လါမ့ၤ ၂၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် လ့က့ၣ်ဒီးတးပီသဝီ(၂)ဖျၢၣ်အံၤအပူၤပယီၤသုးမၢပှၤကမျၢၢ်ဟဲက့ၤအိၣ်လၢ သဝီပူၤဘၣ်ဆၣ် ပယီၤသုးအံၤဆဲးအိၣ်ဆီလီၤသးဒံးသဝီပူၤ,တၢ်ဒုးစ့ၢ်ကီးဆဲးကဲထီၣ်ဒံးအဃိ လီၢ်ကဝီၤကမျၢၢ်လၢအဃ့ၢ်ထီၣ် အါဒၣ်တက့ၢ် က့ၤဟံၣ်က့ၤဃီတဘူၣ်ဒံးဝဲဘၣ်အသိးကၠိစ့ၢ်ကီးတၢ်ကီတၢ်ခဲလၢတၢ်ကအိးထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါအ့ဖြ့ၣ်ထီၣ်သီသီအခါန့ၣ် ပယီၤသုးကလၢၤ(၂)ဖျၢၣ်လၢအိၣ်ဆီသးဖဲတးပီဒီးလ့က့ၣ်သဝီပူၤအံၤတဖၣ် ဟီၣ်ကဝီၤ(KNLA)သုးပၥ်ဖှိၣ် လဲၤကဝီၤခးဝဲဝံၤလီၢ်ခံ ခီဖျိပယီၤသုးကဘီယူၤဟဲခးလီၤတၢ်ကိးမုၢ်နံၤဒဲးအဃိ ဟံၣ်ဃီတၢ်သူၣ်ထီၣ် ဟးဂီၤဝဲဒၣ်အါမးတကးဒံးဘၣ် ကမျၢၢ်လၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်အဂၤ(၂၀၀၀၀)ဃၣ်ဃၣ်ဘၣ်ဃ့ၢ်ထီၣ်ဝဲဒၣ်န့ၣ်လီၤ.
ဖဲန့ၣ်ဝံၤလီၢ်ခံလါအ့ဖြ့ၣ် ၁၂ သီအနံၤ (KNLA)သုးပၥ်ဖှိၣ်ထီၣ်မၤန့ၢ်ဝဲလ့က့ၣ်သုးကလၢၤဘၣ်ဆၣ် လၢကထီၣ်န့ၢ်က့ၤ သုးကလၢၤအံၤအဂီၢ် ပယီၤသုးကျိၤ(စစ်ကူ)ဟဲထီၣ်အါအါဂီၢ်ဂီၢ်အဃိ ဖဲတလါအံၤလါမ့ၤ ၁၂ သီအနံၤန့ၣ်ပယီၤသုးဟဲက့ၤထီၣ်မၤန့ၢ် ကဒါဝဲသုးကလၢၤအံၤန့ၣ်လီၤ.
ပယီၤသုးဟဲက့ၤထီၣ်မၤန့ၢ်က့ၤသုးကလၢၤဘၣ်ဆၣ် သုးကလၢၤလၢအအိၣ်တ့ၢ်ဝဲအံၤတၢ်ဒိးလီၤဃၥ်ဝဲဟီၣ်လၥ်မ့ၣ်ပိၢ်အဃိ တုၤလၢ ခဲအံၤအဝဲသ့ၣ်နုၥ်လီၤအိၣ်ဝဲလၢသဝီပူၤ,လၢပှၤကမျၢၢ်အဟံၣ်ပူၤဃီအဖၢမုၢ်ဒံးန့ၣ်လီၤ.
ဖဲလါမ့ၤထီၣ်အံၤပယီၤသုးအံၤမၢဝဲဒၣ်ပှၤကမျၢၢ်ဟဲက့ၤအိၣ်လၢသဝီပူၤဘၣ်ဆၣ် လၢသဝီပူၤခီဖျိပယီၤသုးသ့တဖၣ် ဆဲးအိၣ်ဒံး တကးဒံးဘၣ်အမဲၥ်ညါ လၢသဝီအခိၣ်အဃၢၤန့ၣ်တၢ်ပၢၢ်ဆၢသုးကရူၢ်ကဝီဃၥ်ဒံးဝဲပယီၤသုးအဃိ အါဒၣ်တက့ၢ်ကမျၢၢ်က့ၤအိၣ် တဘူၣ်ဝဲဘၣ် ဘၣ်ဆၣ်ပှၤက့ၤအိၣ်ဝဲဒၣ်တနီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤစံးဝဲလၢ“တုၤလၢခဲအံၤတၢ်ဒုးကဲထီၣ်ဒံးအဃိ တၢ်ဘံၣ်တၢ်ဘၢတ အိၣ်ဒံးဘၣ်.လၢသဝီပူၤနါက့ပယီၤသုးအိၣ်ဒံး.ပှၤသဝီဖိန့ၣ်ကိၢ်သးလၢအတၢ်ဖိတၢ်လံၤကလီၤမၢ်အဃိက့ၤဝဲဒ်န့ၣ်လီၤ.တနီၤန့ၣ်က့ၤ အိၣ်အိၣ်ဘၣ်ဆၣ်တနီၤန့ၣ်က့ၤအိၣ်တဘူၣ်ဘၣ်.ပှၤက့ၤအိၣ်တမ့ၢ်ခဲလၢၥ်ဘၣ်,ပှၤက့ၤအိၣ်သၢပူတပူမးတအိၣ်ဘၣ် အိၣ်ဒၣ်စှၤကိၥ် ဖိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးခီဖျိလၢဒုးယၤတၢ်အိၣ်သးအံၤအဃိ လ့က့ၣ်သဝီ,တးပီသဝီ,လၢၢ်ချၢၣ်သဝီပူၤ (KECD)ကၠိ ဃုၥ်ဒီးကၠိလၢအိၣ်ဘူးဖဲန့ၣ် တဖၣ် တၢ်ကီတၢ်ခဲအိၣ်လၢတၢ်ကအိးထီၣ်ဝဲဒၣ်န့ၣ်လီၤ. ဘၣ်ဆၣ်မ့မ့ၢ်ဒူသဝီလၢအိၣ်ယံၤဒီးဒူသဝီအံၤတဖၣ်လၢကဟဲလါယူၤ ၂ သီ အံၤကၠိကစးထီၣ်ဝဲဒၣ်အဂ့ၢ်န့ၣ် ကမျၢၢ်ပိၥ်မုၣ်လၢအိၣ်တယံၤတဘူးဒီးသဝီလၢတၢ်ဒုးကဲထီၣ်အံၤတဂၤ စံးဝဲန့ၣ်လီၤ.
“မ့မ့ၢ်လၢပအိၣ်သဝီအံၤဒုခဲကၢးတလါမုၢ်ခံနံၤန့ၣ်ကၠိကထီၣ်ကဒါလီၤ.တၢ်မၢၤမ့မ့ၢ်လၢလ့က့ၣ်,တးပီတကပၤန့ၣ်ဒုပှၤအိးထီၣ်ကၠိတသ့ဒံးဘၣ်ယဆိမိၣ်.ပှၤသဝီဖိနါက့က့ၤအိၣ်လၢသဝီတဘူၣ်ဒံးဘၣ်.ပအိၣ်ဖဲအံၤပနၢ်ဟူကျိသီၣ်ဒံးမီၤလၢန့ၣ်တကပၤန့ၣ်.လၢန့ၣ်တကပၤ န့ၣ်ပှၤကမျၢၢ်လဲၤမးတဘူၣ်ဘၣ်.ပှၤဘၣ်ပျံၤပယီၤ”အဂ့ၢ်န့ၣ် ကီၢ်ဟဲသဝီဖိ ကၠိဖိမိၢ်ပၢ်တဂၤ စံးဘၣ်ခ့ၣ်အဲးစံၣ်-ကညီ တၢ်ကစီၣ် န့ၣ်လီၤ.
တကးဒံးဘၣ်တၢ်အီၣ်တၢ်အီဘိၣ်,ကျိချံပှၥ်သၣ်ဘိၣ်ကဘီယူၤဟဲတ့ၢ်လီၤန့ၢ်ဝဲတလီၢ်လီၢ်အံၤ ဖဲမဟါလါမ့ၤ ၂၈ သီအနံၤစ့ၢ်ကီး တၢ်ဟဲတ့ၢ်လီၤန့ၢ်ဒံးဝဲအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤကမျၢၢ်အအိၣ်န့ၣ်လီၤ.
စးထီၣ်ဖဲအပူၤကွံၥ်လါအ့ဖြ့ၣ်ထီၣ်အခါန့ၣ် ခီဖျိတၢ်ဒုးတၢ်ယၤ,ကဘီယူၤတၢ်လီၤဘၣ်ယိၣ်အဃိ ပယၢ်ရီကရူၢ် ,တးပီကရူၢ် ဟးတရဲးကရူၢ်ပူၤဒူသဝီကမျၢၢ်ပှၤနီၣ်ဂံၢ်လၢအကလးဘၣ်ဃ့ၢ်ထီၣ်ဝဲအဃိ တုၤလၢခဲအံၤအဝဲသ့ၣ်ဘၣ်ဟးစံၣ်အိၣ် တၢ်ဆၢကတီၢ် အိၣ်ဝဲ(၂)လါလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.