ၢ်,ပှၤဟူးဂဲၤလၢကီၢ်ပယီၤခီကီၢ်ပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တကတီၢ်ဃီ,တၢ်ဃုထၢအတီၢ်ပူၤတၢ်ကးတံၥ်ဃၥ်ဝဲတၢ်တဘၣ်ဆါသံးမုၢ်နံၤမုၢ်သီတဖၣ်အံၤ,ပှၤကိးဂၤဒဲးကဘၣ်လူၤပိၥ်မၤထွဲဝဲဒၣ်အဂ့ၢ်,(ECT)ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,တၢ်မ့လုၣ်သ့ၣ်ခါပတၥ်ဝဲတၢ်ဘိးဘၣ်ရၤလီၤအံၤန့ၣ်တၢ်ဟ့ၣ်တၢ်ကမၣ်ဒ်တၢ်ဒၢနုၥ်လီၤဝဲလၢဃိၥ်ပူၤ(၆)လါကအိၣ်ဝဲအသိး,တၢ်ကဘၣ်ဟ့ၣ်စ့အီၣ်လိးလၢစ့ယိၤ(၁၀၀၀၀)ဘးတဖၣ်ကအိၣ်ဝဲအဂ့ၢ်(ECT)ပၥ်ဖျါစ့ၢ်ကီးဝဲဒၣ်လၢကၠီၣ်တဲၣ်တၢ်ကစီၣ်သန့တဖၣ်အပူၤအိၣ်ဝဲဒၣ်န့ၣ်လီၤ.
