လါယနူၤအါရံၤ ၂၈သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်,ကညီကီၢ်စဲၣ်ကီၢ်ဆၢရၤမတံဝ့ၢ်ကလံၤထံးဟီၣ်ကဝီၤအပူၤတနံၤအံၤလါယနူၤအါရံၤ(၂၈)သီဂီၤခီအနံၤအပူၤပယီၤသုးမၤဝဲကဘီယူၤတၢ်ထီၣ်ဒုးအိၣ်ဝဲအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ရၤမတံဝ့ၢ်ကလံၤထံးဖလူ,မ့လဲးပၣ်ခိၣ်ဃၢၤတၢ်လီၢ်တဖၣ်အပူၤတဂီၤအံၤတၢ်ခးလိၥ်သးလၢကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးကရူၢ်အဘၢၣ်စၢၤတအိၣ်ဒံးဝဲဒၣ်ဘၣ်ဆၣ်,ပယီၤသုးတကပၤမၤကဘီယူၤတၢ်ထီၣ်ဒုးကွံၥ်လီၤတၢ်အိၣ်ဝဲအဂ့ၢ်,လီၢ်ကဝီၤကမျၢၢ်လၢအိၣ်ဘူးဖဲန့ၣ်တဂၤစံးဝဲဒ်အံၤန့ၣ်လီၤ.
“တဂီၤညါအံၤယတထံၣ်ကျိစးထီၣ်သီၣ်နီတထံၣ်ဘၣ်,ဘၣ်ဆၣ်တထံၣ်ဃီလၢပှၤဟဲကွံၥ်လီၤတၢ်လံ,ကွံၥ်လီၤဝဲဖဲဖလူဟီၣ်ကဝီၤတခွ့ၣ်တခွီးအံၤလီၤ.တၢ်လီၢ်တၢ်ကျဲလၢလီၤတံၢ်လီၤဆဲးခီပတဲတသ့ဒံးဘၣ်.ကဲထီၣ်သးကိၢ်ကိၢ်လၢၤလၢၤဒံးလီၤအဃိ”အဂ့ၢ်စံးဝဲဒၣ်န့ၣ်လီၤ.
ပယီၤသုးကရူၢ်မၤကဘီယူၤတၢ်ထီၣ်ဒုးအဃိ,ဟီၣ်ကဝီၤကမျၢၢ်လီၢ်ကဝီၤဖိဒီးပှၤဃ့ၢ်တၢ်ဒုးလီၢ်ကဒုဖိတဖၣ်ပျံၤတၢ်ဖုးဒီးအိၣ်ဝဲလၢတၢ်ပလီၢ်ပဒီသးအပူၤအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါ,ပယီၤသုးအံၤကွံၥ်ဝဲတၢ်ခဲလၢၥ်အိၣ်ဝဲ(၄)ဘျီဒီး,ကျိချံပှၥ်သၣ်လၢကွံၥ်လီၤဝဲတဖၣ်အံၤတၢ်တယၥ်ဝဲလၢပီၢ်(၅၀၀)ဂျဲးဖၢးတၢၣ်မ့ၢ်ပိၣ်အဂ့ၢ်,အဝဲပဲၥ်ထံနီၤဖးစ့ၢ်ကီးန့ၣ်လီၤ.
ကညီကီၢ်စဲၣ်ရၤမတံဝ့ၢ်ကလံၤထံးဟီၣ်ကဝီၤအပူၤပယီၤသုးကရူၢ်ကရၢသ့ၣ်တဖၣ်အံၤ,အဂံၢ်ဘါကအိၣ်ဝဲအဂၤ(၂၀၀)ဃၣ်ဃၣ်ဒီးအါတက့ၢ်မ့ၢ်ဝဲတမ(၂၂),တမ(၄၄)ဒီးတမ(၅၅)တဖၣ်အဂ့ၢ်,သ့ၣ်ညါဘၣ်လၢဟီၣ်ကဝီၤပှၤဘၣ်မူဘၣ်ဒါတဖၣ်အအိၣ်န့ၣ်လီၤ.
ဒီးအဝဲသ့ၣ်တဖၣ်အံၤ,အိၣ်ဆီလီၤဝဲအသးလၢလဲးခးတီၤ,မဲၢ်ကနဲ,ထံမူထၣ်,နိၣ်ဖိဒီးတလးအံးသံးဖၠၣ်အပူၤအသိး,မၤဝဲတၢ်ခးလီၤကျိဖးဒိၣ်ဆူကမျၢၢ်လီၢ်ကဝီၤအိၣ်ဆိးတၢ်လီၢ်တၢ်ကျဲတဖၣ်အပူၤအိၣ်ဝဲခဲအံၤခဲအံၤအဂ့ၢ်,သ့ၣ်ညါဘၣ်ဒ်ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
တကီၢ်ခါအံၤလၢမဲၢ်ကနဲ,ထံမူထၣ်,နိၣ်ဖိဒီးတလးအံးသံးဖၠၣ်တၢ်လီၢ်တၢ်ကျဲတဖၣ်အပူၤပယီၤသုးကရူၢ်ဒီး,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ခးလိၥ်သးစဲးပြဲးလၢခံခီခံကပၤဘၢၣ်စၢၤအိၣ်အသိး,ဖလူ,မ့လဲးပၣ်ဟီၣ်ကဝီၤတကပၤစ့ၢ်ကီးအပူၤကွံၥ်စှၤသီအတီၢ်ပူၤတၢ်ခးလိၥ်သးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,သူမွဲထံကျိကၢၢ်နံၤအပူၤကွံၥ်တၢ်ခးလိၥ်သးအိၣ်ဝဲအဃိ,ဖဲလါယနူၤအါရံၤ(၂၅)သီအနံၤအပူၤကျိချံပှၥ်သၣ်တဖၣ်လီၤတဲၥ်ဘၣ်ဟးဂီၤဝဲကမျၢၢ်ဟံၣ်လၢကီၢ်ကၠီၣ်တဲၣ်မဲၢ်ကိးက့သဝီတကပၤအိၣ်ဝဲအဖီခိၣ်,ကၠီၣ်တဲၣ်ကမျၢၢ်လီၢ်ကဝီၤဖိတဖၣ်အိၣ်ဝဲဒီးတၢ်ဘၣ်ယိၣ်အဂ့ၢ်,ကၠီၣ်တဲၣ်လီၢ်ကဝီၤပှၤဘၣ်မူဘၣ်ဒါတဖၣ်ပၥ်ဖျါထီၣ်ဝဲဒၣ်စ့ၢ်ကီးန့ၣ်လီၤ.