သုးကရူၢ်မၤတၢ်က့ၤသူၣ်ထီၣ်ဆီလီၤလၢကီးတရံးဝ့ၢ်ဘၣ်ဆၣ်ကမျၢၢ်အါတက့ၢ်က့ၤအိၣ်တဘူၣ်

လါမ့ၤ ၅သီ, ၂၀၂၆နံၣ်, ခ့ၣ်အဲးစံၣ်,

ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကီးတရံးဝ့ၢ်အပူၤသုးကရူၢ်တကပၤမၤဝဲတၢ်က့ၤသူၣ်ထီၣ်ဆီလီၤတၢ်ရဲၣ်တၢ်ကျဲၤအိၣ်ဝဲဒၣ်ဘၣ်ဆၣ်,ကမျၢၢ်လီၢ်ကဝီၤဖိတဖၣ်အါတက့ၢ်က့ၤအိၣ်ဝဲတဘူၣ်ဘၣ်ဒီးပှၤအိၣ်က့ၤအိၣ်ဒၣ်ထဲစှၤဂၤလီၤအဂ့ၢ်,သ့ၣ်ညါဘၣ်န့ၣ်လီၤ.

ပယီၤသုးကရူၢ်စုတီၤဖီလၥ်ဝဲၤကျိၤပှၤဘၣ်မူဘၣ်ဒါသ့ၣ်တဖၣ်အံၤစးထီၣ်ဖဲလါမ့ၤ(၃)သီဒီး(၄)သီအနံၤအပူၤမၤဝဲတၢ်သူၣ်ထီၣ်ဆီလီၤလၢကီးတရံးဝ့ၢ်အဂ့ၢ်,ပၥ်ဖျါထီၣ်ဝဲဒၣ်လၢစိၤရှၢၣ်မံးဒံးယၢၣ်အပူၤအိၣ်ဝဲဒၣ်န့ၣ်လီၤ.

သုးကရူၢ်အတၢ်ဘိးဘၣ်ပၥ်ဖျါတၢ်သူၣ်ထီၣ်ဆီလီၤအဖီခိၣ်ကီးတရံးဝ့ၢ်လီၢ်ကဝီၤကမျၢၢ်ဖိတဂၤစံးဝဲဒၣ်လၢ
“မ့ကွၢ်တၢ်ကစီၣ်ပူၤဒုအသုပၥ်ဖျါဝဲလၢမၤတၢ်သူၣ်ထီၣ်ဆီလီၤလံန့ၣ်လီၤ.တၢ်နီၢ်နီၢ်ဝ့ၢ်ပူၤခဲအံၤပှၤက့ၤအိၣ်က့ၤအိၣ်ထဲစှၤဂၤလီၤ.ပှၤက့ၤအိၣ်တဘူၣ်ဒံးဘၣ်အဃိပှၤတက့ၤအိၣ်ဘၣ်အိၣ်ဒီဒူၣ်ညါန့ၣ်လီၤ.ပှၤက့ၤအိၣ်သ့ၣ်တဖၣ်န့ၣ်သနၥ်က့ခီဖျိအဝဲသ့ၣ်ဟံၣ်ဃီတၢ်ဖိတၢ်လံၤအိၣ်အဃိတသ့တဘၣ်ဒီးက့ၤဝဲဒၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ.

လၢမၤဝဲတၢ်သူၣ်ထီၣ်ဆီလီၤတၢ်ရဲၣ်တၢ်ကျဲၤအပူၤသုးကရူၢ်အံၤမၤဝဲတၢ်နုၥ်လီၤကွၢ်ထံသမိးသမိးဝဲဟီၣ်ကဝီၤတၢ်အိၣ်သးဒီးမၤဝဲတၢ်ထၢကမျၢၢ်စရီတဖၣ်အိၣ်ဝဲအဂ့ၢ်,အစုတီၤဖီလၥ်ဝဲၤကျိၤပှၤဘၣ်မူဘၣ်ဒါတဖၣ်ပၥ်ဖျါထီၣ်ဝဲဒၣ်လၢစိၤရှၢၣ်မံးဒံးယၢၣ်အပူၤဒီးရၤလီၤစ့ၢ်ကီးဝဲဒၣ်လၢ(MWD)တၢ်ကစီၣ်သန့အပူၤဖဲလါမ့ၤ(၄)သီအနံၤအိၣ်ဝဲဒၣ်န့ၣ်လီၤ.

လၢန့ၣ်အမဲၥ်ညါ,တၢ်မၤဝဲတၢ်ကိးထံၣ်ပှၤလၢဟံၣ်အူထီၣ်ဟးဂီၤကွံၥ်တဖၣ်အတၢ်ရဲၣ်တၢ်ကျဲၤအပူၤခီဖျိကမျၢၢ်လီၢ်ကဝီၤဖိတဖၣ်တက့ၤပၥ်ဖျါထီၣ်သးဒီးမၤဘၣ်ထွဲအသးဒီးအဝဲသ့ၣ်ဘၣ်အဃိ,ရၤလီၤကဒီးဝဲလံၥ်လၢတၢ်ကဆဲးကျိးဆဲးကျၢဝဲကဝီၤဒ့ခိၣ်နၢ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.

ကီးတရံးဝ့ၢ်ပူၤတၢ်ကမၤဝဲတၢ်သူၣ်ထီၣ်ဆီလီၤတၢ်ဘိးဘၣ်ပၥ်ဖျါအဃိ,လၢတၢ်ဂ့ၢ်အါမံၤအါမၠိအဖီခိၣ်ကမျၢၢ်လီၢ်ကဝီၤဖိတနီၤက့ၤဝဲဒၣ်ဘၣ်ဆၣ်,ကဝီၤဒ့တနီၤအပူၤပယီၤသုးတဒုးနုၥ်လီၤဒီးဟ့ၣ်တၢ်ပျဲလၢတၢ်ကအိၣ်ဆိးဝဲဒၣ်ဘၣ်အိၣ်ဝဲအဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.

တကတီၢ်ဃီ,ဝ့ၢ်ဟီၣ်ကဝီၤပူၤတၢ်လီၢ်တၢ်ကျဲတနီၤအမဲၥ်ညါကဝီၤဒ့(၁),(ရှါပဲ)(ထါပ့ၤကိ)(ခၠီတီၤ)တၢ်လီၢ်လၢအဘူးဒီးကျဲမုၢ်ဖးဒိၣ်သ့ၣ်တဖၣ်အံၤပယီၤသုးတဒုးအိၣ်ဆိးဝဲကမျၢၢ်ဘၣ်အဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.

ကညီကီၢ်စဲၣ်ကီးတရံးဝ့ၢ်အံၤကဝီၤဒ့ခဲလၢၥ်အိၣ်ဝဲ(၇)ဘ့ၣ်ဒီးအပူၤကွံၥ်(၂၀၂၄)နံၣ်တဝၥ်အပူၤခီဖျိဟီၣ်ကဝီၤအပူၤတၢ်ဒုးတၢ်ယၤအဃိဟံၣ်ဃီတစှၤန့ၢ်အဖျၢၣ်(၅၀၀)ဃၣ်ဃၣ်ဘၣ်အူအီၣ်ဟးဂီၤကွံၥ်ဝဲအဂ့ၢ်,သ့ၣ်ညါဘၣ်န့ၣ်လီၤ.

ဒ်န့ၣ်အသိး,ခီဖျိတၢ်ဒုးတၢ်ယၤအဃိလီၢ်ကဝီၤဖိတဖၣ်စ့ၢ်ကီးဘၣ်ဃ့ၢ်ထီၣ်အိၣ်ကဒုတ့ၢ်သးယံၥ်ဝဲလၢ(၂)နံၣ်ဃၣ်ဃၣ်လံအဂ့ၢ်,သ့ၣ်ညါဘၣ်န့ၣ်လီၤ.