ပှၤကီၢ်ပယီၤဖိလၢခးကၠီၣ်တဲၣ်ပၢၤကီၢ် ဘၣ်တၢ်ဖီၣ်ချုး

လါယနူၤအါရံၤ ၂၂သီ, ၂၀၂၆နံၣ်, ခ့ၣ်အဲးစံၣ်,

ကီၢ်ကၠီၣ်တဲၣ်ကီၢ်ပယီၤကီၢ်ဆၢမဲၢ်ဆီးဝ့ၢ်ဟီၣ်ကဝီၤအပူၤတနံၤအံၤလါယနူၤအါရံၤ(၂၂)သီအနံၤအပူၤတၢ်ဖီၣ်ချူးက့ၤဝဲကီၢ်ပယီၤထံဖိကီၢ်ဖိလၢအခးဝဲကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါဒီးကျိတဂၤအံၤလံအဂ့ၢ်,မဲၢ်ဆီးပၢၤကီၢ်တၢ်ဘိးဘၣ်ရၤလီၤလီၤပၥ်ဖျါထီၣ်ဝဲဒၣ်န့ၣ်လီၤ.

အပူၤကွံၥ်လါယနူၤအါရံၤ(၂၀)သီအနံၤအပူၤကီၢ်ပယီၤထံဖိကီၢ်ဖိ(နဲၤလ့အီၤ)သးနံၣ်(၂၀)တဂၤအံၤ,ခးဝဲကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါတဂၤဒီးကျိဖဲမဲၢ်ဆီးဝ့ၢ်,မဲၢ်ကူးသဝီဟီၣ်ကဝီၤပူၤဝံၤအလီၢ်ခံက့ၤဃ့ၢ်ပူၤဖျဲးကွံၥ်ဝဲအသးလၢမဲၢ်ကိးက့တဆီဆူသူမွဲထံကျိဝၢ်ပၤတခီအဃိ,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံၤကရူၢ်ကရၢတဖၣ်ဖီၣ်ကတီၤဃၥ်ဝဲအီၤအဂ့ၢ်,သ့ၣ်ညါဘၣ်န့ၣ်လီၤ.

ဒီးတၢ်ဖီၣ်ကတီၤဝဲအီၤဝံၤအလီၢ်ခံတနံၤအံၤလါယနူၤအါရံၤ(၂၂)သီဂီၤခီအနံၤအပူၤ,ကီၤဘရၤသုးကျိၤခိၣ်သုးခိၣ်ဒါဘီဆှၢလီၤက့ၤဝဲလၢကၠီၣ်တဲၣ်ပှၤဘၣ်မူဘၣ်ဒါအစုပူၤအဂ့ၢ်,သ့ၣ်ညါဘၣ်န့ၣ်လီၤ.

လၢတၢ်န့ၣ်အဃိတၢ်ဆှၢလီၤက့ၤအီၤလၢကၠီၣ်တဲၣ်ပၢၤကီၢ်အစုပူၤအလီၢ်ခံ,တကီၢ်ခါခဲအံၤတၢ်ဆှၢထီၣ်ဝဲဆူမဲၢ်ဆီးပၢၤကီၢ်ရူဒီးလၢတၢ်ကမၤဝဲတၢ်သမံသမိး,တၢ်လိၣ်ဘၢလိၣ်ကွီၢ်ဒီးတၢ်ဟ့ၣ်တၢ်ကမၣ်တဖၣ်အဂီၢ်အဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်စ့ၢ်ကီးန့ၣ်လီၤ.

(နဲၤလ့အီၤ)အံၤအပူၤကွံၥ်လါယနူၤအါရံၤ(၂၀)သီအနံၤအပူၤဃ့ၢ်ပူၤဖျဲးတ့ၢ်ဝဲအသးဘၣ်ဆၣ်,မ့မ့ၢ်(စီၤမ့ထွ့)လၢဟးဒိးဆဲးကဲးဃုၥ်ဒီးအီၤတဂၤတခီဘၣ်တၢ်ဖီၣ်ချူးတ့ၢ်ဝဲအီၤဖဲတၢ်ကဲထီၣ်သးဟီၣ်ကဝီၤအပူၤတဘျီဃီအဂ့ၢ်,သ့ၣ်ညါဘၣ်န့ၣ်လီၤ.

လၢန့ၣ်အမဲၥ်ညါ,ပှၤဖီၣ်ကျိဖိ(နဲၤလ့အီၤ)ခးဝဲအဃိ,ကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါ(ဆးဆၤကၤခ)သးနံၣ်(၅၁)နံၣ်တဂၤအံၤဘၣ်ဒိဘၣ်ထံးဝဲလၢအဟၢဖၢဖျိထီၣ်တုၤလၢအလီၢ်ခံဒီးတၢ်ဆှၢထီၣ်ဝဲအီၤလၢမဲၢ်ဆီးတၢ်ဆါဟံၣ်ဖးဒိၣ်လၢကဒိးကူစါသးအဆၢကတီၢ်လိၣ်ဘၣ်ဝဲသွံၣ်တဖၣ်အဃိ,တၢ်ဃ့ထီၣ်ဝဲတၢ်မၤစၢၤအဖီခိၣ်,လါယနူၤအါရံၤ(၂၁)သီအနံၤဂီၤခီအပူၤကွဲၢ်ကဘီကညီတီၤထီကၠိဖိမုၣ်ခွါတဖၣ်လဲၤမၤဘူၣ်လီၤဝဲဒၣ်သွံၣ်န့ၣ်လီၤ.

တကတီၢ်ဃီ,မဲၢ်ဆီးဝ့ၢ်ဟီၣ်ကဝီၤအပူၤကီၢ်ပယီၤခီကီၢ်ပှၤမၤတၢ်ဖိတနီၤလဲၤဟ့ၣ်လီၤမၤဘူၣ်ဝဲသွံၣ်အိၣ်ဝဲအသိး,လဲၤသံကွၢ်သံဒိးဝဲတၢ်ဘၣ်ဒိဘၣ်ထံး,တၢ်အိၣ်သးဒီးကတိၤဟ့ၣ်ဂံၢ်ဟ့ၣ်ဘါဝဲကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါတဂၤအံၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.

ဒ်န့ၣ်အသိး,ကီၢ်ပယီၤဖိတဖၣ်အတၢ်ဟ့ၣ်လီၤမၤဘူၣ်ဝဲသွံၣ်လၢကၠီၣ်တဲၣ်ပၢၤကီၢ်အဂီၢ်ဒ်အံၤအဖီခိၣ်,တၢ်တဆိမိၣ်အဖီခိၣ်တၢ်ဆါဟံၣ်ပူၤသရၣ်မုၣ်တဖၣ်လီၤကမၢဝဲအသိး,ပှၤမၤဘူၣ်သွံၣ်တဖၣ်ဒ်မၤဝဲသ့သးမံသးမုၥ်ဝဲလၢမၤစၢၤဘၣ်ဝဲတၢ်အသိး,ပၢၤကီၢ်ဟံၣ်ဖိဃီဖိဒီးသရၣ်မုၣ်တဖၣ်စံးဘျူးဘၣ်ဝဲပှၤမၤဘူၣ်သွံၣ်တဖၣ်အဂ့ၢ်,ကီၢ်ပယီၤခီကီၢ်ပိၥ်မုၣ်တဂၤပၥ်ဖျါထီၣ်ဝဲလၢအစိၤရှၢၣ်မံးဒံးယၢၣ်အပူၤန့ၣ်လီၤ.