လါယူၤလံ ၁၄သီ, ၂၀၂၆နံၣ်, ခ့ၣ်အဲးစံၣ်,
ကီၢ်ပယီၤထံလီၢ်ကီၢ်အပူၤ ဒုးယၤတၢ်သဘံၣ်သဘုၣ်အဃိ တၢ်ဘၣ်ပၥ်တ့ၢ်ကွံၥ်ဟံၣ်ဃီ ဃ့ၢ်ထီၣ်အိၣ်ကဒုဝဲဒၣ်ဒီး တၢ်ဃံး တၢ်စ့ၤ အါထီၣ်ဝဲအဖီခိၣ် ထံဖိကီၢ်ဖိကမျၢၢ်အဂၤ(၁၆)ကကွဲၢ်ဘျဲၣ်လိၣ်ဘၣ်ဝဲ ပှၤဂ့ၢ်ဝီတၢ်ဆီၣ်ထွဲ မၤစၢၤ အဂ့ၢ် ဘီမုၢ်စၢဖှိၣ်ကရၢ တၢ်မၤဘၣ်လိၥ်ဖိးဒ့ပှၤဂ့ၢ်ဝီတၢ်ဆီၣ်ထွဲမၤစၢၤ(UNOCHA) ထုးထီၣ်ပၥ်ဖျါဝဲဒၣ်န့ၣ်လီၤ.
ဒ်(UNOCHA)(၂၀၂၆) နံၣ်, နံၣ်တဝၥ် တၢ်ပၥ်ဖျါအိၣ်ဝဲဒၣ်အသိးန့ၣ်, ပှၤလၢဘၣ်ဃ့ၢ်အိၣ်ကဒုအိၣ်ဝဲ (၃.၈)ကကွဲၢ်ဃၣ်ဃၣ်ဒီး ပှၤသ့ၣ်တဖၣ်အံၤအါတက့ၢ်ဘၣ်ဃ့ၢ်ထီၣ်လၢတၢ်သဘံၣ်အဃိ အဂ့ၢ်ပၥ်ဖျါဝဲန့ၣ်လီၤ.
တကတီၢ်ဃီ, တကီၢ်ခါခဲအံၤ ကီၢ်ပယီၤ ကလံၤစိးမုၢ်နုၥ်,ကလံၤထံးမုၢ်ထီၣ်ဟီၣ်ကဝီၤတဖၣ်အပူၤ ဒုးယၤသဘံၣ် ဘုၣ်ဆဲးအိၣ်ဝဲအဖၢမုၢ်အဖီခိၣ် တၢ်ဘၣ်သုးလီၢ်သုးကျဲဃ့ၢ်ထီၣ်တဖၣ်အံၤ ဆဲးအိၣ်ဒံးဝဲတပယူၥ်ဃီအဂ့ၢ်, ပၥ်ဖျါဝဲ န့ၣ်လီၤ.
၂၀၂၆နံၣ်, လါမးရှးလၢၥ်န့ၣ် လၢတၢ်မၤဘူၣ်ကစၢ်တဖၣ်အအိၣ်တဆီ တၢ်သးကညီၤပှၤဂ့ၢ်ဝီသိၣ်မှံၤတၢ်ကရၢကရိ တဖၣ် တိၥ်လီၤပၥ်ဝဲလၢကဆီၣ်ထွဲမၤစၢၤဝဲ ကီၢ်ပယီၤအပူၤပှၤအဂၤ (၄.၉) ကကွဲၢ်ဘၣ်ဆၣ် မၤစၢၤဝဲန့ၢ်ဒၣ်ထဲ (၁.၆)ကကွဲၢ်အဂ့ၢ် (OCHA) ပၥ်ဖျါဝဲန့ၣ်န့ၣ်လီၤ.
တၢ်ဆီၣ်ထွဲမၤစၢၤတ့ၢ်ဝဲ ပှၤလိၣ်တၢ်မၤစၢၤတဖၣ်အကျါ ပှၤလၢတၢ်ပၥ်ပနီၣ်အီၤလၢတၢ်ကဘၣ်မၤစၢၤဆိ ကရူၢ်အ ပှၤနီၢ်ဂံၢ် (၈၃၂,၀၀၀)ပၣ်ဃုၥ်ဝဲဒၣ်အဂ့ၢ်, သ့ၣ်ညါ ဘၣ်န့ၣ်လီၤ.
လၢန့ၣ်အမဲၥ်ညါ, ခီဖျိဖီၣ်စုကဝဲၤဟီၣ်ကဝီၤအပူၤ ဒုးယၤတၢ်သဘံၣ်ဘုၣ်အိၣ်ဝဲဃိ တၢ်ဟးထီၣ်က့ၤလီၤတၢ်ပၥ် ပနီၣ် ဒီးပၢြပးဂ့ၢ်ဝီ တၢ်ကီတၢ်ခဲအိၣ်အဖီခိၣ် တၢ်ဆီၣ်ထွဲမၤစၢၤတဖၣ်ကတုၤဝဲဆူ ပှၤလိၣ်ဘၣ်တၢ်တဖၣ်အစုပူၤလၢ အချူး ဆၢချူးကတီၢ်အဂီၢ် သဂၢၢ်ဘၣ်ဝဲ တၢ်ကီတၢ်ခဲအဖၢမုၢ်အဂ့ၢ် ပၥ်ဖျါဝဲစ့ၢ်ကီးန့ၣ်လီၤ.
၂၀၂၆ နံၣ် တၢ်ကမၤဝဲတၢ်ဆီၣ်ထွဲမၤစၢၤပှၤဂ့ၢ်ဝီတၢ်ဖံးတၢ်မၤအဂီၢ် လိၣ်ဘၣ်ဝဲ အမဲရကၤစ့ ဒီလၣ်အကကွဲၢ်(၈၉၀)ဘၣ်ဆၣ် တကီၢ်ခါအံၤ ဒိးန့ၢ်ဘၣ်ဝဲဒၣ်ထဲ စ့ပၥ်ကီၤ အတၢ်လိၣ်ဘၣ် (၄၃)မျးကယၤလီၤ အဂ့ၢ်, သ့ၣ်ညါဘၣ်ဒ်(OCHA) အတၢ်ပၥ်ဖျါအသိးန့ၣ်လီၤ.
တကးဒံးဘၣ်, ခီဖျိလၢ စ့ပၥ်ကီၤတလၢတလီၣ်ဝဲဘၣ်အဃိ မၤလဲၢ်ထီၣ်ဝဲ တၢ်ဖံးတၢ်မၤလၢအဘၣ်ဃးဒီး တၢ်မၤပူၤဖျဲးသးသမူဂ့ၢ်ဝီဒီး တၢ်နီၤဟ့ၣ်လီၤ ဂံၢ်ခီၣ်ထံးတၢ်လိၣ်တဖၣ် တန့ၢ်ဒံးဝဲဒၣ်ဘၣ်အဂ့ၢ် ပၥ်ဖျါစ့ၢ်ကီးဝဲ န့ၣ်လီၤ.
လၢတၢ်န့ၣ်အဃိ ကီၢ်ပယီၤထံလီၢ်ကီၢ်ပူၤ ဘၣ်ဃးဒီး တၢ်ဒိသူၣ်ဒိသး တၢ်ဆီၣ်ထွဲမၤစၢၤ တၢ်လိၣ်ဘၣ်ဂ့ၢ်ဝီသ့ၣ်တဖၣ်အံၤ တနံၣ်အံၤ နံၣ်တဝၥ်အပူၤ အိၣ်ဒံးဝဲဒၣ်လၢအအါပတီၢ်အဖီခိၣ် လိၣ်ဘၣ်ဝဲထံဂုၤကီၢ်ဂၤသိၣ်မှံၤတၢ်ကရၢကရိတဖၣ် ကဟ့ၣ်အါထီၣ်ဝဲ စ့ပၥ်ကီၤဒီး ပှၤဂ့ၢ်ဝီတၢ်ဆီၣ်ထွဲမၤစၢၤတဖၣ်အဂ့ၢ် ဆီၣ်တခူပၥ်ဖျါဝဲန့ၣ်လီၤ.
