လါဖ့ၤဘြူၤအါရံၤ ၂၀သီ, ၂၀၂၆နံၣ်, ခ့ၣ်အဲးစံၣ်,
တနီသရံးကီၢ်ခီဒိၣ်,ပလီကီၢ်ဆၣ်ဟီၣ်ကဝီၤအပူၤတနံၤဃီအတီၢ်ပူၤသုးက့(၄)(KNLA)သိၣ်ဒူစိကရူၢ်ကရၢတဖၣ်ထီၣ်မၤန့ၢ်ကွံၥ်ဝဲပယီၤသုးတၢ်လီၢ်(၂)တီၤအဂ့ၢ်,(KNLA)သုးက့(၄)သိၣ်ဒူစိထုးထီၣ်ပၥ်ဖျါဝဲဒၣ်ဖဲမဟါလါဖ့ၤဘြူၤအါ၇ံၤ(၁၉)သီအနံၤန့ၣ်လီၤ.
အပူၤကွံၥ်လါဖ့ၤဘြူၤအါရံၤ(၁၇)သီအနံၤအပူၤ,(KNLA)သုးက့(၄)သိၣ်ဒူစိကရူၢ်ကရၢဒီးဒဝဲၢ်ဒီကလုၥ်တၢ်ထူၣ်ဖျဲးသုးမုၢ်ဒိၣ်(DNLA)ပၥ်ဖှိၣ်သးထီၣ်မၤန့ၢ်ကွံၥ်ဝဲပယီၤသုးကလၢၤလၢအိၣ်တီၤခီလီသဝီပူၤတဖျၢၣ်ဒီးတီၤယၤကါသဝီပူၤတဖျၢၣ်အဂ့ၢ်,သ့ၣ်ညါဘၣ်န့ၣ်လီၤ.
တီၤခီလီသဝီပယီၤသုးကလၢၤအံၤပယီၤသုးဒီးအကမျၢၢ်သုးဂံၢ်ဘါဆီလီၤသးပၥ်ဖှိၣ်ကအိၣ်ဝဲ(၂၇)ဂၤဒီးမ့မ့ၢ်လၢတီၤယၤကါသဝီပယီၤကၤက့သုးကလၢၤတခီဂံၢ်ဘါခဲလၢၥ်အိၣ်ဝဲ(၄၀)ဃၣ်ဃၣ်အဂ့ၢ်,သ့ၣ်ညါဘၣ်ဒ်တၢ်ပၥ်ဖျါအိၣ်ဝဲအသိး န့ၣ်လီၤ.
တၢ်ထီၣ်ဒုးဝဲပယီၤသုးတၢ်လီၢ်တၢ်ကျဲၤပူၤသိၣ်ဒူစိကရူၢ်ကရၢတဖၣ်အံၤသူဝဲဒြိ,(8kg)မ့ၢ်ပိၢ်ဒီးသုးကရူၢ်တကပၤသူဝဲကဘီယူၤဂျဲးဖဲးတၢၣ်,ထံသုးကျိဖးဒိၣ်,ဒီးပွဲၣ်ဖဲၣ်သိလ့ၣ်စ့ၣ်ကူၤတဖၣ်အိၣ်ဝဲဘၣ်ဆၣ်,ဘၣ်ဃ့ၢ်ထီၣ်ကွံၥ်ဝဲအဂ့ၢ်ပၥ်ဖျါဝဲစ့ၢ်ကီးန့ၣ်လီၤ.
တကးဒံးဘၣ်,တၢ်ဒုးဒီတကတီၢ်အပူၤထီၣ်မၤန့ၢ်ဝဲပယီၤသုး(၆၀မမ)တၤဝ့ၤမ့ၢ်ပိၢ်(၁၀)ဖျၢၣ်ဒီးအံၤတၤဂၤ(၂)ဖျၢၣ်အသိးသိၣ်ဒူစိတကပၤတၢ်ဘၣ်ဒိဘၣ်ထံးတအိၣ်ဝဲနီတဂၤဘၣ်ဒီးမ့မ့ၢ်ပယီၤသုးတကပၤတခီဘၣ်ဒိဘၣ်ထံးဝဲနးနး(၃)ဂၤဒီးသံကွံၥ်ဝဲ(၆)ဂၤအဂ့ၢ်,သ့ၣ်ညါဘၣ်န့ၣ်လီၤ.
(KNLA)သုးက့(၄)သိၣ်ဒူစိကရူၢ်ကရၢအံၤထီဒါဝဲသုးမီၤစိရိၤဒီးဒ်သိးတၢ်ပၢၢ်ဆၢကတုၤဆူဖီတၢၣ်အဂီၢ်မၤဝဲတၢ်ထီၣ်ဒုးပယီၤသုးကလၢၤလၢတနီသရံးကီၣ်ဆၣ်ဟီၣ်ကဝီၤပူၤဒီးတိၤလီၤပၥ်ဝဲလၢကဆဲးမၤဝဲတပယူၥ်ဃီအဂ့ၢ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,တၢ်ထီၣ်ဒုးတဘျီလၢ်လၢ်အပူၤကမျၢၢ်လီၢ်ကဝီၤဖိတဖၣ်သုတဘၣ်ဒိဘၣ်ထံးတဂ့ၤအဂီၢ်,ဟ့ၣ်ပလီၢ်ပၥ်ဖျါဝဲလၢတၢ်တဘၣ်အိၣ်ဘူးဒီးပယီၤသုးကရူၢ်သုးကရၢအသုးကလၢၤတဖၣ်ဘၣ်အဂ့ၢ်,သ့ၣ်ညါဘၣ်န့ၣ်လီၤ.
