လါဖ့ၤဘြူၤအါရံၤ ၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ ဖဲတၢ်ဒုးကဲထီၣ်ဝဲလၢဖၣ်ပူၣ်ဒုးယၤသုးကလၢၤအခါန့ၣ် ခံခီခံကပၤတၢ်သံ တၢ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် KNLA ပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
စးထီၣ်ဖဲတလါအံၤလါဖ့ၤဘြူၤအါရံၤ ၄ သီအနံၤန့ၣ် ပယီၤသုးလၢအိၣ်ဖၣ်ပူၣ်ဒုးယၤသုးကလၢၤတဖၣ်အံၤဒီး ဟီၣ်ကဝီၤ(KNLA) သုးပၥ်ဖှိၣ်အဘၢၣ်စၢၤတၢ်ဒုးဆူၣ်ထီၣ်ဝဲအဃိ ဖဲန့ၣ်ပယီၤသုးတကပၤသံဘၣ်ဒိဘၣ်ထံးအိၣ်အိၣ်အါမးအဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိး တၢ်ဒုးကဲထီၣ်အကတီၢ် ခီဖျိသုးမီၤစိရိၤအံၤသူဝဲကဘီယူၤဟဲခးလီၤတၢ်တပယူၥ်ဃီအဃိ တၢ်ပၢၢ်ဆၢသုးပၥ်ဖှိၣ်ကရူၢ် တကပၤဘၣ်ဒိဘၣ်ထံးဘၣ်ဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ်(သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
အဝဲစံးဝဲလၢ“ပယီၤသုးလၢအိၣ်ဖၣ်ပူၣ်သုးကလၢၤတဖၣ် ဃုကျဲလၢကမၤဖျိးကွံၥ်တၢ်ပၢၢ်ဆၢသုးကရူၢ်ပပှၤအဂီၢ် ဖဲအဝဲသ့ၣ် ဟဲထီၣ်အခါတၢ်ဒုးကဲထီၣ်.ခီဖျိပပှၤခးအဝဲသ့ၣ်အဃိန့ၣ်အသံဘၣ်ဒိဘၣ်ထံးအိၣ်ဖးအါညါ.တၢ်ဒုးကဲထီၣ်ဘျီကဘီယူၤဟဲခးလီၤတၢ်အဃိပပှၤဘၣ်ဒိဘၣ်ထံးဝဲဒ်န့ၣ်လီၤ.ဖဲ ၄ သီအနံၤန့ၣ် တၢ်ဒုးကဲထီၣ်အဃိကဘီယူၤဟဲခးလီၤတၢ်တဘ့ၣ်ဝံၤ တဘ့ၣ်ခးလီၤ တၢ်အဆၢ တတဲၥ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲတဂီၤအံၤန့ၣ်လီၤ.
ဒ်တၢ်ပၢၢ်ဆၢကရူၢ်အပှၤစံးဝဲအသိးန့ၣ် တၢ်ဒုးကဲထီၣ်ဘျီဝဲန့ၣ်ပယီၤသုးအံၤလၢၤဃုၥ်ဒီးမုၢ်နၤမုၢ်ဆါသူဝဲ(Jet Fighter), (Y-12), (Y-8) ကဘီယူၤဟဲခးလီၤဝဲ တၢ်တ့ၢ်လီၤဝဲမ့ၣ်ပိၢ်အါအါဂီၢ်ဂီၢ်အံၤလၢတၢ်ဒုးကဲထီၣ်အခိၣ် အဃၢၤ, တၢ်ပၢၢ်ဆၢသုးကရူၢ်အိၣ်အလီၢ်ကပိၤ ကပၤတပယူၥ်ဃီ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ဒုးဘျီဝဲအံၤခံခီခံကပၤတၢ်သံဘၣ်တၢ်ဘၣ်ဒိဘၣ်ထံးအကျါ မ့မ့ၢ်(KNLA)သုးပၥ်ဖှိၣ်ကရူၢ်လၢအဘၣ်ဒိဘၣ်ထံးတဖၣ် သးသမူတၢ် လီၤဘၣ်ယိၣ်တအိၣ်ဝဲဘၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
ဖၣ်ပူၣ်ဒုးယၤသုးကလၢၤလၢအရ့ဒိၣ်ဝဲသုးမီၤစိရိၤအဂီၢ်အံၤ(သုးက့ ၅)အပှၤကဝီၤခးအီၤန့ၢ်ဝဲလၢတနံၣ်ဃၣ်ဃၣ်လံအသိး ပှၤသုးဖိ လၢအိၣ်သုးကလၢၤပူၤအံၤတဖၣ်ကဟးထီၣ်တၢ်ချၢအဂီၢ်ဟးထီၣ်တဘူၣ်ဘၣ်အဃိကအီၣ်ကအီအဂီၢ်လၢကဘီယူၤအံၤ တဆီတၢ် လဲၤတ့ၢ်လီၤန့ၢ်ဝဲတၢ်အီၣ်တၢ်အီအဘိၣ်အိၣ်ဝဲခဲအံၤခဲအံၤန့ၣ်လီၤ.
လၢန့ၣ်အမဲၥ်ညါလၢတၢ်ဒုးတၢ်ယၤတၢ်ဂ့ၢ်ပိၥ်ထွဲအံၤအဖီခိၣ် ဖဲမဟါလါဖ့ၤဘြူၤအါရံၤ ၇ သီ ဟါခီ ၂း၃၀ အဆၢကတီၢ်စ့ၢ်ကီး သုးမီၤစိရိၤ(Jet Fighter)ကဘီယူၤ လဲၤတ့ၢ်လီၤပီၣ်(၅၀၀)မ့ၣ်ပိၢ် ၅ ဖျၢၣ် လၢလူၤသီကီၢ်ဆၣ် တ့မုၢ်ဒၢကရူၢ် မံမီၢ်ဒၢသဝီ ဒီးစီၤကျူဒ့ အဃိ ဘၣ်ဒိဝဲသးစၢ် စီၤခၠၣ်ကံရံၣ်(၁၆)နံၣ်အံၤ အခီၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲန့ၣ်လီၤ.
တကးဒံးဘၣ်ကဘီယူၤလဲၤခးလီၤတၢ်ဘျီဝဲအံၤဟံၣ်တၢ်သူၣ်ထီၣ်(၆)ဖျၢၣ်,ကျးဆါတၢ်(၁)ဖျၢၣ်ဃုၥ်ဒီးတၢ်ဖိတၢ်လံၤတဖၣ် ဟးဂီၤဝဲအသိး ဆၣ်ဖိကီၢ်ဖိစ့ၢ်ကီးသံဝဲအိၣ်အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
