တးပီသုးကလၢၤသုတလီၤတဂ့ၤအဂီၢ်ပယီၤသုးပၥ်ဖှိၣ်ဆဲးဟဲထီၣ်ဝဲဒီးကဘီယူၤစ့ၢ်ကီးဟဲခးလီၤတၢ်အဆၢတတဲၥ်

လါအ့ဖြ့ၣ် ၁၆ သီ, ၂၀၂၆ နံၣ်, ခ့ၣ်အဲးစံၣ်

တးပီသုးကလၢၤလၢ(သုးက့ ၁)အပှၤဆဲးထီၣ်ဝဲခဲအံၤန့ၣ် သုးကလၢၤအံၤသုးတလီၤတဂ့ၤအဂီၢ် ပယီၤသုးပၥ်ဖှိၣ်ဂုၥ်ကျဲးစၢးဆဲးဟဲ ထီၣ်ဝဲဒီး လၢကဘီယူၤအံၤတဆီကဘီယူၤဟဲခးလီၤတၢ်အဆၢတတဲၥ်ဝဲအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါ အအိၣ်န့ၣ်လီၤ.

လ့က့ၣ်သုးကလၢၤလီၤဝံၤလီၢ်ခံခီဖျိတၢ်ဆဲးထီၣ်ဝဲတးပီသုးကလၢၤအဃိ လၢကဟဲထီၣ်မၤပှဲၤအါထီၣ်သုးနီၣ်ဂံၢ်အဂီၢ် လၢပနွဲၢ်ကျါ ဒီးကမၤမိၢ်အံၤတဆီပယီၤသုးဒီးဟီၣ်ကဝီၤဘူးဒးစၢၤကညီသုးမုၢ်ဒိၣ်(DKBA)သုးခိၣ်ဘိၤဘံၣ်အပှၤတဖၣ်ပၥ်ဖှိၣ် ထီၣ်သးလၢ (၁၅၀)ဃၣ်ဃၣ်ဂုၥ်ကျဲးစၢးဟဲထီၣ်ဝဲလၢကျဲအဘိဘိအဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤ စံးဝဲန့ၣ်လီၤ.

အဝဲစံးဝဲလၢ“အခဲအံၤ(စစ်ကူ)ဟဲထီၣ်ဒီဒူၣ်လီၤ.ဟဲထီၣ်ကျဲလၢကမၤမိၢ်,မဲၢ်ကနးခံ,မ့ဝံၤလၢပနွဲၢ်ကျါတကပၤန့ၣ်စ့ၢ်ကီးဟဲထီၣ်. ဖဲဟဲထီၣ်အခါပပှၤခိးခးအဃိတၢ်ဒုးကဲထီၣ်.အခဲအံၤပနၢ်ဟူလၢမ့အီၣ်လဲၣ်နဲၣ်လီၤလၢကဘၣ်ဟဲထီၣ်ဟံန့ၢ်က့ၤလ့က့ၣ်သုးကလၢၤ. ခဲအံၤပယီၤသုးဟဲခးလီၤတၢ်လဲးလူးလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.

ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ်လၢကဟဲထီၣ်လူၤမၤစၢၤတၢ်အဂီၢ်ပယီၤသုးပၥ်ဖှိၣ်သ့ၣ်တဖၣ်အံၤ စးထီၣ်ဟဲထီၣ်ဝဲလၢ လ့က့ၣ်သုးကလၢၤတလီၤဒံးဘၣ်ဒီး ဖဲအဝဲသ့ၣ်ဟဲထီၣ်လၢကျဲအခါစ့ၢ်ကီး ခီဖျိဘၣ်တၢ်ခိးခးအဝဲသ့ၣ်လၢ(KNLA)အဃိ ပယီၤသုးပၥ်ဖှိၣ်တကပၤဘၣ်ဒိဘၣ်ထံးက့ၤယိးလီၤသးအိၣ်ဝဲဒၣ်န့ၣ်လီၤ.

ဘၣ်ဆၣ်လၢကျဲအဘိဘိတကီၢ်ခါခဲအံၤပယီၤသုးပၥ်ဖှိၣ်လၢဟဲထီၣ်တဖၣ်တနီၤန့ၣ် ဟဲထီၣ်တုၤလၢတးပီသဝီကစၢၢ်ပှၢ်ပူၤလံ ဒီး လၢကနုၥ်လီၤဝဲလၢသုးကလၢၤပူၤအဂီၢ် ခီဖျိတၢ်ခိးခးဝဲအဃိတၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.

တးပီသုးကလၢၤလၢပယီၤသုးပၥ်ဖှိၣ်ဂုၥ်ကျဲးစၢးဟဲထီၣ်မၤအါထီၣ်အသုးနီၣ်ဂံၢ်အံၤန့ၣ် တၢ်တယးကွၢ်ဝဲလၢသုးဂံၢ်ဘါကအိၣ်တဲ အဂၤ(၆၀)ဃၣ်ဃၣ်န့ၣ်လီၤ.

ဒ်န့ၣ်အသိးလၢတၢ်ထီၣ်ဝဲသုးကလၢၤတၢ်ဂ့ၢ်ပိၥ်ထွဲအံၤအဃိ စးထီၣ်လၢလါအ့ဖြ့ၣ် ၁၂ သီ တုၤလၢတနံၤအံၤ ၁၆ သီတစုန့ၣ် လၢတးပီသုးကလၢၤအခိၣ် အဃၢၤန့ၣ် သုးမီၤစိရိၤကဘီယူၤဟဲတ့ၢ်လီၤဝဲမ့ၣ်ပိၢ်အိၣ်ဝဲကိးမုၢ်နံၤမုၢ်နၤဒဲးဒီး တုၤလၢတနံၤအံၤ ဒုးယၤတၢ်ဖ့ၣ်စၢဆဲးကဲထီၣ်ဒံးဝဲအဖၢမုၢ်န့ၣ်လီၤ.

ဒ်ကီၢ်ရ့ၣ်တၢ်မၤနီၣ်မၤဃါပူၤအိၣ်ဝဲအသိးန့ၣ်အပူၤကွံၥ်လါအ့ဖြ့ၣ် ၁၂ သီတုၤ ၁၄ သီ လၢ(၃)သီအတီၢ်ပူၤ ကဘီယူၤလဲၤတ့ၢ်လီၤဝဲ မ့ၣ်ပိၢ်ဒီးကျိဒိၣ်လၢတးပီ,ပှိၢ်သဝီ,ပယၢ်ရီသဝီပူၤပၥ်ဖှိၣ်အိၣ်လံဝဲအဖျၢၣ်(၇၀)ဃၣ်ဃၣ်ညါလံန့ၣ်လီၤ.အဃိလၢတၢ်(၃)သီအတီၢ်ပူၤအံၤ ကမျၢၢ်သံ(၁)ဂၤ, ဘၣ်ဒိ(၁)ဂၤဒီး ဟံၣ်(၆)ဖျၢၣ်,ကျးဆါတၢ်(၂)ဖျၢၣ်ဟးဂီၤဘၣ်ဒိဘၣ်ထံးဝဲဒၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.