လါယူၤလံ ၁၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢစုတီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၤဟဲ လၢအထီဒါဝဲသုးမီၤစိရိၤတဲၥ်တဲၥ်ဖျုဖျုအံၤ တၢ်ဆၢတဲၥ်ပၥ်ထီၣ်အီၤလၢသုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤလီၢ်လံအဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤလၢအသးနံၣ်အိၣ်ဝဲ(၇၉)နံၣ်အံၤ ခီဖျိတၢ်အိၣ်ဆူၣ်အိၣ်ချ့တဂ့ၤလၢၤဘၣ် တၢ်ကီ တၢ်ခဲအိၣ်လၢကဆဲးဟံထီၣ်ဖီၣ်ထီၣ်မူဒါအဃိ လၢဂ့ၢ်ဂီၢ်အူသုးမုၢ်ဒိၣ်တၢ်အိၣ်ဖှိၣ်ပူၤအံၤတဆီ ဒ်(ခ့ၣ်အဲၣ်ယူၣ်) လီၢ်ခၢၣ်သး ပၢဆှၢ တၢ်ကမံးတံၥ်(EC)တၢ်ဆၢတဲၥ်အိၣ်ဝဲအသိး တၢ်ဆၢတဲၥ်ပၥ်ထီၣ်ဝဲသုးရိၣ်မဲခိၣ်ကျၢၢ်-၂ စီၤဘီကၠီၤဟဲ လၢသုးရိၣ်မဲခိၣ်ကျၢၢ် ဘၣ်ဟဲ အိၣ် ထီၣ်ဝဲဒ်အံၤန့ၣ်လီၤ.
ဘၣ်ဃးသုးခိၣ်ကျၢၢ်စိ စီၤဘီကၠီၤဟဲ ထီၣ်ကဒါဝဲသုးရိၣ်မဲခိၣ်ကျၢၢ်အလီၢ်အံၤန့ၣ် သုးက့ပှၤဘၣ်မူဘၣ်ဒါတဂၤ စံးဝဲလၢ “ဖုဘီကဲ ထီၣ်ဝဲသုးရိၣ်မဲခိၣ်ကျၢၢ်န့ၣ် ပၥ်ဂၢၢ်ပၥ်ကျၢၤသ့လံလီၤ. ဘၣ်မနုၤအဃိလဲၣ် တၢ်ပၥ်လီၤတၢ်ဆၢတဲၥ်လၢသုးမုၢ်ဒိၣ်တၢ်အိၣ် ဖှိၣ်အခါ န့ၣ်လံ. ဖဲန့ၣ်တၢ်ဒီတဒၢဝဲၤကျိၤခိၣ်န့ၣ်က့ၤတဲသကိးတၢ်ဒီး EC ဝံၤ EC န့ၣ် ကပၥ်လီၤက့ၤတၢ်ဆၢတဲၥ်လၢစှၤသီအခါန့ၣ် မီၤ” အဂ့ၢ်န့ၣ် စံးဝဲန့ၣ်လီၤ.
ဒ်သုးက့ပှၤဘၣ်မူဘၣ်ဒါစံးဝဲအသိးန့ၣ် သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤအံၤ စးထီၣ်တူၢ်ဘၣ်ဝဲတၢ်ဆါဖးယံၤလံအသိး ခဲအံၤအိၣ်ဒံးဝဲလၢဂ့ၢ်ဂီၢ်အူဆူၣ်ချ့တၢ်အံးထွဲကွၢ်ထွဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤ သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤဘီကၠီၤဟဲ အလီၢ်လၢအလီၤဟိလီၤဖျဲၣ်ဝဲအံၤစ့ၢ်ကီး တၢ်ဆၢတဲၥ်ဃုထၢထီၣ်ဝဲ (သုးက့ ၃)သုးက့ခိၣ် သုးခိၣ်ကျၢၢ်ဖိ စီၤလ့တြီၤ ဒီး အဝဲသ့ၣ်စ့ၢ်ကီးစးထီၣ်ဟံထီၣ်ဖီၣ်ထီၣ်မူဒါလံ အဂ့ၢ်န့ၣ် သုးက့ခိၣ်နၢ်လၢ တအဲၣ် ဒိး ပၥ်ဖျါအမံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ပှၤဆၢတဲၥ်လီၤလၢတၢ်အိၣ်ဖှိၣ်အခါန့ၣ်လံ. သုးက့ကိးဘ့ၣ်ဒဲးတူၢ်လိၥ်ဝဲလီၤ. စးထီၣ်ဖဲန့ၣ်ပသ့ၣ်ညါဘၣ်လၢအဟံထီၣ်ဖီၣ်ထီၣ် မူဒါလီၤ. မ့ဝံၤလၢသုးရိၣ်မဲခိၣ်ကျၢၢ်-၂ ဖုဘီအလီၢ်န့ၣ် တၢ်ဃုထၢထီၣ်ဝဲ(သုးက့ ၃)သုးက့ခိၣ် စီၤလ့တြီၤ . ပှၤပၥ်ဂၢၢ် ပၥ်ကျၢၤအီၤ လၢသုးမုၢ်ဒိၣ်တၢ်အိၣ်ဖှိၣ်အခါန့ၣ်လံ. သုးရိၣ်မဲခိၣ်ကျၢၢ်-၂ လၢအထီၣ်ခဲအံၤတဂၤစ့ၢ်ကီး စးထီၣ်ဟံထီၣ်ဖီၣ်ထီၣ် မူဒါလံ”အဂ့ၢ်န့ၣ် သုးက့ပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
သုးရိၣ်မဲခိၣ်ကျၢၢ် စီၤဘီကၠီၤဟဲ အံၤ အသးနံၣ်အိၣ်ဝဲ(၆၂)နံၣ် ဒီး အဝဲန့ၣ်အဒ့ပီၤလီၢ်အိၣ်ဝဲလၢ မုၢ်တြီၢ်ကီၢ်ရ့ၣ်(သုးက့ ၅) လူၤသီကီၢ်ဆၣ် သဒါဒၢသဝီဒီး အဝဲန့ၣ်စးထီၣ်နုၥ်လီၤမၤတၢ်ပၢၢ်ဆၢစးထီၣ်လၢ(၁၉၈၂)နံၣ်လံ မၤတ့ၢ်ဝဲတၢ်ပၢၢ်ဆၢအိၣ် လံဝဲအနံၣ်(၄၀)ဘျဲၣ်လံအဃိ မ့ၢ်ခိၣ်နၢ်လၢအတၢ်လဲၤခီဖျိအါဝဲတဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးအဝဲန့ၣ်လၢတၢ်ထီဒါဒုးလီၤပှီၢ်ကွံၥ်သုးမီၤစိရိၤတၢ်ရဲၣ်တၢ်ကျဲၤအပူၤန့ၣ်မ့ၢ်ခိၣ်နၢ်တဂၤလၢ အိၣ်ဆၢထၢၣ်ဂၢၢ်ဂၢၢ် ကျၢၤ ကျၢၤ, ဟူးဂဲၤဖံးမၤတၢ်လၢထံကီၢ်ဒီးပှၤကလုၥ်ဂီၢ်တၢ်ဖံးတၢ်မၤလၢၥ်လၢၥ်စ့စ့အဃိ မ့ၢ်ခိၣ်နၢ်တဂၤလၢ ကမျၢၢ်ထံဖိကီၢ်ဖိ ဒီးခိၣ်နၢ်, သိၣ်ဒူသ့ၣ်တဖၣ်အဲၣ်ဘၣ်အီၤပၥ်ဂံၢ်ပၥ်ဘါအီၤန့ၣ်လီၤ.
