လါမ့ၤ ၂၈ သီ, ၂၀၂၆ နံၣ်, ခ့ၣ်အဲးစံၣ်
ပယီၤသုးကျိၤလၢကလဲၤထီၣ်ဝဲဆူခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဖၣ်ပူၣ်အံၤတဖၣ် ခီဖျိဘၣ်တၢ်ခိးခးအဝဲသ့ၣ် လၢဟီၣ်ကဝီၤ(KNLA)သုးပၥ်ဖှိၣ်ကရူၢ်အဃိ ဆဲးထီၣ်ဆူညါတန့ၢ်အိၣ်ကတးထီဝဲဖဲကဟံလူၢ်(မိုင် ၄၀)အခိၣ်အဃၢၤဒီး ဖဲမဟါအနံၤ တၢ်ဒုးကဲထီၣ်ဝဲဒီတနံၤကျၢၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲမဟါလါမ့ၤ ၂၇ သီ ဂီၤခီတုၤဃီၤဝဲလၢဟါခီတစု လၢကဟံလူၢ်တၢ်လီၢ်တကပၤန့ၣ်တၢ်ဒုးကဲထီၣ်ဝဲလၢ(သုးက့ ၅)အပှၤဒီး ပယီၤသုးအဘၢၣ်စၢၤဒီတနံၤကျၢၤန့ၣ်လီၤ. လၢတၢ်ဒုးကဲထီၣ်ဘျီဝဲအံၤအပူၤန့ၣ် ပယီၤသုးတကပၤဘၣ်ဒိ(၉)ဂၤဒီး ဖဲန့ၣ်အကျါ ဘၣ်ဒိဘၣ်ထံးနးနးကျံၤကျံၤ(၇)ဂၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤရီဘ့ၤမူ စံးဝဲန့ၣ်လီၤ.
အဝဲစံးဝဲလၢ“ဖဲမဟါ ၂၇ သီန့ၣ်ပယီၤသုးကျိၤန့ၣ်အိၣ်ဒံးဖဲ(မိုင် ၄၀)န့ၣ်ဒံးလီၤ. ဖဲမဟါစးထီၣ်လၢဂီၤခီ ၉း၀၀ နၣ်ရံၣ် တုၤလၢ မုၢ်ဟါန့ၣ်တၢ်ဒုးကဲထီၣ်စဲးပြဲးဒီတနံၤကျၢၤလီၤ.လၢဒ်န့ၣ်အဖီခိၣ်အဃိပယီၤသုးန့ၣ်ပသ့ၣ်ညါလၢအဘၣ်ဒိ(၉)ဂၤမီၤ. လၢအဘၣ်ဒိ ဘၣ်ထံးတဖၣ်အံၤအကျါန့ၣ်ပသ့ၣ်ညါဘၣ်လၢအနးဒိၣ်အိၣ်ဒီးတၢ်ဘၣ်ယိၣ်န့ၣ်(၄)ဂၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်ဖဲတဂီၤအံၤန့ၣ်လီၤ.
ပယီၤသုးကျိၤအံၤလၢကလဲၤထီၣ်ဆူဖၣ်ပူၣ်အဂီၢ်လၢကမၤမိၢ်အံၤတဆီဘၣ်တဆီဟဲထီၣ်တုၤဝဲလၢကဟံလူၢ်(မိုင် ၄၀)တၢ်ဆၢ ကတီၢ်ကအိၣ်ဝဲ(၃)သီလံဘၣ်ဆၣ် တုၤလၢခဲအံၤခီဖျိဘၣ်တၢ်တြီတံၢ်ခိးခးအဝဲသ့ၣ်လၢတၢ်ပၢၢ်ဆၢသုးကရူၢ်အဃိ ဆဲးထီၣ်ဝဲဆူညါ တန့ၢ်အိၣ်ဒံးဝဲဖဲန့ၣ်အသိး သုးကျိၤအံၤမ့ဘၣ်ကွၢ်စးထီၣ်အဟဲထီၣ်တုၤလၢတနံၤအံၤတၢ်ဆၢကတၢၢ်လၢၥ်ဂီၤဝဲလၢကျဲပူၤထီၣ်ဘး ဝဲလၢတလါဃၣ်ဃၣ်လံန့ၣ်လီၤ.
ဘၣ်ဆၣ်မ့ဘၣ်ကွၢ်ကဟံလူၢ်(မိုင် ၄၀)တၢ်လီၢ်လၢပယီၤသုးဟဲထီၣ်တုၤအိၣ်ဝဲခဲအံၤန့ၣ်ဘူးထီၣ်ဝဲလၢကတၢတံၥ်တကပၤလံဒီး ဒ်န့ၣ်အသိးကတၢတံၥ်ဒီးတၢ်လီၢ်လၢပယီၤသုးအိၣ်ခဲအံၤန့ၣ် ဘၣ်လဲၤလၢခီၣ်တနံၤမုၢ်မးကတုၤဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.
တကးဒံးဘၣ်လၢမီလိၥ်ကျိ-န့ၢ်ကးသဝီဘၢၣ်စၢၤ ဒီး ကဟံလူၢ်တၢ်လီၢ်လၢတၢ်ဒုးကဲထီၣ်ဖဲမဟါအံၤန့ၣ် ဖဲအပူၤကွံၥ်လါမ့ၤ ၂၄ သီ အနံၤစ့ၢ်ကီး ခီဖျိတၢ်ဒုးကဲထီၣ်ဝဲဒိၣ်ဒိၣ်မုၢ်မုၢ်အဃိ ပယီၤသုးတကပၤသံ(၄)ဂၤ,ဘၣ်ဒိဘၣ်ထံး(၇)ကဲထီၣ်ဒံးဝဲဒီး ဒ်န့ၣ်အသိး တၢ်ဒုးဘျီဝဲန့ၣ်အပူၤစ့ၢ်ကီးသံဘၣ်ဒိဘၣ်ထံးတဖၣ်အကျါပၣ်ဃုၥ်ဝဲသုးရ့ၣ်ခိၣ်ဒီးသုးဒ့ခိၣ်တဖၣ်န့ၣ်လီၤ.
လၢန့ၣ်အမဲၥ်ညါတၢ်ဒုးကဲထီၣ်ဝံၤမုၢ်ဆ့ၣ်ထီၣ် ၂၅ သီအနံၤ လၢၢ်ကွဲဖိသဝီလၢဟံၣ်ခိၣ်ကအိၣ်ဝဲ(၂၀၀)ဃၣ်ဃၣ်အံၤ ပယီၤသုး နုၥ်လီၤဒွဲၣ်အူအီၣ်ကွံၥ်ဟံၣ်အဖျၢၣ်(၁၀၀)ဒံးန့ၣ်လီၤ.
တကီၢ်ခါခဲအံၤပယီၤသုးအံၤဒ်သိးလဲၤထီၣ်ဝဲဆူဖၣ်ပူၣ်ကန့ၢ်အဂီၢ်ဂုၥ်ကျဲးစၢးလဲၤထီၣ်တဲအဖၢမုၢ်အသိး လၢဟီၣ်ကဝီၤ(KNLA)သုးပၥ် ဖှိၣ်တကပၤစ့ၢ်ကီးလၢတၢ်တြီဆၢဒီသဒၢက့ၤဟီၣ်ကဝီၤအံၤအဂီၢ် ဆဲးပံးတံၢ်ဃၥ်ဝဲကျဲအိၣ်ခိးခးလီၤဝဲအဃိ ဒုးယၤတၢ်ဖ့ၣ်စၢ ဆဲးကဲထီၣ်ဝဲတပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
