လါဖ့ၤဘြူၤအါရံၤ ၁၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤ ခီဖျိလၢသုးမီၤစိရိၤအကဘီယူၤဒီးကျိဖးဒိၣ်,ဒြိသ့ၣ်တဖၣ် အံၤအဃိ (၂၀၂၅)တနံၣ်အတီၢ်ပူၤ ကမျၢၢ်သံပၥ်ဖှိၣ်ခဲလၢၥ်အိၣ်ဝဲ(၇၂) ဂၤ ဒီး ဘၣ်ဒိဘၣ်ထံးဝဲ(၂၄၁)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်တၢ်မၤနီၣ်စရီအပူၤန့ၣ်လီၤ.
ဒ်ချၢၣ်လွံၢ်ထူၣ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် မူကီၢ်ဆၣ်,လၢၢ်ဒိၣ်ကီၢ်ဆၣ်ဒီးဆီထံးကီၢ်ဆၣ်ဟီၣ်ကဝီၤအပူၤ စးထီၣ် လၢ(၂၀၂၅)လါယနူၤအါရံၤတုၤလါဒံၣ်စ့ဘၢၣ် လၢ(၁)နံၣ်အတီၢ်ပူၤ လၢကမျၢၢ်ဒူသဝီတၢ်ဖံးအီၣ်မၤအီၣ်လီၢ်ကျဲအပူၤ သုးမီၤစိရိၤ ကဘီၤယူၤလဲတ့ၢ်လီၤမ့ၣ်ပိၢ်(၃၅၁)ဘျီ, ခးလီၤကျိဖးဒိၣ်(၅၂၄)ဘျီ,တ့ၢ်လီၤဒြိ(၂၁၉)ဘျီ ပၥ်ဖှိၣ်ခဲလၢၥ်(၁၀၉၄)ဘျီညါန့ၣ်လီၤ.
တနံၣ်အတီၢ်ပူၤ ခီဖျိလၢသုးမီၤစိရိၤသူဝဲကဘီယူၤ,ကျိဖးဒိၣ်,ဒြိအဘျီလၢအကထိအါအါဂီၢ်ဂီၢ်ဒ်အံၤအဖီခိၣ် ဘၣ်သံဝဲကမျၢၢ်ပိၥ်မုၣ် (၃၅)ဂၤ,ပိၥ်ခွါ(၃၇)ဂၤအသိး ဘၣ်ဒိဘၣ်ထံးဝဲ ကမျၢၢ်ပိၥ်မုၣ်(၁၂၃)ဂၤ, ပိၥ်ခွါ(၁၁၈)ဂၤဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
ဒ်န့ၣ်အသိးခီဖျိလၢကျိဖးဒိၣ်,ကဘီယူၤဒီးဒြိအံၤအဃိစ့ၢ်ကီး ကမျၢၢ်ဟံၣ်တၢ်သူၣ်ထီၣ်(၃၃၅)ဖျၢၣ်,ကၠိတၢ်သူၣ်ထီၣ်(၁၄)ဖျၢၣ်ဒီး သီခါဖၠၣ်ဒီးတၢ်ဘါ ယွၤသရိၥ်တၢ်သူၣ်ထီၣ်လီၢ်(၂၉)ဖျၢၣ်ဟးဂီၤဝဲဒီးလၢန့ၣ်အမဲၥ်ညါ သိလ့ၣ်(၂)ခိၣ်,ဆဲးကၢး(၁၁)ခိၣ်, စဲးကွးတၢ် (၃)ခိၣ်,စဲးဂံၥ်ဘု(၁)ဖျၢၣ်,တၢ်ပၥ်ကီၤတၢ်ဖိတၢ်လံၤလီၢ်(၁)ဖျၢၣ် ဘၣ်ဒိဘၣ်ထံးဟးဂီၤဝဲအသိး ကျီၢ်,ပနၢ်,မဲးတဲးလဲး,ထိး,ဆီ,ကသ့ၣ် သံဘၣ်ဒိဘၣ်ထံးဝဲ(၉၀)ဃၣ်ဃၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤပၥ်ဖျါဝဲန့ၣ်လီၤ.
တကးဒံးဘၣ်လၢတၢ်ဒီတနံၣ်အတီၢ်ပူၤန့ၣ် ပယီၤသုးဖီၣ်ဝဲကမျၢၢ်ပိၥ်မုၣ်/ပိၥ်ခွါခဲလၢၥ်အိၣ်ဝဲ(၅၄)ဂၤညါအဂ့ၢ်န့ၣ် ခ့ၣ်အဲၣ်ယူၣ် စံးစ့ၢ်ကီးဝဲန့ၣ်လီၤ.
ခ့ၣ်အဲၣ်ယူၣ် ကီၢ်ရ့ၣ်/သုးက့(၇)ဘ့ၣ်အကျါလီၤဆီဒၣ်တၢ်မ့ဘၣ်ကွၢ်လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤပူၤအံၤ ထံၣ်ဘၣ် လၢသုးမီၤစိရိၤမၤကမၣ်ဝဲပှၤဂ့ၢ်ဝီခွဲးယၥ်အါန့ၢ်ဒံးကီၢ်ရ့ၣ်/သုးက့ လၢအဂၤတဖၣ်ဒံးအသိး ကမျၢၢ်စ့ၢ်ကီးသံဘၣ်ဒိဘၣ်ထံး အါဝဲဖျိဖျိဖျါဖျါ န့ၣ်လီၤ.
ဒ်န့ၣ်အသိးမ့ဘၣ်ကွၢ်ဖဲအပူၤကွံၥ်တနံၣ်အံၤစးထီၣ်(၂၀၂၆)လါယနူၤအါရံၤ ၁ သီတုၤ ၃၁ သီ ထဲဒၣ်တလါအတီၢ်ပူၤန့ၣ် သုးမီၤစိရိၤ ကဘီယူၤလဲၤတ့ၢ်လီၤဝဲမ့ၣ်ပိၢ်ခဲလၢၥ်(၂၁)ဘျီ, ခးလီၤကျိဖးဒိၣ်(၃၀)ဘျီ ဒီးတ့ၢ်လီၤတၢ်ဒီးဒြိ(၁၁)ဘျီ ပၥ်ဖှိၣ်ခဲလၢၥ် အိၣ်ဝဲ(၆၂)ဘျီ အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်အအိၣ်န့ၣ်လီၤ.
ဒီးလၢသုးမီၤစိရိၤအတၢ်မၤကမၣ်ပှၤဂ့ၢ်ဝီခွဲးယၥ်သ့ၣ်တဖၣ်အံၤအဃိ လၢတလါအတီၢ်ပူၤအံၤ ကမျၢၢ်သံဝဲ(၁၂)ဂၤဒီးဘၣ်ဒိဘၣ်ထံး ဝဲ(၁၉)ဂၤအမဲၥ်ညါ ကမျၢၢ်ဟံၣ်တၢ်သူၣ်(၁၈)ဖျၢၣ်, တီၤဖုၣ်ကၠိတၢ်သူၣ်ထီၣ်(၁)ဖျၢၣ် ,ကျးဆါတၢ်(၁)ဖျၢၣ်,ဆဲးကၢး(၁)ခိၣ် ဟးဂီၤဝဲ အသိး ကျီၢ်,ပနၢ်,ထိးသံစ့ၢ်ကီးဝဲ(၉)ဒု အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ကီၢ်ရ့ၣ်ဟီၣ်ကဝီၤအပူၤအံၤမ့ဘၣ်ကွၢ်လၢပယီၤသုးဒီးတၢ်ပၢၢ်ဆၢသုးပၥ်ဖှိၣ်ဒုးယၤတၢ်ဟူးတၢ်ဂဲၤလၢတလါအတီၢ်ပူၤန့ၣ်စ့ၢ်ကီး ပယီၤသုးတကပၤသံဝဲ(၂၅)ဂၤ,ဘၣ်ဒိ(၁၀)ဂၤအမဲၥ်ညါ ပယီၤသုးဟဲက့ၤဟ့ၣ်လီၤသးလၢတၢ်ပၢၢ်ဆၢကရူၢ်ကရၢ အအိၣ်အိၣ်ဝဲ(၁၀)ဂၤ စ့ၢ်ကီးန့ၣ်လီၤ.
