လါမ့ၤ ၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒီးချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤ လၢ(၃)သီအတီၢ်ပူၤ ခီဖျိသုးမီၤစိရိၤအကျိဖး ဒိၣ်ဒီးကဘီယူၤအံၤအဃိ သီခါဖၠၣ်ဃုၥ်ဒီးဟံၣ်တၢ်သူၣ်ထီၣ်ဟးဂီၤဝဲခဲလၢၥ်(၇)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢမုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ်အပူၤ ဖဲအပူၤကွံၥ်လါမ့ၤထီၣ် ၁ သီအနံၤန့ၣ် သုးမီၤစိရိၤကဘီယူၤလဲၤတ့ၢ်လီၤ ဝဲမ့ၣ်ပိၢ်အဃိ ဟံၣ်(၂)ဖျၢၣ်ဒီးသီခါဖၠၣ်တၢ်သူၣ်ထီၣ်တဖျၢၣ်လီၤပှီၢ်ဟးဂူၥ်ဟးဂီၤဝဲအဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ဖဲလါထီၣ် ၁ သီန့ၣ်ဟဲခးဝဲဖဲဒွဲၣ်လိကီၢ်ဆၣ် နၢ်ကိၢ်ထၣ်ဒီးကၠီၤဒံၣ်ထၣ်. အဟဲခးတၢ်န့ၣ်ကဘၣ်ဖဲမုၢ်ဆါခီ ၁၂း၀၀ နၣ်ရံၣ်ဒီး ၁း၀၀ နၣ်ရံၣ်အဘၢၣ်စၢၤဒ်န့ၣ်လီၤ.ဘၣ်ဟးဂီၤပှၤဟံၣ်န့ၣ်အိၣ်တဖျၢၣ်ခံဖျၢၣ်. ဘၣ်ဟးဂီၤဒီးသီခါဖၠၣ်တဖျၢၣ်,မ့မ့ၢ်သီခါဖၠၣ်တဖျၢၣ်အံၤ ဒု ဘၣ်နးဒိၣ်ကတၢၢ်လီၤ.မ့မ့ၢ်ပှၤကညီဒုတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါမုၢ်ဆ့ၣ်ထီၣ်ဖဲလါမ့ၤ ၂ သီအနံၤစ့ၢ်ကီး လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုး ခီၣ်သုးရ့ၣ် (ခလရ-၂၆၄)ခးလီၤဝဲကျိဖးဒိၣ်(၁၂၀၀ မမ)ခံဖျၢၣ် လီၤတဲၥ်ပိၢ်ဖးထီၣ်ဝဲလၢကၠ့ၣ်ကွ့(ကြိတ်ကွင်း)သဝီပူၤအဃိ ဟံၣ်ဟးဂီၤ ဝဲ(၃)ဖျၢၣ် အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါမ့ၤ ၅)သီအနံၤန့ၣ်လီၤ.
ပယီၤသုးခးလီၤကျိဖးဒိၣ်ဝံၤမုၢ်ဆ့ၣ်ထီၣ်လါမ့ၤ ၃ သီအနံၤ လၢထံဒီၣ်လ့တၢ်လီၢ် ခီဖျိသုးမီၤစိရိၤ(Jet fighter)ကဘီယူၤဟဲ တ့ၢ်လီၤဝဲ မ့ၣ်ပိၢ်အဃိ တိၤသ့ၣ်ဖူသဝီဖိ(တုံးတံတား)သဝီဖိ စီၤလးဝ့(၅၆)နံၣ်လၢအဟးဃုအီၣ်တၢ်မံၤလၥ်အံၤ ဘၣ်ဒိဘၣ်ထံးဝဲဒၣ် အသိး ပယီၤသုးအံၤ ခးလီၤကဒီးဝဲဒြိအဃိ တီၤခ့ၣ်(တောင်ခင်)သီခါဖၠၣ်ဘၣ်ဒိဟးဂီၤကဒီးဝဲအဂ့ၢ်န့ၣ် လံၥ်တၢ်ပၥ်ဖျါအပူၤစံးဝဲ န့ၣ်လီၤ.
တကးဒံးဘၣ်လၢၢ်ဒိၣ်ကီၢ်ဆၣ်ပူၤတချုးတၢ်ကဲထီၣ်သးအံၤဒံးဘၣ်လါမ့ၤ ၁ သီအနံၤစ့ၢ်ကီး ပယီၤသုး(ခလရ-၂၆၄)တဒူၣ်ဃီဝဲအံၤ ခးလီၤဝဲကျိဖးဒိၣ်(၄)ဖျၢၣ်လၢ (လိန်ပင်ဝိုင်း)ပူၤအဃိ ထီလူၤခိၣ်သဝီဖိလၢအဟဲဃ့ၢ်အိၣ်ကဒုဖဲန့ၣ်တဖၣ်အဟံၣ်ဟးဂီၤဒံးဝဲ(၆)ဖျၢၣ် ကဲထီၣ်ဒံးဝဲန့ၣ်လီၤ.
ဒ်န့ၣ်အသိးမုၢ်တြီၢ်ကီၢ်ရ့ၣ် လူၤကီၢ်ကီၢ်ဆၣ်အပူၤ ဖဲအပူၤကွံၥ်လါအ့ဖြ့ၣ် ၁၅ သီ တါလီၤခံသီတသီအနံၤန့ၣ် သုးမီၤစိရိၤ ကဘီယူၤလဲၤတ့ၢ်လီၤဝဲမ့ၣ်ပိၢ်အါအါဂီၢ်ဂီၢ်လၢ ဃဲပၤကရူၢ်ဒူသဝီပူၤအဃိ ကမျၢၢ်သံ(၄)ဂၤဒီးမ့ၣ်အူအီၣ်ဟံၣ်ဟးဂီၤကွံၥ်ဝဲ(၉)ဖျၢၣ် ဒံးန့ၣ်လီၤ.
မုၢ်တြီၢ်ကီၢ်ရ့ၣ်ဒီးချၢၣ်လွံၢ်ထူၣ်ကီၢ်ရ့ၣ်အမဲၥ်ညါလၢဒူသထူၣ်ကီၢ်ရ့ၣ် တးပီသုးကလၢၤတၢ်ဒုးအပူၤစ့ၢ်ကီး တုၤလၢခဲအံၤကိးမုၢ်နံၤဒဲး န့ၣ် သုးမီၤစိရိၤသူဝဲကဘီယူၤ,ကျိဖးဒိၣ်,ပၤရၤမီၤတၤလ့ၤထံဟဲခးလီၤဝဲတၢ်လၢတၢ်ဒုးကဲထီၣ်လီၢ်အခိၣ်အဃၢၤဒူသဝီ ပူၤ တၢ်ဆၢ ကတီၢ်ထီၣ်ဘးလၢအသီ(၂၀)ဘျဲၣ်စ့ၢ်ကီးလံဒီး ဒ်န့ၣ်အသိးကမျၢၢ်ဟံၣ်ဟးဂီၤကအိၣ်လၢအကယၤဃၣ်ဃၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤ.
