လါအ့ဖြ့ၣ် ၁၃ သီ, ၂၀၂၆ နံၣ်, ခ့ၣ်အဲးစံၣ်
(ခမရ-၉၆၂)ဒုးယၤအတၢ်ဒီသဒၢသုးကလၢၤတဖျၢၣ်လၢအိၣ်ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ မဲၢ်သဝီဟီၣ်ကဝီၤအပူၤအံၤ ဖဲတနံၤအံၤလါအ့ဖြ့ၣ် ၁၃ သီအံၤတၢ်ထီၣ်မၤန့ၢ်ဝဲအဂ့ၢ်န့ၣ် တၢ်ပၢၢ်ဆၢသုးကရူၣ်တကပၤ စံးဝဲအသိး သ့ၣ်ညါဘၣ် န့ၣ်လီၤ.
ဖဲတနံၤအံၤကဘၣ်ဖဲမုၢ်ဃ့ၢ်လီၤအဆၢကတီၢ်န့ၣ် ကီၢ်ကၠီၣ်တဲၣ် မုၣ်အ့ပူၤဆၢလၥ် မဲၢ်တဝီသူမှဲကျိဝၢ်ခီခီၣ်ချ့သုးရ့ၣ်(ခမရ-၉၆၂) ဒုးယၤ အတၢ်ဒီသဒၢသုးကလၢၤတဖျၢၣ်လၢအမ့ၢ် ပနၢ်အီၣ်ဘုတူၢ်သုးကလၢၤအံၤ(သုးက့ ၇)အပှၤကညီဒီ ကလုၥ်တၢ်ထူၣ်ဖျဲးသုး မုၢ်ဒိၣ် (KNLA)သုးပၥ်ဖှိၣ် ထီၣ်မၤန့ၢ်ကွံၥ်ဝဲ ဒၣ်န့ၣ်လီၤ.
(KNLA)ပှၤဘၣ်မူဘၣ်ဒါတဂၤစံးဝဲလၢ“ပနၢ်အီၣ်ဘူတူၢ်သုးကလၢၤဒုလီၤလံ.သုးကလၢၤအံၤအကဲဝဲဒၣ်(ကာကင်း)ဒ်န့ၣ်လီၤ.ပနၢ်အီၣ်ဘုတူၢ်အံၤပယီၤသုးနီၣ်ဂံၢ်ကအိၣ်ထဲ ၂၀ ခိၣ်ဃၢၤဒ်န့ၣ်လီၤ”အဂ့ၢ်န့ၣ် စံဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပနၢ်အီၣ်ဘုတူၢ်(ကာကင်း)ဒီသဒၢသုးကလၢၤလၢတၢ်ထီၣ်န့ၢ်ဝဲခဲအံၤန့ၣ် ခီဖျိအပှၤနီၣ်ဂံၢ် အိၣ်စှၤ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်လဲၤခးစဲးပြဲးဝဲတလီၢ်လီၢ်အဃိ ပယီၤသုးလၢအိၣ်သုးကလၢၤပူၤအံၤတဖၣ် ဟးထီၣ် က့ၤအိၣ် ဖှိၣ်က့ၤဝဲလၢ(ခမရ-၉၆၂)သုးကလၢၤဖးဒိၣ်ပူၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
တကီၢ်ခါခဲအံၤ(ကာကင်း)ဒီသဒၢသုးကလၢၤအံၤလီၤလံဘၣ်ဆၣ်လၢကထီၣ်မၤန့ၢ်ဝဲ(ခမရ-၉၆၂)ဒုးယၤသုးကလၢၤဖးဒိၣ်အံၤအဂီၢ် တၢ်ကဘၣ်ဆဲးထီၣ်ဒုးဖျိးကွံၥ်ဝဲဒီသဒၢ(ကာကင်း)သုးကလၢၤ ၁ ဖျၢၣ်ဒံးအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ် န့ၣ်လီၤ.
တနံၤအံၤပနၢ်အီၣ်ဘုတူၢ်သုးကလၢၤအမဲၥ်ညါ ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ် လ့က့ၣ်သုးကလၢၤလၢ သုးမီၤစိရိၤအခိၣ် မ့အီၣ်လဲၣ် လဲၤဆ့ၣ်နီၤဟံတ့ၢ်ဝဲမူဒါဒ်သုးရ့ၣ်ခိၣ်အသိးအံၤစ့ၢ်ကီး ဖဲမဟါလါအ့ဖြ့ၣ် ၁၂ သီအနံၤန့ၣ် ဘၣ်တၢ်ထီၣ်ဒုးမၤန့ၢ်ဒံးဝဲဒီး တၢ်ဒုးအပူၤတၢ်မၤန့ၢ်ဝဲကျိချံပှၥ်သၣ်,သုးတၢ်ပီးတၢ်လီအါမးစ့ၢ်ကီးန့ၣ်လီၤ.
