ကမၤဂ့ၤထီၣ်ဝဲပၢပြး,သုးဂ့ၢ်ဝီဒီးဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ်ကမၤသကိးတၢ်ဒီးကလုၥ်ဒူၣ်အဂ့ၢ် PC ဆၢတဲၥ်လီၤဝဲ

လါဖ့ၤဘြူၤအါရံၤ ၈ သီ, ၂၀၂၆ နံၣ်, ခ့ၣ်အဲးစံၣ်

ကညီတၢ်မုၥ်တၢ်ခုၣ်ကီၣ်ကးကရၢ-KNU/KNLA-PC တၢ်ကရၢကရိအပူၤ ခါဆူမဲၥ်ညါကလဲၤသးဘၣ်ဂ့ၢ်ဘၣ်ဝီအဂီၢ် ကမၤဂ့ၤ ထီၣ်ဝဲတၢ်ပၢတၢ်ြပး,သုးဂ့ၢ်ဝီအသိး ကမၤသကိးတၢ်ဒီးကလုၥ်ဒူၣ်တဖၣ်အဂ့ၢ်န့ၣ် ကရူၢ်အံၤဆၢတဲၥ်လီၤဝဲဖဲအိၣ်ဖှိၣ်ဖးဒိၣ် အံၤပူၤ အဂ့ၢ်န့ၣ် သ့ၣ်ညါလၢကရူၢ်ပှၤဘၣ်မူဘၣ်ဒါအအိၣ်န့ၣ်လီၤ.

ဖဲလါဖ့ၤဘြူၤအါရံၤ ၄ သီတုၤ ၆ သီအနံၤ လၢ(၃)သီအတီၢ်ပူၤ အဆိကတၢၢ်တဘျီ KNU/KNLA-PC ဖီၣ်စုကဝဲၤကရူၢ် မၤဝဲ တၢ်အိၣ်ဖှိၣ်ဖးဒိၣ်အံၤဖဲဝ့ၢ်နီၣ်တယၢ် လီၢ်ခၢၣ်သးအံၤဒီး လၢတၢ်အိၣ်ဖှိၣ်ဘျီဝဲအံၤအပူၤ တၢ်လၢကဘၣ်မၤဂ့ၤထီၣ်အိၣ်ဒံးဝဲ အါကလုၥ်ဘၣ်ဆၣ် လီၤဆီဒၣ်တၢ်ကမၤဂ့ၤထီၣ်ဝဲပၢြပးဒီးသုးဂ့ၢ်ဝီတကးဒံးဘၣ် လၢတၢ်ကသူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ် ကီၢ်စၢဖှိၣ်အဂီၢ်ကပၥ်ဖှိၣ်မၤသကိးတၢ်ဒီးကလုၥ်ဒူၣ်အဂ့ၢ်န့ၣ် (PC)ပှၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ် စံးဝဲန့ၣ်လီၤ.

“လၢတၢ်အိၣ်ဖှိၣ်ပူၤန့ၣ်ပတၢၣ်ပီၣ်သကိးထံရူၢ်ကီၢ်သဲးတၢ်အိၣ်သးလၢအကဲထီၣ်မ့ၢ်ဂ့ၤ,ဒုးယၤဂ့ၢ်ဝီမ့ၢ်ဂ့ၤပပဲၥ်ထံနီၤဖးဒီးလၢပတၢ် ကရၢကရိကလဲၤဆူညါအဂီၢ်တၢ်ဖံးတၢ်မၤလၢပကြၢးမၤဆိအီၤတဖၣ်ပကမၤဖျါထီၣ်အမိၢ်လံၤမိၢ်ပှၢ်ဒ်လဲၣ်န့ၣ်မ့ၢ်တၢ်အကါဒိၣ်မီၤ. မ့ဝံၤဒ်ပတၢ်ပရၢကရိအိၣ်ပၥ်အသိးလၢတၢ်သူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ်န့ၣ်ဃုၥ်ဒီးကလုၥ်ဒူၣ်ခဲလၢၥ်ပကမၤသကိးတၢ်လၢတၢ်သဘျၢအပူၤ.မ့ဝံၤလၢပတၢ်ကရၢကရိအပူၤတၢ်လၢပကဘၣ်မၤဂ့ၤထီၣ်အိၣ်ဝဲအါမံၤဒ်အမ့ၢ်ပၢြပးတကပၤမ့ၢ်ဂ့ၤ,လၢသုးဂ့ၢ်ဝီတကပၤမ့ၢ်ဂ့ၤခါဆူညါကလဲၤသးဘၣ်ဂ့ၢ်ဘၣ်ဝီအဂီၢ်ပကမၤဖျါထီၣ်အမိၢ်လံၤမိၢ်ပှၢ်တုၤလီၤတီၤလီၤ”အဂ့ၢ်န့ၣ် စံးဘၣ်ခ့ၣ်အဲး စံၣ်-ကညီတၢ်ကစီၣ်န့ၣ်လီၤ.

လၢ(KNU/KNLA-PC)မၤဝဲကရူၢ်အတၢ်အိၣ်ဖှိၣ်ဖးဒိၣ်ဘျီဝဲအံၤအပူၤန့ၣ် တၢ်တဲသကိးပဲၥ်ထံနီၤဖးဝဲဘၣ်ဃးထံရူၢ်ကီၢ်သဲးဒီး ဒုးယၤတၢ်အိၣ်သးအမဲၥ်ညါတၢ်က့ၤပဲၥ်ထံနီၤဖးကဒါက့ၤကရူၢ်အတၢ်ဖံးတၢ်မၤတၢ်အိၣ်သး,တၢ်ပၥ်ဂၢၢ်ပၥ်ကျၢၤက့ၤတၢ်သူၣ်ထီၣ်ဆီလီၤတၢ်ဘျၢသဲစးဒီး တကတီၢ်ဃီတၢ်ဃုထၢထီၣ်ဃုၥ်ဝဲလီၢ်ခၢၣ်သးပၢဆှၢတၢ်ကမံးတံၥ်(၁၅)ဂၤ ဒီး လီၢ်ခၢၣ်သးထီဘိကမံးတံၥ် (၅၅)ဂၤအဂ့ၢ်န့ၣ် ကရူၢ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ

ဒ်န့ၣ်အသိးအပူၤကွံၥ်တၢ်ဃုထၢထီၣ်ခိၣ်နၢ်တၢ်အိၣ်ဖှိၣ်အံၤတၢ်မၤပၥ်ပနီၣ်တၢ်ဆၢကတီၢ်မ့တအိၣ်ဘၣ်ဆၣ် စးထီၣ်ဖဲတၢ် အိၣ်ဖှိၣ် အံၤန့ၣ်တၢ်ဆၢတဲၥ်လီၤဝဲလၢတၢ်ကမၤက့ၤအီၤ(၂)နံၣ်တဘျီကအိၣ်ဃုၥ်ဒီးတၢ်ဃုထၢထီၣ်ခိၣ်နၢ်လၢအသီအဂ့ၢ်န့ၣ် သုးခိၣ်ဒိၣ်စိ စီၤကၠီၤညိၣ် စံးစ့ၢ်ကီးဝဲန့ၣ်လီၤ.

အဆိကတၢၢ်တဘျီ(KNU/KNLA-PC)တၢ်အိၣ်ဖှိၣ်လၢတၢ်မၤဝဲတၢ်ဆၢကတီၢ်ယံၤ(၃)သီအတီၢ်ပူၤအံၤန့ၣ် လီၢ်ခၢၣ်သးခိၣ်နၢ်, သုးဝဲၤလီၢ်ခိၣ်သ့ၣ်ခိၣ်နၢ်တဖၣ်, ဒုးယၤခိၣ်နၢ်,သုးရ့ၣ်,ဝဲၤကျိၤခိၣ်နၢ်ဒီးပှၤဃုသ့ၣ်ညါတၢ်ခၢၣ်စးပှၤဘၣ်မူဘၣ်ဒါ ဟဲထီၣ်ဝဲ(၃၄၀)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.

(PC)ဖီၣ်စုကဝဲၤကရူၢ်အံၤ ထုးဖးအသးဒီး(ခ့ၣ်အဲၣ်ယူၣ်)ကရၢမိၢ်ပှၢ်ဝံၤဖဲ(၂၀၀၇)နံၣ်အခါန့ၣ်အိၣ်ဆၢထၢၣ်က့ၤဝဲဒ် ကညီတၢ်မုၥ် တၢ်ခုၣ်ကီၣ်ကးကရၢ(KNU/KNLA-PC)တဖုအသိး ကရူၢ်အံၤဖဲ(၂၀၁၅)နံၣ်ကီၢ်ပယီၤပဒိၣ်အူသ့စ့ၤပၢတၢ်စိၤအခါန့ၣ် ကလုၥ်ဒူၣ် ဖီၣ်စုကဝဲၤဆဲးလီၤဝဲထံကီၢ်ဒီဘ့ၣ်တၢ်ပတုၥ် တၢ်ခး(NCA)အခါန့ၣ်မ့ၢ်ကရူၢ်တဖုလၢအပၣ်ဃုၥ်ဝဲဒီးဆဲးအိၣ်ဒံးဝဲလၢ သုးမီၤစိရိၤစု တီၤဖီလၥ်တုၤလၢခဲအံၤန့ၣ်လီၤ.

ဒ်န့ၣ်အသိးလီၤဆီဒၣ်တၢ်ဖဲ(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံ အပူၤကွံၥ်နံၣ် လီၤဆီဒၣ်တၢ်လၢကြုၢ်တု-ကီးတရံး တၢ်ဒုးဆူၣ် ထီၣ်အခါန့ၣ် မ့ၢ်ကရူၢ်တဖုလၢအမံၤဟူသၣ်ဖျါလၢအမၤစၢၤဆှၢထီၣ်ဆှၢလီၤဝဲပယီၤသုးအိၣ်ဝဲအဂ့ၢ်န့ၣ် တၢ်ကစီၣ်ပၥ်ဖျါဝဲအိၣ်အသိး တၢ်ပၢၢ်ဆၢကရူၢ်ကရၢတဖၣ်စ့ၢ်ကီးစံးဝဲအိၣ်န့ၣ်လီၤ.