လါယနူၤအါရံၤ ၁၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်ဝတံၣ်ဝ့ၢ်ဃၢၤ (DKBA)တၢ်ပၢကၠီးခဲးသဝီအပူၤ သူၣ်ဘီၣ်သးစၢ်လၢ တၢ်မၢအထီၣ်ဂံၢ်ခီၣ်ထံးသုးတၢ်မၤလိတဖၣ်အံၤ ကဘၣ်က့ၤဒီသဒၢ က့ၤဝဲအဒူသဝီတၢ်လီၢ်တၢ်ကျဲအဂ့ၢ်န့ၣ် (DKBA)ပှၤကတိၤတၢ်ပၢ သုးခိၣ်ဒိၣ်စိ စီၤဖါဘျဲၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲအပူၤကွံၥ်တလါအံၤလါယနူၤအါရံၤထီၣ်အံၤန့ၣ် လၢ(စိၣ်ရှၢၣ်မံၣ်ဒံၣ်ယၢၣ်အပူၤ) တၢ်ကစီၣ်ရၤလီၤသးလၢသူၣ်ဘီၣ်သးစၢ်လၢ အိၣ်ကၠီးခဲးကရူၢ် ဒူသဝီအပူၤတဖၣ် (DKBA)ဖီၣ်ဒီးမၢထီၣ်ဝဲဂံၢ်ခီၣ်ထံးသုးတၢ်မၤလိဒီး ဖဲန့ၣ်ဘၣ်တၢ်ပဲၥ်ထံနီၤဖးဝဲ (DKBA)အကလုၥ် ကလုၥ်န့ၣ်လီၤ.
ဘၣ်ဃးတၢ်ဒုးထီၣ်ဝဲသးစၢ်လၢဂံၢ်ခီၣ်ထံးသုးတၢ်မၤလိတၢ်ဂ့ၢ်အံၤန့ၣ် ဒ်ပှၤထံၣ်အသိးတမ့ၢ်တၢ်ထၢသုးဘၣ်ဒီး မ့ၢ်ဒၣ်တၢ်စးထီၣ်သူဝဲ ဟံၣ်တဖျၢၣ်ကဘၣ်နုၥ်လီၤကဲသုးတဂၤဝံၤ တၢ်မၤလိမ့ဝံၤန့ၣ်အဝဲသ့ၣ်ကဘၣ်ဒီသဒၢက့ၤအဒူသဝီဟီၣ်ကဝီၤအဂ့ၢ်န့ၣ် (DKBA) ပှၤကတိၤတၢ်ပၢ သုးခိၣ်ဒိၣ်စိ စီၤဖါဘျဲၣ် စံးဝဲန့ၣ်လီၤ.
“တၢ်ဂ့ၢ်န့ၣ်ဒ်အံၤဘၣ်ဃးကၠီးခဲးတၢ်ဂ့ၢ်တခါန့ၣ်အိၣ်ဒ်အံၤ တမ့ၢ်ပထၢဆူၣ်သုးဘၣ်.အပူၤကွံၥ်မဟိတနံၣ်နါက့အိၣ်လီၤဘၣ်ဆၣ် တနံၣ်ညါ အံၤပစးထီၣ်မၤဒ်သိးဟံၣ်တဖျၢၣ်တဂၤကဘၣ်မၤဝဲဒ်န့ၣ်လီၤ.အဝဲသ့ၣ်ထီၣ်သုးတၢ်မၤလိမ့ဝံၤန့ၣ် အကဘၣ်က့ၤဒီသဒၢက့ၤအဟီၣ်ကဝီၤ ဒူသဝီလီၤ.တနီၤန့ၣ်တအဲၣ်ဒိးမၤဘၣ်ဘျီတဲဝဲအိၣ်အကလုၥ်ကလုၥ်.တဲဝဲလၢ (DKBA)ထၢသုးမ့ၢ်အကမၤမနုၤလဲၣ် မ့နီၢ်နီၢ်တခီဒ်သိး ပဒီသဒၢက့ၤပဟီၣ်ကဝီၤပဒူသဝီကန့ၢ်အဂီၢ်ဒီး တၢ်မ့ကဲထီၣ်သးတမံၤမံၤန့ၣ်ဒ်သိးပဒီသဒၢလီၤပသးကသ့အဂီၢ်န့ၣ်(DKBA)ဟ့ၣ်ဝဲ သုးတၢ်မၤလိဒ်န့ၣ်လီၤ. .” အဂ့ၢ်န့ၣ် စံးဝဲန့ၣ်လီၤ.
ဒ်ကၠီးခဲးလီၢ်ကဝီၤကမျၢၢ်စံးဝဲအသိးန့ၣ် ဖဲလါယနူၤအါရံၤ ၃ သီ ဟါခီအဆၢကတီၢ်န့ၣ် ပိၥ်ခွါသူၣ်ဘီၣ်သးစၢ်လၢအအိၣ်ဘုခ့ကျီးပူၤ ဒီး မၤတၢ်လၢတရူးတၢ်သူၣ်ထီၣ်ဘှီထီၣ်တၢ်ဖံးတၢ်မၤလီၢ်တဖၣ်အံၤ (DKBA)နုၥ်လီၤဖီၣ်အဝဲသ့ၣ်ဝံၤက့ၤကိးဝဲဆူဆိၣ်စံမၠဲၣ် တီၤနံၤ တၢ်ဟ့ၣ် သုးတၢ်မၤလိတၢ်လီၢ်ဒီး ကၠီးခဲးတၢ်ဟ့ၣ်သုးတၢ်မၤလိတၢ်လီၢ်အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“လၢမုၢ်ဟါလီၤထီး ဟးလူၤဖီၣ်ပှၤသူၣ်ဘီၣ်သးစၢ်ဒီးဘုခ့ကါဖးဒိၣ်.ပှၤအိၣ်လၢသဝီပူၤဟံၣ်ပူၤ,ဘုခ့တၢ်မၤလီၢ်,ဘုခ့ကျီးပူၤမ့ဝံၤ ပှၤမၤတၢ်လၢတရူးတၢ်သူၣ်ထီၣ်ဘှီထီၣ်လီၢ်တဖၣ်န့ၣ်ပၣ်ဃုၥ်ခဲလၢၥ်လီၤ.ဖီၣ်ဝဲဝံၤတီၣ်ထီၣ်ဝဲလၢကါပူၤဝံၤဆှၢဝဲဆူပှၤဟ့ၣ်သုးတၢ်မၤလိလီၢ်န့ၣ်လီၤ”အဂ့ၢ်န့ၣ် ကၠီးခဲးကမျၢၢ်တဂၤစံးဝဲန့ၣ်လီၤ.
တကးဒံးဘၣ်ပှၤသူၣ်ဘီၣ်သးစၢ်လၢတၢ်ဖီၣ်က့ၤကိးဝဲဒီးဆှၢထီၣ်လၢကဘၣ်ထီၣ်သုးတၢ်မၤလိသ့ၣ်တဖၣ်အံၤလီၢ်ကဝီၤကမျၢၢ်အမဲၥ်ညါတနီၤန့ၣ်ပၣ်ဃုၥ်ဝဲဒီး ပှၤတမှံၤလၢအဟဲနုၥ်လီၤအိၣ်ဆိးလၢကၠီးခဲး, မံၤဟူးသၣ်ဖျါလၢဟုၣ်တၢ်ဘျၣ်တၢ်ဒီးပှၤတပိၥ်ကျဲတဖၣ်ပၣ်ဃုၥ်ဝဲ အဂ့ၢ်န့ၣ် ကၠီးခဲးပှၤဘၣ်မူဘၣ်ဒါတဂၤ စံးဝဲအသိး သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ သူၣ်ဘီၣ်သးစၢ်လၢအတမၤကျဲ,အိၣ်လၢအသးလဲၤဖဲအသးသ့ၣ်တဖၣ်အံၤဘၣ်တၢ်ဖီၣ်ဒီး ဒုးထီၣ်ဝဲ သုးတၢ်မၤလိဒ်န့ၣ်လီၤအဂ့ၢ်န့ၣ် ပထံၣ်ဘၣ်လၢ(DKBA)ပှၤကတိၤတၢ်ပၢ သုးခိၣ်ဒိၣ်စိ စီၤစ့ၤဝ့ စ့ၢ်ကီးစံးဘၣ်ဝဲတၢ်ကစီၣ်သန့တခါ န့ၣ်လီၤ.
ဘၣ်ဃးတၢ်ဂ့ၢ်အံၤ ကၠီးခဲးသဝီပှၤဘၣ်မူဘၣ်ဒါတဂၤစံးဝဲလၢ“ဖဲကၠီးခဲးအံၤ(စည်းကမ်း)တအိၣ်နီစဲးဘၣ်.တၢ်ဟုၣ်တၢ်ဘျၣ်ဟဲအါထီၣ်. ဟးအီၣ်ဟးအီတၢ်,ပှၤအ့ၣ်လိၥ်ဆိးက့သးဟဲအါထီၣ်.အဃိ(DKBA)မၤဝဲဒ်သိးမၤဃံးထီၣ်တၢ်သိၣ်တၢ်သီဒီး ပှၤဖီၣ်အဝဲသ့ၣ်ပှၤဆှၢထီၣ် အဝဲအသ့ၣ် လၢသုးတၢ်မၤလိလီၢ်ခဲအံၤဂၢၢ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤဆိၣ်စံမၠဲၣ်ဒီးကၠီးခဲးဟီၣ်ကဝီၤအပူၤ သူၣ်ဘီၣ်သးစၢ်လၢကဘၣ်ထီၣ်ဂံၢ်ခီၣ်ထံးသုးတၢ်မၤလိဒီး သးစၢ်လၢတၢ်ကဘၣ်ဟ့ၣ် ဝဲ သုးတၢ်မၤလိတဖၣ်န့ၣ် အနီၣ်ဂံၢ်ကအိၣ်လၢအဂၤ(၃၀၀)(၄၀၀)ခိၣ်ဃၢၤဒီး တၢ်မၤလိအံၤတၢ်ဆၢကတီၢ်တံၥ်တၥ်ဝဲ(၃)လါအဂ့ၢ်န့ၣ် သ့ၣ်ညါဘၣ်လၢကရူၢ်ကရၢ အအိၣ်န့ၣ်လီၤ.
ဒ်န့ၣ်အသိးဖဲအပူၤကွံၥ် ၂၀၂၂ ဒီး ၂၀၂၃ နံၣ်အခါန့ၣ်စ့ၢ်ကီး (DKBA)တၢ်ပၢဟီၣ်ကဝီၤလၢအမ့ၢ် ဆိၣ်စံမၠဲၣ်,ဘျၢၣ်ဒိၣ်,အူကြ့ၣ်ထၣ်,ဂီၤလ့ၤ ဟီၣ်ကဝီၤအပူၤန့ၣ် ပိၥ်မုၣ်မ့ၢ်ဂ့ၤ, ပိၥ်ခွါမ့ၢ်ဂ့ၤ ဟံၣ်တဖျၢၣ်န့ၣ်ကဘၣ်ထီၣ်ဝဲသုးတၢ်မၤလိတဂၤဒီး ပှၤသ့ၣ်တဖၣ်အံၤစံၣ်လီၤတၢ်မၤလိ မ့ဝံၤ သးမ့အဲၣ်ဒိးနုၥ်လီၤ မၤတၢ်လၢတၢ်ကရၢကရိပူၤန့ၣ်မၤဝဲသ့အသိးမ့တအဲၣ်ဒိးမၤဘၣ်စ့ၢ်ကီးသ့ဝဲအဂ့ၢ်န့ၣ် (DKBA) စံးဝဲန့ၣ်လီၤ.
