လါယူၤ ၂၂သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ် ဝီၢ်ရ့ၣ်ကီၢ်ဆၣ်နိၣ်ခၠိၣ်နဲၣ်ဒုးယၤသုးကလၢၤအပူၤမဟါလါယူၤ(၂၁)သီအနံၤဟါခီအဆၢကတီၢ်ပယီၤသုးတဖၣ်ခးလီၤကျိဖးဒိၣ်အဃိ,ဘၣ်ဒိဝဲဝ့ခနးကမျၢၢ်လီၢ်ကဝီၤပိၥ်မုၣ်(၃)ဂၤအဂ့ၢ်,သဝီလီၢ်ကဝီၤဖိတဖၣ်စံးဝဲန့ၣ်လီၤ.
ဝ့ခနးကမျၢၢ်လီၢ်ကဝီၤဖိလၢဘၣ်ဒိဘၣ်ထံးသ့ၣ်တဖၣ်အံၤမ့ၢ်ဝဲနီၢ်သယုၢ်ဆၢသးနံၣ်(၃၆)နံၣ်,နီၢ်လ့လ့ထူ(၂၈)နံၣ်ဒီးနီၢ်လ့လ့ဖီ(၂၆)အဒီပုၢ်ဝဲၢ်မုၣ်သ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.
ဘၣ်ဃးပယီၤသုးကျိဖးဒိၣ်လီၤတဲၥ်ဒီးဘၣ်ဒိဝဲတၢ်အဖီခိၣ်,ဝ့ခနးကမျၢၢ်လီၢ်ကဝီၤဖိတဂၤစံးဝဲဒၣ်လၢ“ကျိဖးဒိၣ်လီၤတဲၥ်န့ၣ်အိၣ်လၢယဲၢ်နၣ်ရံၣ်ဘျဲၣ်လံ,လီၤတဲၥ်ဝဲဒၣ်သဝီပူၤပှၤဟံၣ်ဃၢၤဃီၤထူၣ်ကပၤအဃိ,ကျိအက့အခီတဖၣ်ပြံပြါထီၣ်ဒီးဘၣ်ဝဲအသုသ့ၣ်တဖၣ်န့ၣ်န့ၢ်လီၤ.”အဂ့ၢ်စံးဝဲန့ၣ်လီၤ. တကတီၢ်ဃီ,ခီဖျိပယီၤသုးခးလီၤဝဲတၢ်ဒ်အံၤဃိတကီၢ်ခါခဲအံၤသဝီလီၢ်ကဝီၤဖိတနီၤအိၣ်ဒီးတၢ်ဘၣ်ယိၣ်ဘၣ်ဘှီဃ့ၢ်ထီၣ်မံဝဲဒၣ်ဆူတၢ်လီၢ်အဂၤအိၣ်ဝဲအသိး,တနီၤအိၣ်ခိးဒိကနၣ်တၢ်အိၣ်သးဒီးတနီၤလဲၤဃ့ၢ်အိၣ်ဝဲဒၣ်လၢအတၢ်ဖံးအီၣ်မၤအီၣ်ကျီး,ဒဲတဖၣ်အပူၤအိၣ်ဝဲအဂ့ၢ်,အဝဲစံးဝဲန့ၣ်လီၤ.
လၢန့ၣ်အမဲၥ်ညါ,နိၣ်ခၠိနဲၣ်ပယီၤသုးသ့ၣ်တဖၣ်အံၤမဟါလါယူၤ(၂၁)သီအနံၤအပူၤခးလီၤဝဲကျိဖးဒိၣ်အိၣ်ဝဲ(၈)ဖျၢၣ်ဒီးလီၤတဲၥ်ဝဲလၢဝ့ခနးသဝီပူၤ(၂)ဖျၢၣ်အမဲၥ်ညါလီၤတဲၥ်စ့ၢ်ကီးဝဲလၢတိၤဃီဖူသဝီ(ဖါဝါဖၢၣ်)ဟံၣ်ဃၢၤ(၁)ဖျၢၣ်ဘၣ်ဆၣ်တၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်,ဂံၢ်ခီၣ်ထံးတၢ်ပၢၢ်ဆၢကရူၢ်ကရၢပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တကးဒံးဘၣ်,ပယီၤသုးသ့ၣ်တဖၣ်အံၤခီဖျိတၢ်ပၢၢ်ဆၢသုးထီၣ်ခးအဝဲသ့ၣ်တဖၣ်အိၣ်ဝဲအဃိခးတပျုၤတပျီၤလီၤက့ၤဝဲတၢ်ဆူကမျၢၢ်အိၣ်ဆိးဒူသဝီတၢ်လီၢ်တၢ်ကျဲပူၤအဂ့ၢ်,သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢဝီၢ်ရ့ၣ်ကီၢ်ဆၣ်ဟီၣ်ကဝီၤပယီၤသုးနိၣ်ခၠိနဲၣ်ဒုးယၤကလၢၤအံၤအိၣ်ဆီလီၤဝဲဒၣ်အသးလၢဃိၣ်သၢဖျၢၣ်သရိၥ်ဝါကျဲမုၢ်အဖီခိၣ်ဒီးမ့ၢ်ဝဲသုးကလၢၤလၢအရ့ဒိၣ်လၢပယီၤသုးတဖၣ်အဂီၢ်တဖျၢၣ်န့ၣ်လီၤ.
ဒီးပယီၤသုးသ့ၣ်တဖၣ်အံၤအပူၤကွံၥ်(၂၀၂၄)နံၣ်အပူၤပၥ်တ့ၢ်ကွံၥ်အတၢ်လီၢ်တၢ်ကျဲလၢအဘူးဒီးနိၣ်ခၠိနဲၣ်သုးကလၢၤတဖၣ်ဒီးက့ၤလီၤဝဲဆူမိၢ်ကီၢ်စဲၣ်တကပၤအိၣ်ဝဲဘၣ်ဆၣ်စးထီၣ်ဖဲတၢ်မၤတၢ်ဃုထၢဝံၤအလီၢ်ခံ(၂၀၂၆)နံၣ်နုၥ်လီၤအပူၤဟဲထီၣ်ဆီလီၤကဒါက့ၤဝဲအသးလၢဃီကျါ,မဲၢ်ကျူၢ်,လွးရှါဟီၣ်ကဝီၤတၢ်လီၢ်တဖၣ်အပူၤဒီးပၥ်လီၤဝဲတၢ်ဘံၣ်တၢ်ဘၢလၢဃိၣ်သၢဖျၢၣ်-သရိၥ်ဝါကျဲမုၢ်ဖးဒိၣ်တဖၣ်အပူၤအိၣ်ဝဲအါတီၤအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,လၢဃိၣ်သၢဖျၢၣ်ဝ့ၢ်တကပၤစ့ၢ်ကီးဒ်သိးကစးထီၣ်ဟူးဂဲၤက့ၤဝဲအတၢ်ပၢတၢ်ြပးအဂီၢ်တလါအံၤလါယူၤအပူၤတၢ်ကစီၣ်ဟူထီၣ်သါလီၤလၢဃ့ထီၣ်ဝဲတၢ်ဘၣ်ဘျူးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA)ကရူၢ်ကရၢတဖၣ်လၢကဟ့ၣ်တၢ်ပျဲအိၣ်ဝဲအသိး,ကဒိၣ်စိက့ၤဝဲဝီၢ်ရ့ၣ်ကီၢ်ဆၣ်ဟီၣ်ကဝီၤပူၤအဂီၢ်အတၢ်ရဲၣ်တၢ်ကျဲၤအိၣ်စ့ၢ်ကီးဝဲလၢကဟံးန့ၢ်က့ၤဝဲတၢ်လီၢ်လၢဘၣ်ဟ့ၣ်ဃၣ်ကွံၥ်ဝဲတၢ်လီၢ်တဖၣ်အိၣ်ဝဲအမဲၥ်ညါတကီၢ်ခါခဲအံၤမၤဝဲသုးကျိၤတၢ်ဟူးတၢ်ဂဲၤအိၣ်စ့ၢ်ကီးဝဲအဂ့ၢ်,တၢ်ပၢၢ်ဆၢကရူၢ်ကရၢတဖၣ်စံးဝဲန့ၣ်လီၤ.
