လါယူၤလံ, ၅သီ, ၂၀၂၆နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးတဝဲၢ်ကီၢ်ရ့ၣ် သုးက့(၄) ဟီၣ်ကဝီၤအပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးကသံၣ်ဝဲၤဒ့ တီခိၣ်ရိၣ်မဲမၤဝဲ ပှၤတဝၢဆူၣ်ချ့မၤစၢၤ (Community Health Welfare) တၢ်ပျၢ်တၢ်မၤလိအမူး ဖဲ လါအီကူး, (၄)သီ အနံၤအဂ့ၢ် ဒ်ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဝဲဖဲ တနံၤအံၤလါအီကူး(၅)သီအနံၤအံၤန့ၣ်လီၤ.
တၢ်ဟ့ၣ်တၢ်မၤလိ ဘၣ်ဃး ပှၤတဝၢဆူၣ်မၤစၢၤ (Community Health Welfare) အံၤ အ တၢ်ပညိၣ်မ့ၢ်ဒ်သိး တၢ်ဟ့ၣ်တၢ်သ့ၣ်ညါဘၣ်ဃး ဂံၢ်ခီၣ်ထံးတၢ်ကွၢ်ထွဲ ပှၤတဝၢတၢ်အိၣ်ဆူၣ်အိၣ်ချ့အဂီၢ်ဒီး လၢသုးမုၢ်သံၣ်ဘိတကပၤစ့ၢ်ကီး ကကဲထီၣ်တၢ်မၤစၢၤအဂီၢ် အဂ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးကသံၣ်ဝဲၤဒ့ခိၣ်(၂) သုးခိၣ်ဒိၣ်ဂီၢ်ဂ့ၢ် စီၤဝ့ကၠီၣ် စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ “ ပတၢ်မုၢ်လၢ်တခီ ဒ်ပှၤအါဂၤသ့ၣ်ညါဝဲအသိး ပထံလီၢ်ကီၢ်ပူၤဘၣ်ဃးဒီးဆူၣ်ချ့မ့ၢ်ဂ့ၤ, ကူၣ်သ့မ့ၢ်ဂ့ၤ ကျိၤကျဲတၢ်လဲၤတရံးသးတဘၣ်လီၢ်ဘၣ်ဆးဘၣ်အဖီၣ်ခိၣ် လၢပှၤကမျၢၢ်ဂီၢ်ပမၤစၢၤကသ့ဒ်လဲၣ်ဒီး လၢပပှၤသုးမုၢ်သံၣ်ဘိအဂီၢ် ပမၤစၢၤကသ့ဒ်လဲၣ်အဂီၢ် ပဒုးအိၣ်ထီၣ်တၢ်မၤလိအံၤန့ၣ်လီၤ အဂ့ၢ် ” စံးဝဲဒၣ်န့ၣ်လီၤ.
ဒ်န့ၣ်အသိး လၢပလီၢ်ကဝီၤပူၤစ့ၢ်ကီး တၢ်ဒုးကဲထီၣ်တလီၢ်လီၢ်ဃုၥ်ဒီး ကဘီယူၤတၢ်ဟဲတ့ၢ်လီၤမ့ၣ်ပိၣ်အိၣ်ဝဲအမဲၥ်ညါ လၢကမျၢၢ်တၢ်အိၣ်ဆူၣ်အိၣ်ချ့အဂီၢ်ဒီး သုးမုၢ်သံၣ်ဘိတဖၣ်ဂီၢ် တၢ်ဆှၢထီၣ်ဆှၢလီၤကသံၣ်ကသီဆူ ကၠီၣ်တဲၣ်တကပၤစ့ၢ်ကီး မ့ၢ်တၢ်လၢအကီခဲဝဲ အဂ့ၢ် သုးခိၣ်ဒိၣ်ဂီၢ်ဂ့ၢ်စီၤဝ့ကၠီၣ် တဲအါထီၣ်ဝဲဒၣ်န့ၣ်လီၤ.
တၢ်မၤလိဘျီဝဲအံၤ ဘၣ်တၢ်မၤအီၤတၢ်ဆၢကတီၢ်လၢ (၆) လါအတီၢ်ပူၤဒီးဘၣ်တၢ်စးထီၣ်မၤအီၤ ဖဲ လါဖ့ၤဘြူၤအါရံၤ (၃) သီ တုၤလၢ လါအီကူး, (၄) သီအနံၤန့ၣ်လီၤ.(၆)လါတီၢ်ပူၤကသံၣ်တၢ်မၤလိဘျီဝဲအံၤန့ၣ် ပှၤလၢအဖျိထီၣ်တၢ်မၤလိတဖၣ် ခဲလၢၥ်အိၣ်ဝဲ (၂၅) ဂၤအဂ့ၢ် ခ့ၣ်အဲၣ်ယူၣ် လီၢ်ခၢၣ်သး ပၥ်ဖျါဝဲဒၣ်န့ၣ်လီၤ.
လၢတၢ်ပျၢ်တၢ်မၤလိမူး တဘျီအံၤ ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ခိၣ် ပဒိၣ်စီၤဖျိးစိဝ့, ဘျံးဒဝဲၢ်ကီၢ်ရ့ၣ် ကညီဆူၣ်ချ့မၤစၢၤဝဲၤကျိၤခိၣ် ပဒိၣ်နီၢ်အဲၣ်ဆၢတိ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးကသံၣ်ဝဲၤဒ့ခိၣ်ခံ သုးခိၣ်ဒိၣ်ဂီၢ်ဂ့ၢ် စီၤဝ့ကၠီၣ်, သုးက့ (၄) သုးကသံၣ်မူဒါခိၣ် သုးခိၣ်စိစီၤလ့ဘ့စတိ, သုက့ (၄) သုးဂ့ၢ်ဝီခိၣ် သုးခိၣ်ဒိၣ်ဖိစီၤကျိၣ်မုၢ်ထီၣ်စိ တဖၣ် ဟဲထီၣ်ကတိၤဟ့ၣ်ဂံၢ်ဟ့ၣ်ဘါလီၤတၢ်ဖဲ တၢ်ပျၢ်က့ၤတၢ်မၤလိမူးတၢ်ရဲၣ်တၢ်ကျဲၤအံၤန့ၣ်လီၤ.
ဒ်န့ၣ်အသိး (KNLA) သုးကသံၣ်ဝဲၤဒ့ မၤဝဲ ပှၤတဝၢဆူၣ်ချ့မၤစၢၤတၢ်မၤလိအံၤ လၢ ၂၀၂၅-၂၀၂၆နံၣ်အတီၢ်ပူၤအံၤမၤဝဲဒၣ် (၃) ဘျီဒီး တၢ်မၤလိဘျီဝဲအံၤ န့ၣ် သုးကသ့ၣ်ဝဲၤဒ့တီခိၣ်ရိၣ်မဲမၤဝဲ ပှဲၤထီၣ် (၃၈) ဝီတဝီအဂ့ၢ် သ့ၣ်ညါဘၣ်လၢပှၤဘၣ်မူဘၣ်ဒါအိၣ်န့ၣ်လီၤ.
