လါမးရှး ၂၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်ဟီၣ်ကဝီၤ လါယနူၤအါရံၤတုၤလါမးရှးလၢ(၃)လါအတီၢ်ပူၤ တၢ်ထီၣ်မၤန့ၢ်ဝဲ ပယီၤသုးတၢ်လီၢ်(၂)ဒီး ခီဖျိလၢကျိဖးဒိၣ်,ကဘီယူၤအံၤအဃိစ့ၢ်ကီး လီၢ်ကဝီၤကမျၢၢ်သံဘၣ်ဒိဘၣ်ထံးဝဲ(၇၀)ဘျဲၣ် အဂ့ၢ်န့ၣ် ကီၢ်ဆၣ်ကမျၢၢ်တၢ်ရ့လိၥ်မုၥ်လိၥ်ဒီးတၢ်ကစီၣ်တၢ်ဘိးဘၣ်ရၤလီၤကမံးတံၥ် ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
ဖဲအပူၤကွံၥ်လါယနူၤအါရံၤ ၈ သီ အနံၤ တၢ်လီၢ်တတီၤဒီး လီၢ်ခံကတၢၢ်ဖဲတလါအံၤလါမးရှး ၇ သီ တၢ်လီၢ်တတီၤ ဟီၣ်ကဝီၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ထီၣ်မၤန့ၢ်ဝဲ တၢ်လီၢ်(၂)တီၤအံၤ အဂ့ၢ်န့ၣ် လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤဝါမုၢ် စံးဝဲန့ၣ်လီၤ.
“ဒုၣ်ဒါသုးကလၢၤလၢပထီၣ်န့ၢ်န့ၣ်တမ့ၢ်လၢသုးကလၢၤလိၤလိၤဒ်န့ၣ်ဘၣ်,မ့ၢ်ဝဲ(ကာကင်း)ဒ်န့ၣ်လီၤ.တၢ်လီၢ်တၢတတီၤလၢပပှၤထီၣ်န့ၢ်အီၤန့ၣ်ဖဲအပူၤကွံၥ်လါယနူၤအါရံၤ ၈ သီ တၢ်လီၢ်န့ၣ်သၤယၤကိ လ့ၣ်မ့ၣ်အူကျဲဒီး မ့မ့ၢ်လၢခံဘျီတဘျီတခါန့ၣ်ဖဲတလါအံၤ လါမးရှး ၇ သီ ဖဲဒုၣ်ဒါဟဲနုၥ်လီၤဖဲယ့ၤတွ့ကိ ပၥ်လီၤဝဲဒၣ်(ကာကင်း)တၢ်လီၢ်လၢအမ့ၢ်ဝဲ(ဝက်ချဲ)ဒီး(ကျောင်းကုန်း)န့ၣ် ပပှၤနုၥ်လီၤ ဆှဲဝဲဒီးဖဲန့ၣ်ပပှၤမၤန့ၢ်တၢ်ဖိတၢ်လံၤအိၣ်စ့ၢ်ကီးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤ န့ၣ်လီၤ.
လၢၢ်ဒိၣ်ကီၢ်ဆၣ်ဒူသဝီတဖၣ်ပူၤ လီၤဆီဒၣ်တၢ်စးထီၣ်ဖဲတလါအံၤလါမးရှးထီၣ်အံၤန့ၣ်ပယီၤသုးကျိၤနုၥ်လီၤဟူးဂဲၤဝဲ အါအါဂီၢ်ဂီၢ် အသိး ခီဖျိအဝဲသ့ၣ်အံၤသူဝဲကျိဖးဒိၣ်,ဒြိဒီးဖးဒိၣ်အံၤအဃိ ကမျၢၢ်သံဘၣ်ဒိဘၣ်ထံးဒီးဘၣ်ဃ့ၢ်မှံဟးဖျိးဝဲအါမးန့ၣ်လီၤ.
ခီဖျိလၢသုးမီၤစိရိၤအတၢ်ဟူးတၢ်ဂဲၤသ့ၣ်တဖၣ်အံၤအဃိ စးထီၣ်လၢလါယနူၤအါရံၤတုၤလါမးရှးလၢ(၃)လါဃၣ်ဃၣ်အတီၢ်ပူၤ ကမျၢၢ်သံဝဲ(၃၈)ဂၤဒီး ဘၣ်ဒိဘၣ်ထံး ဝဲနးနးကျံၤကျံၤ(၃၅)ဂၤအမဲၥ်ညါ ဒူသဝီ(၁၃)ဖျၢၣ် ဟံၣ်ခိၣ်(၁၂၂၇)ဖျၢၣ် ပှၤနီၣ်ဂံၢ်(၅၈၇၀) ဂၤဘၣ်ဃ့ၢ်ထီၣ်ဝဲအဂ့ၢ်န့ၣ် ခ့ၣ်အဲၣ်ယူၣ် န့ၣ်လီၤ.
ဘၣ်ဃးဒီးပယီၤသုးနုၥ်လီၤဟူးဂဲၤဒီးလီၢ်ခံကတၢၢ်လီၢ်ကဝီၤကမျၢၢ်တၢ်အိၣ်သးအံၤန့ၣ် ပဒိၣ်စီၤဝါမုၢ် စံးဝဲလၢ“ပယီၤသုးနုၥ်လီၤ အတၢ်ပညိၣ်န့ၣ်ကမ့ၢ်ဝဲတၢ်လီၢ်လၢပနုၥ်လီၤဒိၣ်စိအီၤန့ၢ်သ့ၣ်တဖၣ်န့ၣ်အဝဲသ့ၣ်ကနုၥ်လီၤမၤဆှဲဝဲဒၣ်.ဘၣ်ဆၣ်သနါက့ဒ်သိးအဝဲသ့ၣ်တၢ်ပညိၣ်အသိးန့ၣ်မၤဝဲတလၢပှဲၤဘၣ်.လီၤဆီဒၣ်တၢ်ခဲအံၤခီဖျိတၢ်ဒုးတၢ်ယၤအဖီခိၣ်န့ၣ်ဘၣ်ဃ့ၢ်မှံဟးဖျိးအနီၣ်ဂံၢ် အါထီၣ်ဒီးတၢ်သံတၢ်ဘၣ်ဒိဘၣ်ထံးစ့ၢ်ကီးအနီၣ်ဂံၢ်ဟဲအါထီၣ်ဝဲလီၤ”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤလီၤဆီဒၣ်တၢ်ပယီၤသုးကျိၤလၢအနုၥ်လီၤဟူးဂဲၤဖဲယ့ၤတွ့ကိသီပူၤတဖၣ်တဖၣ်တုၤလၢခဲအံၤတဟးထီၣ်ဒံးဘၣ် ဆဲးဟူးဂဲၤအိၣ်ဆီလီၤအသးဖဲန့ၣ်အဖၢမုၢ်အဂ့ၢ်န့ၣ် ခ့ၣ်အဲၣ်ယူၣ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တကးဒံးဘၣ်ချၢၣ်လွံၢ်ထူၣ်ကီၢ်ရ့ၣ်ပူၤ ဖဲအပူၤကွံၥ်လါမးရှး ၂၁ သီတုၤ ၂၂ သီ လၢခံသီအတီၢ်ပူၤ သုးမီၤစိရိၤကဘီယူၤလဲၤတ့ၢ်လီၤ မ့ၣ်ပိၢ်အိၣ်ဝဲ(၂၁)ဘျီ ,ကျိဖးဒိၣ်(၃၀)ဘျီဒီးသူဝဲဒၣ်ဒြိ(၄)ဘျီအဃိ ကမျၢၢ်ဟံၣ်တၢ်သူၣ်ထီၣ်ဟးဂီၤဘၣ်ဒိဘၣ်ထံးဝဲအါအါဂီၢ် ဂီၢ်အဂ့ၢ် န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.
ဒ်လၢၢ်ဒိၣ်ကီၢ်ဆၣ်ထုးထီၣ်ပၥ်ဖျါဝဲဖဲမဟါအသိးန့ၣ် ခီဖျိလၢကျိဖးဒိၣ်,ကဘီယူၤအဃိကမျၢၢ်သံဘၣ်ဒိဘၣ်ထံးတၢ်သးအမဲၥ်ညါ လၢတၢ်(၃)လါအတီၢ် ပူၤစ့ၢ်ကီးပယီၤသုးဖိသီလၢအဘၣ် တၢ်မၢကဲန့ၢ်ဆူၣ်သုးသ့ၣ်တဖၣ်အံၤဟဲက့ၤဟ့ၣ်လီၤသးအိၣ်ဝဲ(၄၁)ဂၤ အဂ့ၢ်န့ၣ် စံးဝဲန့ၣ်လီၤ.
