လါယူၤ ၂၅ သီ, ၂၀၂၆ နံၣ်, ခ့ၣ်အဲးစံၣ်
တၢ်ဒုးကဲထီၣ်တအိၣ်ပယီၤသုးခးလီၤကျိဖးဒိၣ်ဆူခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ကဒံၣ်ပူၤကရူၢ် ပၣ်တံၣ်ကိသဝီပူၤအဃိ သဝီဖိပိၥ်မုၣ်လၢအိၣ်ဒီးအဟုးသးတဂၤ,အဟၢဖၢပူၤအဖိဃံး(၂)ဂၤဃုၥ်ဒီးဖိသၣ်(၁၁)နံၣ်လၢအဂၤတဂၤ ပၥ်ဖှိၣ်ခဲလၢၥ်(၄)ဂၤသံဝဲဒီး ဘၣ်ဒိဘၣ်ထံးဝဲနးနးကျံၤကျံၤ(၂)ဂၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါယူၤ ၂၂ သီ ဟါခီ ၅း၀၀ နၣ်ရံၣ်အဆၢကတီၢ် ဟီၣ်ကဝီၤအပူၤတၢ်ဒုးကဲထီၣ်တအိၣ် ပယီၤသုးတြိၤ(၄၄) စုတီၤဖီလၥ် ခီၣ်ချ့သုးရ့ၣ်(ခမရ-၃)အံၤ ပညိၣ်ခးစိဃီၤဝဲကျိဖးဒိၣ်(၂)ဖျၢၣ်လီၤတဲၥ်ပိၢ်ဖးထီၣ်ဝဲလၢပၣ်တံၣ်ကိသဝီအပူၤန့ၣ်လီၤ.
ခီဖျိလၢကျိဖးဒိၣ်လီၤတဲပိၢ်ဖးထီၣ်အံၤအဃိ ပၣ်တံၣ်ကိသဝီဖိ ကိၤငဲၤ အဟံၣ်အံၤအူအီၣ်ကွံၥ်ဝဲဒီတဖျၢၣ်ဒီး အမါ စ့ၤမၤစိ (၄၁)နံၣ် လၢအဒၢန့ၢ်ဝဲ(၇)လါဃၣ်ဃၣ်အံၤသံတကးဒံးဘၣ် လၢအဟၢဖၢပူၤအဖိတဃံး(၂)ဂၤအံၤစ့ၢ်ကီး သံဃုၥ်ဝဲ န့ၣ်လီၤ.
ဘၣ်ဃးတၢ်ဂ့ၢ်အံၤ ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ “တၢ်ကဲထီၣ်သးန့ၣ်ဖဲ ၂၂ သီ ၅ နၣ်ရံၣ်အဆၢကတီၢ်န့ၣ်. တၢ်ဒုးတၢ်ယၤ ကဲထီၣ်တအိၣ်နီမံၤဘၣ်. ဒုၣ်ဒါ(ခမရ-၃)န့ၣ် ကွံၥ်လီၤဝဲကျိဖးဒိၣ်(၂)ဖျၢၣ်လီၤတဲၥ်ဖဲကဒံၣ်ပူၤကရူၢ် ပၣ်တံၣ်ကိသဝီပူၤ. လီၤဘၣ်ဝဲ ပှၤဟံၣ်ဘျီဟံၣ်အူအီၣ်ထီၣ်တဖျၢၣ်. မ့ဝံၤကျိဖးဒိၣ် အက့န့ၣ်ဘၣ်ဝဲဒၣ်စ့ၤမၤစိ. အဝဲန့ၣ်အိၣ်ဒီးအဟုးအသးဒၢန့ၣ် ဝဲဒၣ်(၇)လါ. ဘၣ်ဝဲဒၣ်အဟၢဖၢဘျီပှၤလဲၤဆှၢအီၤလၢတၢ်ဆါဟံၣ် ဘၣ်ဆၣ်အလဲၤတုၤဘျီန့ၣ်အသးသမူဟးထီၣ်လီၤ. မ့ဝံၤပှၤကိ ကွၢ်အ ဟၢဖၢ န့ၣ်အဖိအိၣ်တဃံးဝဲ(၂)ဂၤ အဖိန့ၣ်အပိၥ်မုၣ်(၂)ဂၤလၢၥ် လီၤ.”အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါပယီၤသုးခးလီၤကျိဖးဒိၣ်ဘျီဝဲအံၤ ဖိသၣ်မုၣ်ဖိ မံၣ်စန့ၤလၢအသးနံၣ်အိၣ်(၁၁)နံၣ်အံၤစ့ၢ်ကီး ကျိဖးဒိၣ် အက့အခီ ဖျိးဘၣ်အီၤသံဝဲဖဲတၢ်ကဲထီၣ်သးအလီၢ်န့ၣ်တဘျီဃီအသိး ဖိသၣ်မုၣ်အံၤအပါ အူမီၤလ့(၃၁)နံၣ်အံၤဒီး အဖိမုၣ် မံၣ်ယိ (၅)နံၣ်ခံဂၤ အံၤစ့ၢ်ကီးကျိဖးဒိၣ်အက့အခီဘၣ်ဝဲအခီၣ်ကံၣ်ဒုၣ်အချၢဃံစုၥ်စုၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိပယီၤသုးအတၢ်ခးလီၤကျိဖးဒိၣ်ဘျီဝဲအံၤန့ၣ် ပှၤမိၢ်ဒၢလၢအဖိတဃံး(၂)ဂၤလၢအတအိၣ်ဖျဲၣ်ဘၣ်ဒံးဘၣ်အံၤ ဃုၥ်ဒီးဖိသၣ်လၢအဂၤတဂၤ ပၥ်ဖှိၣ်ခဲလၢၥ်သံဝဲ(၄)ဂၤ,ဘၣ်ဒိဘၣ်ထံး(၂)ဂၤအသိး ကျီၢ်သံဃုၥ်ဝဲ(၁)ဒုဒီးဘၣ်ဒိဘၣ်ထံးဝဲ (၁)ဒုန့ၣ်လီၤ.
ဘၣ်ဃးပယီၤသုးအတၢ်ဟးခးလီၤတပျုၥ်တပျီၥ်တၢ်အံၤ သထူၣ်ကီၢ်ဆၣ်အမဲၥ်ညါ ကၠဲးထိၣ်ကီၢ်ဆၣ်အပူၤစ့ၢ်ကီး ဖဲအပူၤကွံၥ် လါယူၤထီၣ် ၅ သီ ,၁၈ သီ ဒီး ၁၉ သီအနံၤ လၢတကွံပူၤကရူၢ်,ဆီသုးခံကရူၢ်ဒီး ဖွ့ဖူကၢ်ကရူၢ် ဒူသဝီတဖၣ်အပူၤ ခီဖျိကဘီ ယူၤလဲၤ ခးလီၤတၢ်ဒီးပယီၤသုးခးလီၤစ့ၢ်ကီးကျိဖးဒိၣ်အဃိ တၢ်ပၢၢ်ဆၢကရူၢ်(PDF)အပှၤဃုၥ်ဒီးကမျၢၢ်သံဝဲ(၅)ဂၤဒီး ဘၣ်ဒိဘၣ်ထံး တစှၤန့ၢ် ဝဲ(၇)ဂၤဒံးန့ၣ်လီၤ.
တကးဒံးဘၣ်တၢ်ကဲထီၣ်သးအံၤဝံၤမၤကဒီးဖဲလါယူၤ ၂၂ သီ, ၂၃ သီ ဒီးတုၤလၢမဟါ ၂၄ သီအနံၤစ့ၢ်ကီး လၢဘံလ့ကီၢ်ဆၣ်အပူၤ တၢ်မၤထူလီၢ်လၢအိၣ်ကရူၢ်(၄)ဘ့ၣ် ဒူသဝီအပူၤတဖၣ်အံၤ ကဘီယူၤလဲၤတ့ၢ်လီၤဝဲမ့ၣ်ပိၢ်(၃)သီတပယူၥ်ဃီအဃိ ပှၤမၤထူဖိသံ ဘၣ်ဒိၣ်ဘၣ်ထံး တစှၤန့ၢ်ဝဲ(၇)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
(သုးက့ ၁)ဟီၣ်ကဝီၤအပူၤ စးထီၣ်လၢ ၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံ တုၤလၢခဲအံၤတစု လၢဟီၣ်ခိၣ်မဲၥ်ဖံးခိၣ် တၢ်ဒုးကဲ ထီၣ်အိၣ်ဂ့ၤတအိၣ်ဂ့ၤ ပယီၤသုးအံၤတၢ်ပၢၢ်ဆၢသုးကရူၢ်အိၣ်ဆိးလီၢ်အမဲၥ်ညါ ညီနုၢ်န့ၣ်ပညိၣ်ခးစိဃီၤဝဲ ကျိဖးဒိၣ် ဆူလီၢ် ကဝီၤ ကမျၢၢ် အိၣ်ဆိး တၢ်လီၢ်တကးဒံးဘၣ်သူဃုၥ်စ့ၢ်ကီးဝဲကဘီယူၤဟးခးလီၤတၢ်အိၣ်ဝဲတလီၢ်လီၢ်အဃိ သုးဖိသံၣ်ဖိဃုၥ်ဒီးကမျၢၢ် သံဘၣ်ဒိဘၣ်ထံးအိၣ် ထီၣ်ဝဲခဲအံၤခဲအံၤဒီး ဒ်န့ၣ်အသိးတုၤလၢခဲအံၤကမျၢၢ်တဖၣ်ဘၣ်ဃ့ၢ်ထီၣ်အမဲၥ်ညါ ဘၣ်အိၣ်ဒံးဝဲလၢ တၢ်ဘၣ်ယိၣ်ဘၣ်ဘှီအပူၤအဖၢမုၢ်ဒံးန့ၣ်လီၤ.
