လါယူၤ ၂၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤ ကီၢ်ဆၣ်ဒူသဝီတဖၣ်အပူၤ အပူၤကွံၥ်လါမ့ၤတလါအတီၢ်ပူၤ ပယီၤသုး သူဝဲကျိဖးဒိၣ်,ဒြိဒီးကဘီယူၤဟးခးလီၤတၢ်ပၥ်ဖှိၣ်အိၣ်ဝဲအဘျီ(၁၀၀)ဘျဲၣ်တကးဒံးဘၣ် ပယီၤသုးအံၤနုၥ်လီၤလၢ သဝီပူၤဝံၤ ဟံကမျၢၢ် အတၢ်ဖိတၢ်လံၤဒွဲၣ်အူအီၣ်ဝဲတၢ်သူၣ်ထီၣ်အဂ့ၢ်န့ၣ် ကီၢ်ရ့ၣ်တလါတဘျီတၢ်မၤနီၣ်စရီပူၤအသိး သ့ၣ်ညါ ဘၣ်န့ၣ် လီၤ.
လၢၢ်ဒိၣ်ကီၢ်ဆၣ်,ဆီထံးကီၢ်ဆၣ်ဒီး မူကီၢ်ဆၣ်အပူၤ ပယီၤသုးအံၤခီဖျိခးလီၤတၢ်ဒီးကဘီယူၤ,ဒြိ,ကျိဒိၣ် တဖၣ်လၢဒူသဝီ အပူၤတကးဒံးဘၣ်ဒိးလီၤဃၥ်စ့ၢ်ကီးဟီၣ်လၥ်မ့ၣ်ပိၢ်အဃိ တလါအတီၢ်ပူၤကမျၢၢ်သံ(၅)ဂၤဒီး ဘၣ်ဒိဘၣ်ထံးဝဲ (၁၈)ဂၤ န့ၣ် လီၤ.
ဒ်တၢ်မၤနီၣ်စရီပူၤအိၣ်ဝဲအသိးန့ၣ် တလါအတီၢ်ပူၤပယီၤသုးခးလီၤကျိဖးဒိၣ်(၂၃)ဘျီ, ကဘီယူၤလဲၤတ့ၢ်လီၤမ့ၣ်ပိၢ်(၅)ဘျီဒီး လဲၤတ့ၢ်လီၤတၢ်ဒီးဒြိမ့ၣ်ပိၢ်အိၣ်ဝဲ(၇၆)ဘျီ ပၥ်ဖှိၣ်ခဲလၢၥ်(၁၀၄)ဘျီ န့ၣ်လီၤ.
ခီဖျိလၢတၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကဝီၤကမျၢၢ်ပိၥ်မုၣ်(၂)ဂၤ,ပိၥ်ခွါ(၃)ဂၤ ပၥ်ဖှိၣ်(၅)ဂၤသံဝဲဒီး ပိၥ်မုၣ်(၇)ဂၤ, ပိၥ်ခွါ(၁၁)ဂၤ ပၥ်ဖှိၣ်ခဲလၢၥ်(၁၈)ဂၤဘၣ်ဒိဘၣ်ထံးဝဲဒၣ်န့ၣ်လီၤ. တကးဒံးဘၣ်တၢ်သံတၢ်ဘၣ်ဒိဘၣ်ထံးအမဲၥ်ညါ ကမျၢၢ်ဟံၣ် (၂၁)ဖျၢၣ်, သီခါဖၠၣ်(၃)ဖျၢၣ်, သိလ့ၣ်ယီၢ်(၄) ခိၣ်ဒီး လ့ၣ်(၄)ခိၣ်ဟးဂူၥ်ဟးဂီၤဘၣ်ဒိဘၣ်ထံးဝဲအသိး ထိးသံစ့ၢ်ကီးဝဲ(၂)ဒု န့ၣ် လီၤ.
တကးဒံးဘၣ်လၢန့ၣ်အမဲၥ်ညါဖဲလါမ့ၤ ၂၂ သီအနံၤ လၢမူကီၢ်ဆၣ် တီၤစူၣ်(တောင်စု)သဝီအပူၤ ပယီၤသုးနုၥ်လီၤဒီး ဒွဲၣ်အူအီၣ်ဝဲကမျၢၢ်အကျီးပူၤဒဲတၢ်သူၣ်ထီၣ်ဝံၤဟံဃုၥ်ဝဲတၢ်ဖိတၢ်လံၤသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲဒၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်အပူၤ မ့ဘၣ်ကွၢ်လၢတၢ်မၤနီၣ်စရီပူၤအသိးန့ၣ် စးထီၣ်လၢလါမ့ၤထီၣ် ၁ သီ တုၤဃီၤလၢ ၃၀ သီအနံၤ ပယီၤသုးအံၤသူဝဲကဘီယူၤ,ဒြိ,ခးလီၤဝဲကျိဖးဒိၣ်အိၣ်ဝဲကိးမုၢ်နံၤဒဲးဃၣ်ဃၣ်န့ၣ်လီၤ. လၢတၢ်န့ၣ်အဃိလီၤဆီဒၣ် တၢ်ကမျၢၢ် ဒူသဝီလၢဘၣ်ကွၢ်ဆၢၣ်မဲၥ်ဝဲပယီၤသုးအတၢ်ဟူးတၢ်ဂဲၤတဖၣ် ပှၤနီၣ်ဂံၢ်လၢအကထိဃ့ၢ်ပလဲၥ်သးဟးထီၣ်အိၣ်လၢ တၢ်ဘံၣ် တၢ်ဘၢလီၢ်အိၣ်ဝဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.